Prezident Ukrainy Uładzimir Zialenski prakamientavaŭ viersii mahčymych pryčyn krušeńnia samalota «Mižnarodnych avijalinij Ukrainy» ŭ Tehieranie ranicaj 8 studzienia. U vyniku katastrofy ŭkrainskaha «Boinha» zahinuli 176 čałaviek.

Pa słovach kiraŭnika Ukrainy, viersija ab trapleńni rakiety ŭ samalot nie vyklučajecca, ale na siońnia nie źjaŭlajecca paćvierdžanaj.

«Siońnia kamisija pa rasśledavańni pryčyn krušeńnia kampanii Mižnarodnaj avijakampanii Ukrainy praciahvaje svaju pracu. Ukrainskija ekśpierty ŭdzielničajuć u hetym pracesie. My čakajem, što im budzie pradastaŭlena ŭsia infarmacyja i dostup, nieabchodny dla abjektyŭnaha rasśledavańnia. My padtrymlivajem suviaź z našymi pradstaŭnikami. Nie vyklučana viersija rakiety, ale jana pakul nie paćvierdžana.

Uličvajučy niadaŭnija zajavy kiraŭnikoŭ dziaržaŭ u ŚMI, my zaklikajem usich mižnarodnych partnioraŭ — u pryvatnaści ŭradaŭ Złučanych Štataŭ, Kanady i Vialikabrytanii — padać źviestki i dokazy, źviazanyja z katastrofaj, u kamisiju rasśledavańnia pryčyn. U druhoj pałovie dnia ja abmiarkuju rasśledavańnie ź dziaržsakratarom Majkam Pampiea».

«Naša meta — vyśvietlić biassprečnuju iścinu. My ličym heta adkaznaściu ŭsioj mižnarodnaj supolnaści pierad siemjami zahinuŭšych i za pamiać ab achviarach katastrofy. Kaštoŭnaść čałaviečaha žyćcia pieraŭzychodzić luby palityčny matyŭ», — napisaŭ U. Zialenski ŭ svaim fejsbuku.

Клас
0
Панылы сорам
0
Ха-ха
0
Ого
0
Сумна
0
Абуральна
0