Pałata pradstaŭnikoŭ Kanhresa ZŠA pryniała rezalucyju, jakaja abmiažoŭvaje mahčymaści Trampa vieści vajnu ź Iranam. Pałata pradstaŭnikoŭ, jakuju kantralujuć demakraty, ŭchvaliła rezalucyju 224 hałasami suprać 194, piša bbc.com.

Hetaja ŭ cełym simvaličnaja miera praduhledžvaje ŭchvaleńnie Kanhresam na luby kanflikt z hetaj krainaj, za vyklučeńniem vidavočnaha napadu z boku Irana.

Adnak šancy na pryniaćcie rezalucyi sienatam, dzie bolšaść składajuć respublikancy, nievialikija.

Pry hetym ni ZŠA, ni Iran nie kažuć pra płany pa eskałacyi vajennaha kanfliktu.

Raniej iranskija vajskoŭcy ažyćciavili rakietny abstreł amierykanskich baz u Iraku ŭ adkaz na rakietny ŭdar ZŠA, padčas jakoha ŭ Iraku byŭ zabity vysokapastaŭleny iranski hienierał Kasiem Sulejmani.

Śpikier Pałaty pradstaŭnikoŭ Nensi Pełasi zajaviła ŭ čaćvier, što, ź jaje punktu hledžańnia, prezident Tramp nie ŭzmacniŭ biaśpieku ZŠA, kali rasparadziŭsia nanieści ŭdar pa hienierału Sulejmani.

U svaju čarhu Tramp ŭ svaim tvicie nazvaŭ rezalucyju Pełasi varjackaj i vykazaŭ nadzieju, što «ŭsie respublikancy ŭ Kanhresie prahałasujuć suprać».

Jon taksama padzialiŭsia novymi pryčynami pavietranaha ŭdaru pa hienierału Sulejmani, zajaviŭšy žurnalistam u Biełym domie, što irancy «źbiralisia padarvać naša pasolstva» ŭ Iraku.

Клас
0
Панылы сорам
0
Ха-ха
0
Ого
0
Сумна
0
Абуральна
0