Pryhody supołki «Žyvych čałaviekaŭ» praciahvajucca. Niadaŭna adnaho z adeptaŭ hetaha ruchu zatrymlivali na miažy z Polščaj.
A trochi raniej jašče adnaho «žyvoha čałavieka» pasadzili na sutki — jon pakazaŭ milicyi «paśviedčańnie kiroŭcy SSSR novaha ŭzoru».
Pačałosia ŭsio 1 lutaha: na ŭjeździe ŭ Homiel DAI spyniła aŭtamabili ŭdzielnikaŭ prajekta «Varta». Zacikavilisia piersanalna adnym z kiroŭcaŭ — Alaksiejem Jelisiejevym.
Alaksiej Jelisiejeŭ. Fota Radyjo Svaboda
«Milicejskich mašyn było niekalki. Aŭto, u jakim byŭ Jelisiejeŭ, naležała siabru Alaksieja. Dakumienty jon nie pakazvaŭ, ale ich i nie prasili, jamu zahadali vyjści z aŭtamabila. Jamu prapanavali prajechać u milicyju. Kazali, što ŭ Alaksieja niama paśviedčańnia kiroŭcy.
Na heta Jelisiejeŭ adkazaŭ, što paśviedčańnie ŭ jaho jość. Ale heta «paśviedčańnie Savieckaha Sajuza novaha ŭzoru», — raspaviali siabry Alaksieja na kanale błohiera Siarhieja Cichanoŭskaha.
Tut treba patłumačyć, chto taki Jelisiejeŭ i što za dakumienty «Savieckaha Sajuza novaha ŭzoru».
Alaksieju Jelisiejevu 39 hadoŭ. Farmalna jon pradprymalnik — ale ŭžo dva hady Jelisiejeŭ pryncypova nie płacić padatki i nie robić adličeńni ŭ FSAN, a taksama ihnaruje ŭsie dziaržaŭnyja dakumienty. Robić heta tamu, što ličyć siabie nie biełarusam, a «žyvym čałaviekam» i adnym z «hramadzianaŭ BSSR».
Jaho žonka Volha ličyć siabie traŭnicaj, «ekśpiertam pa stvareńniu abiarežnaj vopratki» i «instruktaram padrychtoŭki da naturalnych rodaŭ».
U Jelisiejevych šaściora dziaciej (sa słavianskimi imionami kštałtu Radamir, Dabrasłaŭ, Łučazar) i kuča daŭhoŭ: u 2019 hodzie paviedamlałasia, što na Alaksieja zaviali 20 vytvorčaściaŭ, na jaho žonku — 8. Taksama Alaksiej byŭ asudžany na 4 hady «chatniaj chimii» za niaspłatu padatkaŭ. U vieraśni minułaha hoda da siamji ŭžo prychodzili aryštoŭvać majomaść. «Tolki pa adnoj vykanaŭčaj vytvorčaści Jelisiejeŭ pavinien pakryć bolš za 189 tysiač rubloŭ škody dziaržavie, u dadatak u muža i žonki jość zapazyčanaści pa kredytach», — pisaŭ progomel.by.
Ale takija drobiazi siamja Jelisiejevych ihnaruje.
Alaksiej spačatku zachapiŭsia rucham tak zvanych «anastasijeŭcaŭ», ci «Źviniačych kiedraŭ Rasii». «Anastasijeŭcy» — ludzi, jakija načytalisia ramanaŭ rasijca Uładzimira Puzakova (Miehre) i pačali budavać radavyja siadziby, vieryć u sumieś pahanstva i tannaj fantastyki, zachaplacca vydumanymi psieŭdasłavianskimi tradycyjami.
Ale pastupova Jelisiejeŭ uśviadomiŭ siabie jašče i «žyvym čałaviekam». Heta abjadnańnie ludziej, jakija ličać siabie nie hramadzianami Biełarusi, a ci hramadzianami BSSR, ci prosta «žyvymi čałaviekami». Ich pazicyja: Biełaruś nie atrymała adpaviednyja akty ab likvidacyi SSSR, tamu ŭsio navokał niezakonnaje. «Žyvyja čałavieki» teraryzujuć čynoŭnikaŭ, a adzin z adeptaŭ ruchu navat pasprabavaŭ pravieści «hramadzianski aryšt» prakurorki, za što adpraviŭsia na 2 hady ŭ kałoniju.
Prajekt «Varta», siabram jakoha i źjaŭlajecca Jelisiejeŭ, i kancentruje ŭ sabie voś takich «žyvych čałaviekaŭ».
«Čałavieki» ihnarujuć biełaruskija pašparty, zamiest ich vydajuć sami sabie dakumienty, paśviedčańni kiroŭcaŭ, navat aŭtamabilnyja numary. Usie hetyja «dakumienty» jany drukujuć niedzie ŭ Maskvie.
Mienavita taki «dakumient» Jelisiejeŭ i pakazaŭ daišnikam. Biełaruskaje paśviedčańnie kiroŭcy ŭ Jelisiejeva skončyłasia. Pa słovach jaho siabroŭ, «atrymać novaje jon nie moža, bo nie pryznaje pašpart Respubliki Biełaruś».
1 lutaha milicyjanty zabrali Jelisiejeva, advieźli ŭ RAUS. Pasadzili ŭ izalatar, abvinavacili ŭ tym, što jon kiravaŭ mašynaj nie majučy pravoŭ, a taksama ŭ niepadparadkavańni supracoŭnikam milicyi. Heta była subota, vychodnyja Jelisiejeŭ prasiadzieŭ pad vartaj. Dniami adbyŭsia sud, Jelisiejeŭ atrymaŭ 20 sutak aryštu.
Jelisiejeva pakarali za ŭdzieł u «žyvych čałaviekach» i hramadska-palityčny aktyvizm, ličać jaho siabry. «Varta» vyłučała svaich kandydataŭ na parłamienckich vybarach, Jelisiejeŭ prymaŭ aktyŭny ŭdzieł u hetym, byŭ kiraŭnikom inicyjatyŭnaj hrupy adnaho z kandydataŭ.
Ciapier Alaksiejeŭ praciahvaje znachodzicca pad vartaj. Žonka Volha kaža, što jany pišuć adno adnomu listy. Padrabiazna pra spravy siamji i pradprymalnictva Alaksieja jana raskazvać nie zachacieła: «Spytajcie lepš u muža, kali jon vyjdzie». Ale jaho «hramadzianstva BSSR» Volha nibyta padzialaje. «My ŭ siamji muža va ŭsim padtrymlivajem», — tłumačyć jana.
