Uviečary 12 śniežnia pamior biźniesoviec, restaratar Aleh Pašak. Jak paviedamiŭ «NN» muzyčny pradziusar Źmicier Biezkaravajny, pryčynaj śmierci stała serca. «Ad jaho brata čuŭ, što prychapiła serca, usio adbyłosia ciaham paŭhadziny», — skazaŭ Biezkaravajny.
Aleh Pašak. Fota z facebook.com.
Aleh Pašak vałodaŭ restaranami «Kamianica», «Hraj», «Ahinski», «Karčma». Dziesiać hadoŭ zapar jon ładziŭ folkavy fiestyval «Kamianica», jaki źbiraŭ šmat hledačoŭ.
«Vielmi kłasny čałaviek. Jon šmat zrabiŭ dla biełaruskaj kultury, — kaža arhanizatar kancertaŭ Uładzimir Płavinski. — Ad pačatku 2000-ch, kali adkryłasia «Kamianica», tam zaŭsiody hrała biełaruskaja muzyka, zaprašalisia hurty. Aleh davaŭ prastoru dla niekamiercyjnych inicyjatyvaŭ: «Mova nanova», «Art-Siadziba». Ź im zaŭsiody možna było damovicca adnosna praviadzieńnia biełaruskich imprez».
Uładzimir Płavinski kaža, što pracavaŭ razam z Pašakam na arhanizacyi «Kamianicy». «Z boku Aleha ŭsio było čotka, vielmi arhanizavana. Šmat hrošaj heta Alehu nie prynosiła — prosta jamu padabałasia hetaja sprava».
Lidara hurta «Stary Olsa» Źmitra Sasnoŭskaha źviazvali z Aleham Pašakam nie tolki prafiesijnaje supracoŭnictva, ale i siabroŭstva. «Kali jon adkryŭ «Kamianicu», to adrazu staŭ zaprašać nas. Jon były vajskoviec, rodam z Homielščyny».
«Jon zaŭsiody byŭ patryjotam, ale šukaŭ formy patryjatyzmu. I znajšoŭ svajo ŭ muzycy», — kaža Sasnoŭski.
Raźvitańnie z Aleham Pašakam adbudziecca 14 śniežnia.
19 śniežnia jamu spoŭniłasia b 54 hady.