Uładzimir Łapicki, fota z sacyjalnych sietak
Kali namieśnik hienieralnaha dyrektara pa navukovaj rabocie Abjadnanaha instytuta prablem infarmatyki NAN Biełarusi Uładzimir Łapicki nie vyjšaŭ na pracu paśla adpačynku, jaho kalehi zaniepakoilisia. Paźniej daviedalisia: Uładzimira Anatoleviča bolš niama ŭ žyvych, razam ź im pamior Leanid Laŭšynski, partnior pa navukovych raspracoŭkach i kiraŭnik kampanii «Bielinfarašeńni», piša Tut.by.
Što kankretna zdaryłasia ŭ rajonie Ždanovičaŭ, dzie znajšli cieły mužčyn, kalehi Uładzimira Łapickaha nie viedajuć. Jany čakajuć, čym skončycca pravierka Śledčaha kamiteta.
— Siońnia my raźvitvajemsia z Uładzimiram Łapickim i jaho partnioram pa navukovych raspracoŭkach Leanidam Laŭšynskim. Jany damahlisia vydatnych vynikaŭ u halinie infarmatyzacyi achovy zdaroŭja. Heta ich vielizarnaja zasłuha, bolšaść bujnych raspracovak u halinie infarmatyzacyi achovy zdaroŭja — praca kalektyvu pad kiraŭnictvam Łapickaha, — adznačaje Alaksandr Tuzikaŭ, hienieralny dyrektar Abjadnanaha instytuta prablem infarmatyki Nacyjanalnaj akademii navuk Biełarusi.
Uładzimiru Łapickamu było 56 hadoŭ, apošnija hady jon zajmaŭsia tym, kab biełaruskija balnicy i palikliniki ad zvykłych papier i kartak pierajšli na elektronnuju dakumientacyju, a jašče vystupaŭ za toje, kab lhotnyja recepty taksama stali elektronnymi. U internecie možna znajści niekalki patentaŭ, dzie aŭtarami značacca Uładzimir Łapicki i Leanid Laŭšynski. Naprykład, jany raspracoŭvali kompleks intelektualnaha kiravańnia darožnym rucham, pryładu dla rehistracyi cytałahičnych daśledavańniaŭ
— Učora my daviedalisia, što jany pajšli z žyćcia. Pamierli adnačasova, razam. Miarkujučy pa ŭsim, heta adbyłosia 16 śniežnia. Dziŭnaja historyja … Padrabiaznaściaŭ nichto nie viedaje, viersij šmat, u instytut užo prychodziŭ Śledčy kamitet, - raspaviadajuć kalehi Uładzimira Łapickaha.
Kažuć, mienavita kalehi stali šukać Uładzimira Anatoljeviča, jon raźviedzieny, tamu z rodnymi nie chutka ŭstalavali suviaź. Supracoŭniki zaniepakoilisia, kali mužčyna nie vyjšaŭ na pracu paśla adpačynku.
Učora, 17 śniežnia, pustuju mašynu Laŭšynskaha znajšli ŭ rajonie Ždanovičaŭ, vidać było, što jana paśla DTZ. A praź niejki čas niedaloka ad aŭto ŭ vadaschoviščy ŭspłyli cieła Łapickaha i Laŭšynskaha. Na apaznańnie pryjazdžaŭ syn Łapickaha.
Tut.by źviarnuŭsia pa kamientar u Śledčy kamitet, tam adkazali: «Kali mahčyma budzie što-niebudź skazać dla hramadskaści, my budziem heta rabić z dapamohaj našych aficyjnych resursaŭ».
