21 studzienia skončyŭsia 2-miesiačny termin źniavoleńnia žurnalista Ŭładzimiera Čudziancova. Jak paviedamiŭ Svabodzie advakat Uładzimiera Čudziancova Alaksandar Halijeŭ, jaho pakinuli pad vartaj.

Pa słovach advakata, u spravie Ŭładzimiera Čudziancova pryznačyli jašče šerah ekspertyz, śledčyja čakajuć ichnich vynikaŭ.

Raman Pratasievič, adzin ź bližejšych siabroŭ i paplečnikaŭ Uładzimiera Čudziancova, nieŭzabavie paśla zatrymańnia žurnalista raspačaŭ kampaniju zboru srodkaŭ na apłatu pasłuh advakata. Jak skazaŭ Pratasievič Svabodzie, praź niejki čas paśla hetaha jon byŭ vymušany źjechać z krainy i paprasić palityčnaha prytułku ŭ Polščy.

«Ja pačaŭ infarmacyjnuju chvalu ŭ abaronu Ŭładzimiera, — raskazvaje Pratasievič. — Zbor hrošaj taksama kaardynavaŭ, usio išło praź mianie. I ŭ niekatory momant pačaŭ zaŭvažać niešta dziŭnaje. Pačalisia prablemy z suviaźziu, kala padjezdu byli niezrazumiełyja aŭtamabili ŭvieś čas. Usio było dosyć padazrona. Adnojčy mnie pazvaniła maci i skazała, što ŭ padjeździe stajać nieviadomyja ludzi. I što jany, najchutčej, čakajuć mianie. Ja zrazumieŭ, što heta nia prosta tak, i vyrašyŭ źjaždžać. Źjaždžaŭ praz Maskvu, dabiraŭsia tudy na dvuch aŭtamabilach, vyklučyŭšy zahadzia telefon».

Dakumenty na atrymańnie palityčnaha prytułku Raman Pratasievič padaŭ 22 studzienia. Pa słovach žurnalista, jon nia mieŭ dačynieńnia da stvareńnia filmu «Łukašenka. Kryminalnyja materyjały», jaki apublikavany na youtube-kanale Niechta. Ale jon viedaŭ ad Čudziancova, što nad im idzie praca. Taksama Pratasievič nastojvaje, što nia ŭdzielničaŭ u pracy nad telehram-kanałam Niechta.

Raman Pratasievič.

Raman Pratasievič.

«Ja byŭ vielmi ździŭleny, kali źjaviłasia hetaja historyja z artykułam 167 u dačynieńni da Ŭładzimiera, — dadaje Pratasievič. — Ja daŭno viedaju hetaha čałavieka. My paznajomilisia, kali mnie było 15 hadoŭ. I kali b jon mieŭ takija schilnaści, to ja b dakładna ich zaŭvažyŭ. Ničoha takoha nie adbyvałasia, navat žartaŭ nijakich nie było».

Pa słovach Ramana Pratasieviča, na dadzieny momant zbor srodkaŭ na apłatu advakata dla Ŭładzimiera Čudziancova spynieny, sabranaja ŭsia suma — 10 tysiač rubloŭ. Pry patrebie Pratasievič hatovy raspačać novy zbor.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?