Kab zrabić dziaržaŭny hierb «bolš sučasnym», dadaduć załatoha koleru, a zorku zrobiać «mienš militarysckaj», piša «Radyjo Svaboda».
Raspracoŭvała prajekt zakonu ab źmienach u zakon ab dziaržaŭnych symbalach Ministerstva justycyi. Tam karespandentu Svabody paviedamili, što prapanujucca «niaznačna adredahavanyja» etalonnyja vyjavy dziaržaŭnaha hierba ŭ adnym, dvuch i mnohich kolerach.
Nad źmienami ŭ vyjavie hierba, jakija ŭ ministerstvie nazyvajuć «techničnymi», pracavała hieraldyčnaja rada pry prezydencie Biełarusi.
U vierchniaj častcy hierba padkarektavana vyjava zorki, jana pradstaŭlena ŭ płoskasnym varyjancie z konturnaj abvodkaj, i krai promniaŭ majuć niaznačny nachił, tam mianiajecca hradyjent.
Heta robicca dziela taho, kab vyjava hierba była bolš abjomnaja. Ciapier usio čaściej kažuć pra 3D-vyjavu, i treba, kab hierb hladzieŭsia jašče pryhažej», — skazali ŭ pres-słužbie ministerstva.
- Madelavańnie formy kałasoŭ u pravaj i levaj častkach pryviedziena ŭ dekaratyŭnym varyjancie.
- Źmianilisia kancy aściukoŭ, vyjavy kvietak kaniušyny i lonu stali bolš abjomnymi.
- Udakładniena vyjava stylizavanaha konturu terytoryi dziaržavy.
- Vyjavy macierykoŭ stali bolš vyraznymi i hieahrafična vyvieranymi.
- Sietki paralelaŭ i merydyjanaŭ nia buduć jarka vyjaŭlenymi, stanuć tančejšymi.
- Bolš vyraznym budzie mastackaje rašeńnie stužki z nadpisam «Respublika Biełaruś».
Etalonny na siońnia dziaržaŭny hierb
Padstavaj dla źmienaŭ stali prapanovy hramadzian.
«Mienavita ad hramadzian hučała prapanova źmianić hrani zorki, bo ŭ papiarednim varyjancie hrani vielmi vyraznyja, i byŭ niejki militaryscki charaktar, jak u vajskovaj zorki. Dyk voś ad hetaha adyšli, zorka stała bolš abjomnaj. I taksama mnohim nie padabalisia linii merydyjanaŭ, tamu jany stali śviatlejšymi. U vyniku ciapierašni standart staŭ bolš technična daskanałym», — skazali ŭ pres-słužbie.
Akramia taho, zialony kontur Biełarusi zamianili na załaty, kab jon lepš spałučaŭsia z soniečnymi promniami.
U Ministerstvie justycyi patłumačyli, što kankretnyja terminy zamieny staroha hierbu na abnoŭleny va ŭstanovach nia vyznačanyja. «Da etalonu my pryjdziem paetapna, pastupova. Nia treba budzie imhnienna vydzialać finansavyja srodki dla zamieny», — skazali ŭ ministerstvie.
Deputat pałaty pradstaŭnikoŭ Viktar Śviła skazaŭ karespandentu Svabody, što zamiena aficyjnaha hierba ź zialonym konturam na hierb z załatym konturam budzie adbyvacca pastupova, i heta nie zapatrabuje dadatkovych srodkaŭ ź biudžetu.
«Kaštavać nia budzie nikolki, bo źmiest našych symbalaŭ nie mianiajecca. U zakonaprajekcie praduhledžany pierachodny peryjad. Jon nie vymušaje ŭłaśnikaŭ tracić niejkija srodki na ich zamienu prosta ciapier, adrazu jak budzie pryniaty hety zakon. Naohuł, biudžet nie paniasie vydatkaŭ», — skazaŭ deputat.
Aŭtaram ciapierašniaha hierba Biełarusi raniej nazyvaŭ siabie Leanid Sinicyn, jaki ŭ 1995 hodzie byŭ kiraŭnikom administracyi prezydenta. Jon skazaŭ, što malavaŭ eskiz, jaki dapracavaŭ mastak. Dahetul niama peŭnaści, chto z mastakoŭ davioŭ spravu da kanca, zrabiŭ kalarovaje afarmleńnie. Chadzili čutki, što hierb damaloŭvaŭ syn narodnaha mastaka Michaiła Savickaha Andrej.
Aŭtar «zorački» na hierbie, jak śćviardžaŭ Sinicyn, — Ivan Ciciankoŭ, były kiraŭnik spraŭ prezydenta.
