Najstarejšy ŭ śviecie kratar asteroida lažyć u Aŭstralii, vyśvietlili navukoŭcy. Na ich dumku, heta adkryćcio moža rastłumačyć, jak na płaniecie skončyłasia Pieršaja ledavikovaja epocha, taksama viadomaja jak Huronskaje abladnieńnie, piša bbc.com.

Daśledniki śćviardžajuć, što asteroid zvaliŭsia ŭ miascovaści Jarabuba ŭ Zachodniaj Aŭstralii prykładna 2,2 miljarda hadoŭ tamu.

Da takoj vysnovy navukoŭcy pryjšli ŭ vyniku analizu minierałaŭ, vyjaŭlenych u hornych parodach ŭ hetaj miascovaści.

Navukoŭcy nazyvajuć adkryćcio zachaplalnym, pakolki jano moža rastłumačyć paciapleńnie ŭ tuju epochu.

Kratar znajšli ŭ pustelnaj miascovaści na zachadzie Aŭstralii jašče ŭ 1979 hodzie, ale hieołahi raniej nie analizavali ŭzrost hetaj znachodki.

Praź miljardy hadoŭ erozii kratar užo ciažka zaŭvažny dla čałaviečaha voka. Adnak navukoŭcam udałosia vyśvietlić, što jon mieŭ 70 km u dyjamietry.

Kab vyznačyć, kali asteroid zvaliŭsia na Ziamlu, kamanda navukoŭcaŭ daśledavała kryštaliki cyrkonu i manacytu ŭ skałach, na jakija paŭpłyvaŭ udar asteroida.

Hetyja kryštaliki źmiaščajuć nievialikuju kolkaść uranu. Pakolki uran paśladoŭna raspadajecca na śviniec, daśledčyki zmahli padličyć z dapamohaj uran-śvincovaha mietadu, kolki času prajšło ad padzieńnia asteroida.

Ci moh hety asteroid spynić Pieršuju Ledavikovuju epochu?

Na dumku daśledčykaŭ, vyjaŭleńnie času ŭdaru moža rastłumačyć, čamu na płaniecie adbyłosia paciapleńnie prykładna 2,2 młrd hadoŭ tamu.

Navukoŭcy ličać, što płanieta ŭ toj čas u značnaj stupieni była pakryta lodam. U niejki momant jon pačaŭ rastavać, i płanieta pačała chutka nahravacca.

Vykarystoŭvajučy kamputarnaje madelavańnie, kamanda navukoŭcaŭ padličyła, što asteroid prabiŭ kiłamietrovaje ledzianoje pokryva Ziamli. U atmaśfieru mahła trapić vialikaja kolkaść vadzianoj pary, parnikovych hazaŭ.

Heta mahło dapamahčy paciapleńniu płaniety ŭ Praterazojskuju eru — etap, kali kisłarod tolki źjaviŭsia ŭ atmaśfiery, a składanyja formy žyćcia jašče nie byli pašyranyja.

U toj ža čas inšaja teoryja pryčyny paciapleńnia ŭ tuju epochu zaklučajecca ŭ tym, što bujnyja vyviaržeńni vułkanaŭ mahli vykinuć vialikuju kolkaść vuhlakisłaha hazu ŭ atmaśfieru.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?