Piśmieńnica Hanna Jankuta i mastačka Śviatłana Katlarova prydumali «Vožykavuju palanku», na jakoj važaniaty buduć vučycca nazvam koleraŭ, palcaŭ, dzion tydnia, a jašče ličyć i śpiavać.

Pavodle idei na Soniečnaj palanie žyvie siamja vožykaŭ: mama, tata i bliźniaty-važaniaty — dziaŭčynka i chłopčyk na imia Voža i Pych-Pych. Važaniaty, jak i ŭsie dzieci, nadzvyčaj cikaŭnyja i lubiać hulać. A jašče jany vučać biełaruskija słovy: ličby, dni tydnia, kolery, nazvy palcaŭ i inš. U hetym im dapamahajuć karotkija ryfmavanyja vieršyki i lohkija dla zapaminańnia piesieńki.

Pieršaja sieryja nazyvajecca «Hulnia ŭ chovanki». Jana raspaviadzie, jak pa-biełarusku pravilna ličyć, a taksama paznajomić dziaciej sa słovami, jakija majuć dačynieńnie da hulni: ličyłka, chavacca, šukać, znachodzić i inš. Ciapier na jaje stvareńnie źbirajuć srodki na molamola.by.

«Apošnim časam vychodzić usio bolš biełaruskamoŭnych knih dla dziaciej roznych uzrostaŭ. I chacia pakul nielha skazać, što ich stała dastatkova, situacyja vidavočna palapšajecca. Ale adnych knih dla hadavańnia biełaruskamoŭnych dziaciej mała — patrebnyja jašče i jakasnyja multfilmy», — pierakananaja aŭtarka scanaru Hanna Jankuta.

Jana ličyć, što pierakłady zamiežnych multfilmaŭ — dobraja praktyka, ale varta rabić i svajo: «Adnak zusim mała aryhinalnych navučalnych mulcikaŭ, zroblenych na biełaruskim materyjale, i nam vielmi chočacca hety prabieł zapoŭnić. My marym pra sieryjał, kožnaja sieryja jakoha budzie z dapamohaj viasiołych vieršykaŭ, zapaminalnych piesieniek i jarkich siužetaŭ dapamahać dzieciam vučyć biełaruskuju movu. I, biezumoŭna, zabaŭlać, zachaplać i ŭražvać».

Jak buduć vyhladać vobrazy piśmieńnicy, ŭjaviła mastačka Śviatłana Katlarova: «My płanujem zrabić viasioły adukacyjny sieryjał «Vožykavaja palanka», jaki prydasca ŭsioj siamji: dzieci zmohuć daviedacca ź sieryj niešta novaje, baćki atrymajuć dapamožny instrumient dla navučańnia i zabavy. Multfilmy buduć jarkija i kalarovyja: les, zielanina, kvietki, vožyki i inšyja žyvioły. Usio heta — adukacyjny składnik, jarkija vobrazy i biełaruskaja mova, a taksama aryhinalny, biełaruski materyjał — robić hety prajekt unikalnym. U Biełarusi takich prajektaŭ sapraŭdy vielmi mała».

Taki multfilm budzie karysny nie tolki biełaruskamoŭnym siemjam, a i tym, chto razmaŭlaje doma pa-rusku, kab dla dzietak sustreča z movaj u škole nie była šokam.

Zaraz prajekt źbiraje srodki na piłotny epizod. Patrymać jaho možna na molamola.by.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?