Volha Radčanka (druhaja źleva), foto «Na strojkach Minska»
U Minsku pryznačyli novaha hałoŭnaha architektara. Im stała ciapierašni namieśnik staršyni kamiteta architektury Volha Radčanka. Pra heta Tut.by paviedamili krynicy i paćvierdzili ŭ Minharvykankamie.
Volha Radčanka skončyła z čyrvonym dypłomam Minski architekturna-budaŭničy technikum, a potym (u 2000 hodzie) — BNTU. Paśla hetaha pracavała ŭ «Minskprajekcie». Darasła tam da kiraŭnika architekturnaj majsterni. Pa vynikach 2016 hoda jaje hrupa była nazvanaja najlepšaj u «Minskprajekcie» za apieratyŭnuju raspracoŭku architekturnaha prajekta navukova-vytvorčaj bazy RUP «Kryptatech» Dziaržznaka. Budynak budzie ŭźviedzieny pa vulicy Skaryny ŭ Minsku.
Uletku 2019 hoda Volhu Radčanka pryznačyli namieśnikam staršyni kamiteta architektury i horadabudaŭnictva Minharvykankama.
— Dośvied — heta svajho rodu vakcynacyja ad niaŭdač. Ja zaŭsiody kažu: «Za mnoj nikoha niama». I kali dapušču pamyłku, značyć, paspadziavałasia na kahości, — kazała pra siabie Radčanka ŭ 2017 hodzie.
Byłoha hałoŭnaha architektara Minska Paŭła Łučynoviča zatrymali 16 sakavika pavodle padazreńnia ŭ atrymańni chabaru. U mai na hetuju pasadu pryjšoŭ Alaksiej Martynaŭ, jaki prabyŭ na pasadzie mienš za miesiac. Jak raspaviadali krynicy, pamier dachodu i adkaznaści na hetaj pasadzie byŭ niesuvymierny. Pasadu prapanoŭvali jašče niekalkim ludziam, ale jany admovilisia.
Sud nad Paŭłam Łučynovičam ža pieranieśli, bo ŭ vieraśni jaho dastavili ź SIZA na Vaładarskaha ŭ balnicu z paraličam nižniaj častki cieła. Jon pa-raniejšamu nie chodzić i znachodzicca na lačeńni.