U apošni dzień studzienia internet-vydańnie naviny.by padviało vyniki tradycyjnaha apytańnia «Biełarus 2019 hoda». Pieramožcam sioleta staŭ palityk, sustaršynia BCHD Pavieł Sieviaryniec. Darečy, heta supała ź mierkavańniem redakcyi «Našaj Nivy», jakaja nazvała ludźmi hoda Paŭła i Hannu Sieviaryncaŭ.
Pavieł Sieviaryniec. Fota Nadziei Bužan.
U apytańni «Navinaŭ» udzieł uziali bolš za piaćdziasiat ekśpiertaŭ. Cikava pahladzieć, jak raźmiarkoŭvalisia hałasy, chto za kaho hałasavaŭ i jak tłumačyli ŭłasny vybar.
Nobieleŭskaja łaŭreatka Śviatłana Aleksijevič pastaviła na pieršy radok vydaŭca dziciačych knižak, pierakładčycu sa šviedskaj movy Nadzieju Kandrusievič-Šydłoŭskuju. Na druhoje — mastačku Zoju Litvinavu, na treciaje — fieministku Irynu Sałamacinu.
Były redaktar sajta onliner.by, miedyjaekśpiert Dzianis Blišč nazvaŭ biełarusam hoda Kastusia Kalinoŭskaha. «Z matyvacyjaj, dumaju, usio jasna», — adznačyŭ jon. Druhoje miesca ad Blišča dastałosia Maksu Karžu, jaki sabraŭ stadyjon «Dynama», a treciaje — Maryi Vasilevič, bo «pryhožaja».
Redaktar časopisu Arche fiłosaf Valer Bułhakaŭ adznačyŭ historyka, deputata parłamienta Ihara Marzaluka, bo 2019 byŭ dla jaho «hodam hałavakružnych pośpiechaŭ». Druhoje miesca ad fiłosafa dastałosia Paŭłu Sieviaryncu, ale nie za akcyi ŭ abaronu niezaležnaści, a za skandał u PEN-Centry.
Kaardynatarka «Latučaha ŭniviersiteta» Taćciana Vadałažskaja ŭbačyła vartym svajho rejtynhu tolki mietadołaha Uładzimira Mackieviča, jaki «danosić da hramadstva pahrozy i nie baicca być śmiešnym ci pamylicca».
Piśmieńnik Adam Hłobus u svaim top-3 nazvaŭ tolki žančyn: pieršaje miesca jon addaŭ Taćcianie Niadbaj, jakaja «nie dała razvalicca PEN-Centru», druhoje — Volzie Kavalkovaj, jakaja «svajoj žanockaściu prasoŭvała pravyja idei bolš paśpiachova za mužykoŭ», treciaje — Taćcianie Karatkievič.
Pradprymalnik i hramadski aktyvist Źmicier Daškievič tak raźmierkavaŭ hałasy: 1) Hanna Sieviaryniec; 2) Hanna i Viktar Šapućki, za abaronu Kurapataŭ; 3) praciŭniki akumulatarnaha zavoda ŭ Breście.
Kiraŭnik fiederacyi lohkaj atletyki Vadzim Dzieviatoŭski nazvaŭ Łukašenku, bo navat «tyja, chto ŭ hłybokaj apazicyi, razumiejuć, što kraina zastajecca niezaležnaj dziakujučy jamu». A voś na druhoje miesca Dzieviatoŭski pastaviŭ Uładzimira Karatkieviča. «Karatkievič dapamahaje nam adčuvać našu samadastatkovaść i šanavać našyja kaštoŭnaści», — skazaŭ spartsmien.
Cikavaje spałučeńnie atrymałasia ŭ Kaciaryny Dubinskaj, redaktarki «Viačerniaha Minska». Na pieršaje miesca ŭ jaje trapiŭ Kastuś Kalinoŭski, a na druhoje — Michaił Miaśnikovič. Voś i dumaj, što chočaš.
Hałoŭny redaktar «Presboła» Siarhiej Kajko adznačyŭ praciŭnikaŭ akumulatarnaha zavoda. A režysior Andrej Kurejčyk pastaviŭ na Alaksandra Łukašenku jak niečakanaha zmahara za niezaležnaść Biełarusi. Praŭda, naprykancy svajho adkazu pastaviŭ smajlik.
Kiraŭnik Biełaruskaj słužby radyjo «Svaboda» Alaksandr Łukašuk paśla Kalinoŭskaha i Sieviarynca niečakana adznačyŭ pres-sakratara MZS Anatola Hłaza, jaki letaś dastatkova niedypłamatyčna adkazvaŭ pasłu Rasii Michaiłu Babiču.
Pravaabaronca-viasnoviec Valancin Stefanovič adznačyŭ udzielnicu parłamienckich vybaraŭ Ałanu Hiebramaryjam.
«Natalla Kačanava — pieršaja žančyna, jakaja ŭznačaliła Saviet Respubliki. Heta vialikaje dasiahnieńnie», — patłumačyŭ svoj vybar Mikałaj Čarhiniec, kiraŭnik dziaržaŭnaha Sajuza piśmieńnikaŭ. Staršynia Paralimpijskaha kamiteta Aleh Šepiel taksama nazvaŭ Natallu Kačanavu, ale jašče za pracu ŭ Administracyi prezidenta.
Narešcie Stanisłaŭ Šuškievič nazvaŭ tolki proźvišča Paŭła Sieviarynca. Cikava, čamu nie Siarhieja Čeračnia, jakomu pieradaŭ svaju partyju.
