Łukašenka pravioŭ 22 listapada naradu pa temie ahrapramysłovaści Viciebščyny i daŭ adłup kiraŭnictvu vobłaści, zarezaŭšy niekatoryja inicyjatyvy Šarstniova, u pryvatnaści — stvareńnie «supierbujnoha chołdynhu».
«Kali vy atrymali admoŭny dośvied čatyroch chołdynhaŭ ź piaci, vy chočacie stvaryć jašče adzin hihancki supierchołdynh? Jak razumieć vas tady? […] Za apošnija piać hadoŭ abjom vytvorčaści sielhaspradukcyi pamienšaŭ amal na 2%. U vas poŭnaja stahnacyja! Vy kociciesia ŭ advarotny bok», — kazaŭ Łukašenka i staviŭ pytańni ab tym, čamu ŭ vobłaści skłałasia takaja situacyja.
Ahułam pra naradu infarmuje sajt kiraŭnika dziaržavy.
Łukašenka taksama daručyŭ Anfimavu «pravieryć usich, vyviernuć ich raboty i pahladzieć, što tam za intehracyjnyja struktury».
Na fonie hetaj narady ŭspaminajecca niadaŭni materyjał-intervju «Našaj Nivy» sa šmathadovym kiraŭnikom Hłybokaha Aleham Morchatam, jakoha hubiernatar vyžyŭ z raboty akurat za publičnuju krytyku hetych «intehracyjnych struktur».
Čytajcie: Pra kanflikt z hubiernataram, źniesienaha Lenina i pierśpiektyvy vioski — ščyry manałoh šmathadovaha kiraŭnika Hłybokaha
Ciapier Aleh Morchat pracuje namieśnikam staršyni barysaŭskaha vykankama pa ekanomicy. My spytali ŭ jaho, a što jon dumaje pra naradu Łukašenki pa Viciebskaj vobłaści? Bo vyhladaje, što mnohija raniejšyja tezisy Morchata Łukašenka faktyčna paćvierdziŭ.
«Ja ŭvažliva ŭsio pasłuchaŭ i dumaju, što moj bol usio ž taki pačuty, i z razboru pierakanaŭsia, što ja kazaŭ usio pravilna.
Tolki dumaŭ, ci nie schibiŭ, kali skazaŭ, što nie suprać pryvatyzacyi? A voś i Łukašenka taksama kaža: «Ja baču ŭ hetym sens».
Ahułam jon skazaŭ tak: treba bolš pracavać, a nie šukać pryčyny i nahody, kab dziaržava bolš davała — a vy budziecie tam mudryć? Nie, treba takija ekśpierymienty spynić, vielmi daloka ŭžo zajšli. Što, žyć nadziejaj, što vam niešta tam darujuć, restrukturyzujuć, a vy stvorycie novuju supierstrukturu? I dalej pa-novaj?
Adzinaje, što ja b techniku, pakul nie pozna, addaŭ by ŭ ruki narmalnych haspadarak, dzie zachavalisia miechanizatary. Bo adnosna taho ž Hłybokaha — jaje ŭ kambikormavym zavodzie mohuć zahubić! Ja voś ciapier u Barysaŭskim rajonie pracuju i radujusia, što tut pravilnaja stratehija — kali biednyja haspadarki nie kinutyja, na ŭzroŭni abłvykankamaŭ układajucca hrošy ŭ ziamlu i dojnyja statki, syravina idzie kudy treba. Toj ža prezident na naradzie źviarnuŭ uvahu: čamu vy nie refarmujecie syravinnyja zony tak, kab syravina pastupała na ŭłasnuju vytvorčaść, a nie kamiersantam i nie ŭ Rasiju?» — skazaŭ Morchat i dadaŭ, što, viadoma ź cikavaściu budzie nazirać za Viciebščynaj, jakoj addaŭ stolki hod raboty.
