Karać zmohuć taksama za «dyskryminacyju instytutu siamji». Unieści źmieny płanujuć u novaj redakcyi Kryminalnaha kodeksu, piša Radyjo Svaboda.
U redakcyju Svabody trapiŭ adkaz Ministerstva achovy zdaroŭja na kalektyŭny zvarot hramadzian, datyčny pytańniaŭ supraćstajańnia chatniamu hvałtu. List padpisany pieršym namieśnikam ministra Dźmitryjem Pinievičam.
U im havorycca, što Ministerstva achovy zdaroŭja «vystupaje za prapahandu tradycyjnych siamiejnych kaštoŭnaściaŭ i padtrymała nastupnyja prapanovy ŭ miežach prajektu zakona «Ab źmienach kodeksaŭ u pytańniach administracyjnaj i kryminalnaj adkaznaści», u tym liku ŭviadzieńnie kryminalnaj i administracyjnaj adkaznaści za raspaŭsiudžańnie infarmacyi, jakaja dyskredytuje instytut siamji i šlubna-siamiejnyja adnosiny. A taksama vystupaje za pavyšeńnie z 16 da 18 hadoŭ uzrostu, da nastupleńnia jakoha pałavyja znosiny i inšyja dziejańni seksualnaha charaktaru ź niepaŭnaletnim taho ž połu karajucca ŭ adpaviednaści z kryminalnym zakanadaŭstvam (artykuł 168)».
Pra toje, što ŭ Biełarusi płanujucca źmieny ŭ Administracyjny i Kryminalny kodeksy, stała viadoma na pačatku lutaha. Pierahledzieć asobnyja ich normy Pałacie pradstaŭnikoŭ i Savietu Respubliki daručyŭ asabista Alaksandar Łukašenka.
Svaboda źviarnułasia pa kamientar u Ministerstva achovy zdaroŭja. Tam paprasili dasłać aficyjny zapyt i paabiacali adkazać na jaho ŭ karotki termin.
Pravaabaronca: heta nie śfiera dziejnaści Ministerstva zdaroŭja
«Ja spadziajusia, što ŭ nas da takoha nie dojdzie, — prakamientavaŭ Svabodzie mahčymyja pieramieny kryminalnaha zakanadaŭstva staršynia Biełaruskaha Chielsinskaha kamiteta Aleh Hułak. — Kali Minzdaroŭja pačynaje apiekavacca niejkimi kaštoŭnaściami, uvohule niejkimi kaštoŭnaściami, akramia kaštoŭnaści zdaroŭja, to ŭźnikaje pytańnie, ci na svaim miescy hetyja ludzi? Čym jany zajmajucca i za što jany atrymlivajuć zarobki?
Pytańnie kryminalizacyi, ź jakoha ŭzrostu i za što, heta nie śfiera dziejnaści Minzdaroŭja. Jany mahli b vykazacca pra navukovyja daśledavańni. Pra toje, u jakim uzroście čałaviek adkazny za svaje ŭčynki, kali ad jaho možna čakać takoj adkaznaści. Nie bačačy hetych prapanovaŭ całkam, dastatkova składana kamientavać. Asabliva ŭ kantekście suviazi z tradycyjnymi kaštoŭnaściami. Tut, ja dumaju, toj vypadak, kali ŭłady ličać, što kali niešta zabaranić, to jano źniknie. Heta niejkaja dziciačaja naiŭnaść, pamnožanaja na adsutnaść pravavoj łohiki, i ŭpeŭnienaść u svajoj uładzie».
Što takoje uzrost seksualnaj zhody
Paniaćcie ŭzrostu seksualnaj zhody vychodzić z kryminalnaha prava i vyznačajecca ŭ bolšaści krain śvietu. Jano aznačaje ŭzrost asoby, ź jakoha jana zdolnaja dać asensavanuju zhodu na seksualny kantakt ź inšym čałaviekam. U Biełarusi, jak i ŭ pieravažnaj bolšaści krain śvietu, uzrost seksualnaj zhody pačynajecca z 16 hadoŭ. U značnaj kolkaści krain, u tym liku krain ES, jon pačynajecca z 14 hadoŭ. Siarod ich Hiermanija, Italija, Sierbija, Kitaj. Z 15 hadoŭ pačynajecca ŭzrost zhody ŭ Polščy, Čechii, Francyi. Najmienšy praduhledžany ŭ Jemienie (9 hadoŭ), najbolšy — u Tunisie (20).
Siesija Pałaty pradstaŭnikoŭ, na jakoj mohuć prahałasavać za budučyja źmieny ŭ Kryminalny i Administracyjny kodeksy, pačniecca ŭ krasaviku.
