Prezident Ukrainy Uładzimir Zialenski kaža, što pačuŭ papiaredžańnie Litvy adnosna Biełaruskaj AES (BiełAES), adnak pakul nie kamientuje, ci budzie jaho kraina dalej kuplać elektraenierhiju ź Biełarusi, piša Delfi.
Paśla sustrečy z prezidentam Litvy Hitanasam Naŭsiedam ukrainski lidar skazaŭ, što abmiarkuje hetaje pytańnie ź ministram enierhietyki Ukrainy. «Ja skazaŭ, što pačuŭ hety sihnał. Ja skazaŭ, što ja abaviazkova siadu ź ministram enierhietyki (…), i my abmiarkujem hetaje pytańnie», — skazaŭ Zialenski žurnalistam.
«Usio, što dla vas važna i što tyčycca pytańniaŭ biaśpieki, važna i dla ŭkraincaŭ», — dadaŭ jon.
Pa słovach Zialenskaha, biełaruskaja elektraenierhija — heta adzin sa sposabaŭ baraćby z enierhietyčnymi manapalistami ŭ samoj Ukrainie. Naŭsieda śćviardžaŭ, što nie imknuŭsia pierakanać Ukrainu nie kuplać biełaruskuju elektraenierhiju, ale raspavioŭ pra pazicyju Litvy.
«Kultura budaŭnictva na hetaj stancyi, nu, zusim niezdavalniajučaja, heta miakka kažučy», — adznačyŭ prezident Litvy. Pavodle jaho słoŭ, ažyćciavić patrabavańni biaśpieki na BiełAES da ŭvodu jaje ŭ ekspłuatacyju zaklikaje nie tolki Litva, ale i ŭvieś Jeŭrasajuz.
