Maskoŭski sud 9 śniežnia prysudziŭ da dvuch hadoŭ kałonii byłoha ministra transpartu Ukrainy i byłoha deputata Viarchoŭnaj Rady Mikałaja Rudźkoŭskaha. Jaho pryznali vinavatym u napadzie na pasolstva Rasii ŭ Kijevie letam 2014 hoda, paviedamlaje TASS.
Rudźkoŭski nieadnarazova fihuravaŭ u rejtynhach samych bahatych ludziej Ukrainy. Taksama jon byŭ staršynioj Sacyjalistyčnaj partyi Ukrainy, a paśla parłamienckich vybaraŭ 2012 hoda dałučyŭsia da frakcyi Partyi rehijonaŭ Viktara Janukoviča.
Incydent, pra jaki idzie havorka, zdaryŭsia 14 červienia 2014 hoda, praź niekalki miesiacaŭ paśla Majdana. Tady pratestoŭcy, jakija sabralisia la pasolstva Rasii ŭ Kijevie, akružyli deputata i prymusili jaho kinuć kamień u budynak. Paśla hetaha Rudźkoŭskaha ablili zialonkaj i prakałoli šyny jaho aŭtamabila Lexus, niahledziačy na toje, što da taho času deputat užo aficyjna vyjšaŭ z frakcyi. Pratestoŭcy taksama patrabavali pradać aŭtamabil palityka, a hrošy eksprapryjavać na patreby ŭkrainskaj armii.
Paśla incydentu na Rudźkoŭskaha ŭ Rasii zaviali kryminalnuju spravu. 28 vieraśnia 2018 hoda były deputat Rady, prylacieŭšy ŭ Rasiju, byŭ zatrymany ŭ aeraporcie, a paśla aryštu pryznaŭ svaju vinu i paprasiŭ razhledzieć jaho spravu ŭ śpiecyjalnym paradku.
