11 śniežnia ŭ stalicy Słavakii Bracisłavie adbyłosia adkryćcio miemaryjalnaj doški ŭ honar Janki Kupały.
Pamiatny znak raźmieščany ŭ budynku hatela «Karłtan», u jakim paet spyniaŭsia padčas vizitu ŭ Čechasłavakiju ŭ składzie delehacyi savieckich žurnalistaŭ i piśmieńnikaŭ u kastryčniku 1935 hoda.
Heta byŭ pieršy pramy i niepasredny biełaruska-słavacki kulturny kantakt u najnoŭšaj historyi.
Praz 80 hadoŭ novaje pakaleńnie dypłamataŭ ad biełaruskaj kultury i navuki vypraviłasia ŭ padarožža Kupałavym maršrutam pa słavackaj ziamli, kab pradstavić Biełaruś, a taksama daviedacca, čym žyvie siońnia Słavakija, adkryć jaje dla svaich suajčyńnikaŭ. Mienavita padčas vandroŭki 2015 hoda naradziłasia ideja ŭšanavać pamiać biełaruskaha Pieśniara na słavackaj ziamli, jakuju padtrymali ŭ abiedźviuch krainach.
Prajekt, inicyjataram jakoha byŭ Dziaržaŭny litaraturny muziej Janki Kupały, realizavany ŭ ramkach dziaržaŭna-pryvatnaha partniorstva na sponsarskija srodki. Cyrymonija adkryćcia prajšła pry ŭdziele Nadzvyčajnaha i Paŭnamocnaha Pasła Respubliki Biełaruś u Słavakii Ihara Laščeni, dyrektara Dziaržaŭnaha litaraturnaha muzieja Janki Kupały Aleny Laškovič, a taksama stvaralnika miemaryjalnaj doški skulptara Paŭła Vajnickaha, dziakujučy talentu jakoha kłasik biełaruskaj litaratury ŭšanavany ŭ Łatvii i Finlandyi. Va ŭračystaści pryniali ŭdzieł pradstaŭniki Sajuza słavackich piśmieńnikaŭ, u tym liku paety-pierakładčyki Jarasłaŭ Reźnik i Maryjan Siervatka, jaki ŭ 2008—2013 byŭ Pasłom Słavakii ŭ Biełarusi; partniory Kupałaŭskaha muzieja ź Litaraturnaha i muzyčnaha muzieja Dziaržaŭnaj navukovaj biblijateki ŭ Banskaj Bystrycy; uładalniki hatela «Karłtan», padtrymaŭšyja biełaruskuju kulturnuju inicyjatyvu.
