Biełaruski jaŭrej, jaki pražyvaje ŭ Izraili, Barys David Bałte ŭziaŭ udzieł u mierapryjemstvach u Vilni ŭ honar pachavańnia Kastusia Kalinoŭskaha. Mužčyna, jaki słužyć u armii Izraila, pranios za Kalinoŭskim ściah hetaj krainy ŭ vajskovaj formie. Svaimi ŭražańniami Barys David Bałte padzialiŭsia ŭ fejsbuku.
«I toje što mnie vydałasia mahčymaść asabista pryniać udzieł va ŭsich mierapryjemstvach, ad šeścia i ŭračystych schodaŭ da rok-kancerta i paetyčnych viečaroŭ, nadaje mnie asabista jašče bolšuju radaść i pačućcio honaru», — piša Barys David Bałte.
Chacia heta było i pachavańnie, nastroj byŭ całkam śviatočny.
«Choć heta pachavańnie, ale heta było samaje sapraŭdnaje śviata. I nijakaha dysanansu tut niama. U judejaŭ jość takoje śviata Łah ba-Omier. Jaho adznačajuć u dzień śmierci zasnavalnika kabały rabi Šymona Bar-Jochaja. Tak jak jon nakazvaŭ viesialicca ŭ hety dzień.
Jak skazaŭ Statkievič na ŭručeńni ŭznaharod, kości Kastusia Kalinoŭskaha źjavilisia ŭ najvažniejšy momant — kali źjavilisia novaja pahroza straty niezaležnaści. A ja b dadaŭ, što navat pazbaŭleny hetaha ziamnoha žyćcia Kastuś Kalinoŭski praciahvaje vierna słužyć Biełarusi. Tamu što sapraŭdny zmahar zaŭždy zmahajecca za Volnaść i Niezaležnaść. I śmierć jamu nie pieraškoda. My i paśla śmierci, svaim śvietłym vobrazam, budziem vajavać ź luboj akupacyjaj i dyktaturaj», — piša biełaruskamoŭny žychar Izraila.
Pakolki pachavańnie nacyjanalnaha pravadyra źjaŭlajecca vajskovym mierapryjemstvam, Barys David Bałte mabilizavaŭsia ź Izraila. A pakolki jon dziejučy žaŭnier — źjaviŭsia ŭ vajskovaj formie Armii Abarony Izraila i ź izrailskim ściaham.
«Z časoŭ kniazia Vitaŭta zaŭsiody žyli judei ŭ Litvie-Biełarusi. Ich kultura i žyćcio stali nieadjemnaj častkaj biełaruskaj kultury i pobytu. Kryvavy śmierč Chałakosta, kali adny akupanty zabivali cieła, i nastupny saviecki antysiemityzm, kali inšyja zabivali dušy, źniščyŭ hety unikalny śviet. Ale, dziakujučy niejkamu hołasu kryvi, ja vyrašyŭ być nie ruskamoŭnym izrailcianinam, a biełaruskim judejem. Tamu ściah majoj nacyi hodna zaniaŭ miesca siarod mora biełaruskich ściahoŭ», — piša biełaruskamoŭny vajskoviec CACHAŁu.
Barys David Bałte ličyć, što biełaruski nacyjanalny ruch sprabujuć niespraviadliva ačarnić mifami i kazkami pra antysiemityzm. Padčas šeścia tolki adna niejkaja žančyna niešta šaptała antysiemickaje na ściah Izraila.
«Ale joj chutka zakryli rot biełaruskija nacyjanalisty. Što jašče raz kaža ab tym, što ŭ Biełarusi nacyjanalizm dušy, a nie kryvi», — piša biełaruski jaŭrej.
«Žyvie Biełaruś!» — zaviaršyŭ svoj dopis Barys David Bałte.
