Užo dastatkova praciahły čas isnuje płatforma pa pošuku žylla ŭ Minsku dla arendy i kupli biez ahientaŭ. Nazyvajecca jana Flatty. U ich jość svaje kanały ŭ telehramie, staronka Ukantakcie, a taksama mabilnaja prahrama.
Adzin z karystalnikaŭ pastaviŭ prahramie «adzinku» (minimalnaja adznaka pry maksimalnaj «piaciorcy»).
Pry hetym jon pakinuŭ kamientar: «Dadajcie, kali łaska, biełaruskuju movu». Adkaz ad Flatty byŭ dastatkova chutkim: «Naš prahramist zrobić heta za dva rabočyja dni. Hadzina jahonaj pracy kaštuje 40 rubloŭ. Zadońcie (achviarujcie — Red.) na Jandeks.Hrošy sumu, ekvivalentnuju 640 rublam, i tady zrobim».
Adkaz pradstaŭnikoŭ prajekta aburyŭ niekatorych biełaruskamoŭnych i spačuvajučych karystalnikaŭ. U vyniku ludzi pačali zachodzić u Google Play, kab pastavić prahramie minimalnuju adznaku. Na siońnia jana ŭžo ŭpała amal da «trojki». U kamientach ludzi prosiać biełaruskuju viersiju.
«Nabiehli śviadomyja i pastavili 100+ adzinak. Upeŭnieny, što 99,9% pra hetu prahramu navat nie čuli. Sabaka breša, a karavan idzie», — dastatkova ŭ pravakacyjnaj formie napisaŭ adzin sa stvaralnikaŭ prahramy ŭ tvitary.
«NN» źviarnułasia da chłopcaŭ z Flatty, kab tyja patłumačyli sutnaść situacyi i što źbirajucca rabić dalej.
«Naša Niva»: Kali raspracoŭvali prahramu, to zusim nie dumali pra biełaruskamoŭnuju viersiju?
Flatty: Isnujom u farmacie telehram-kanała ŭžo paŭtara hoda, vyraśli da 24 000 padpisčykaŭ pa sarafannym radyjo, i za hety čas nie było ni razu narakańniaŭ z boku aŭdytoryi na toje, što ŭsio na rasiejskaj. Dla zvarotnaj suviazi my adkrytyja, jak bačycie. Pakul rabili dadatak (heta pieršy dośvied dla nas u hetaj śfiery), było mnostva inšych prablem techničnaha charaktaru, tut varta pryznać pieršapačatkovuju pamyłku, zakładzienuju ŭ architekturu.
«NN»: Jakoje ŭvohule piersanalnaje staŭleńnie ŭ stvaralnikaŭ prahramy da biełaruskaj movy?
Flatty: Heta naša rodnaja mova, nie razmaŭlajem na joj štodnia, na žal, ale pavažajem jak kulturnuju kaštoŭnaść.
«NN»: U vas niama mahčymaści zrabić prahramu zadarma, tolki za hrošy?
Flatty: Heta naša chobi, usie žadańni karystalnikaŭ realizujucca biaspłatna i biez prablem. Na fonie prablem z iOS-naj častkaj (tam nie pracavali paviedamleńni)
my sarvalisia na čałavieka, jaki pryjšoŭ i pastaviŭ adzin bał prahramie za adsutnaść movy. Ale i vy pavinny razumieć, što lubaja vykananaja praca pavinna być čymści ŭznaharodžanaja.
I nieabaviazkova heta pavinien być hrašovy ekvivalent. «Adzinka» była ŭspryniataja nami zanadta blizka da serca. U čałavieka inšyja pryjarytety akazalisia.
«NN»: Kali była b mahčymaść adkazać na hetuju prapanovu jašče raz, to vy b adkazali hetaksama?
Flatty: Dumaju, tak. Ci było heta dla nas urokam? Tak, było. Ale pasył u kamientary zastaŭsia b tym ža. I naš adkaz, niezaležna ad taho, jak jon moh by być napisany, byŭ by ŭspryniaty tak, jak jaho zachacieli b uspryniać.
«NN»: Jak dumajecie papravić sabie rejtynh?
Flatty: Karystalniki, jakich usio zadavalniaje i im usio padabajecca, sami zrobiać z časam heta. A takich niamała nasamreč. My heta robim nie dziela rejtynhaŭ, a kab dapamahčy ludziam.
«NN»: Ci nie sapsuje takaja kolkaść nizkich adznak vaš biznes?
Flatty: Heta nie biznes. Vielmi hučna było b tak nazyvać prahramu, jakaja robicca viečaram dvuma ludźmi, jakija siadziać za kuchannym stałom. Kolkaść adzinak źnižaje matyvacyju zajmacca i raźvivać prajekt u budučyni.
«NN»: Ci nie ličycie, što sutyknulisia z ckavańniem vašaha prajektu?
Flatty: Upeŭnienyja, što pieravažnaja častka ludziej, jakija pastavili «adzinki» i vodhuki pra biełaruskuju movu, navat nie viedajuć pra funkcyi prahramy i nikoli nie čuli pra jaje. Tak, jość rečy, nad jakimi nam jašče varta papracavać, za jakija možna było b atrymać nizkuju adznaku. Tak, raspracoŭščyk moh by adkazać i miakčej. Ale, prabačcie, stavić «adzinki» prosta za kampaniju?
