Alaksandr Łukašenka pravioŭ siońnia naradu pa pytańniach nafty. Biahučuju situacyju kiraŭnik krainy nazvaŭ navat u čymści karysnaj, piša BiełTA.

«My nieapraŭdana zacyklilisia na niekalkich pastaŭščykach i nie majem doŭhaterminovych alternatyŭnych krynic syraviny».

«Nafta — nie manapolny tavar, i achvotnych pracavać z nami dastatkova navat u samoj Rasii. Pastaŭščykoŭ treba znachodzić, ź imi treba damaŭlacca. I heta zadača numar adzin. Asabliva ŭ ciapierašniaj niaprostaj situacyi, u tym liku z našym partnioram-manapalistam», — zajaviŭ kiraŭnik dziaržavy.

Łukašenka adznačyŭ, što, jak paviedamlaje sam rasijski bok, jaho pastaŭki nafty ŭ Kitaj skaracilisia na tracinu. «Nie tolki ŭ Kitaj. Nafta siońnia imhnienna tańnieje. I ŭ takoj situacyi heta hraje nam na karyść i padšturchoŭvaje nas da taho, kab my mahli damovicca z pastaŭščykami. Nie tolki ŭ Rasii, ale i z alternatyŭnymi», — skazaŭ Alaksandr Łukašenka.

Jon padkreśliŭ, što Biełaruś pry hetym nie stavić pytańnie tak, što nie budzie kuplać rasijskuju naftu.

«Budziem. Bo hetaja nafta, jaje zdabyča i transparciroŭka stvaralisia ŭ tym liku rukami biełarusaŭ — tych pakaleńniaŭ, za jakimi my z vami pryjšli. I łahistyka tut samaja zručnaja. Ale my, viadoma ž, nie budziem pastajanna poŭzać na kaleniach 31 śniežnia, vymolvajučy hetuju naftu. i kali źniknie manapalizm, lahčej budzie damaŭlacca i pa cenach», — adznačyŭ kiraŭnik dziaržavy.

Jon paprasiŭ udzielnikaŭ narady dałažyć, jakija vyniki ŭžo dasiahnuty ŭ hetym napramku i jakija jość pierśpiektyvy.

Zakranuŭ siońnia Łukašenka i pytańnie łahistyki dastaŭki.

«Nieabchodnyja kompleksnyja i sistemnyja infrastrukturnyja rašeńni. Varta pradumać mahčymaść realizacyi sumiesnych prajektaŭ z zamiežnymi kampanijami — ułaśnikami syraviny».

«Čas kančatkova pryniać toj fakt, što ŭ enierhietyčnych pytańniach varta raźličvać tolki na siabie, a ŭ krytyčny momant navat najbližejšy partnior budzie kiravacca tolki łohikaj ułasnych intaresaŭ», — dadaŭ kiraŭnik krainy.

Alaksandr Łukašenka adznačyŭ, što ŭ Biełarusi jość dva bujnyja i raźvityja pradpryjemstvy pa pierapracoŭcy nafty: zavody ŭ Navapołacku i ​​Mazyry, jakija vypuskajuć jakasnuju i kankurentazdolnuju pradukcyju, jakaja zapatrabavana na źniešnich rynkach. 

Z ulikam ich raźmiaščeńnia kiraŭnik dziaržavy nahadaŭ pra zadaču pa dyviersifikacyi pastavak i mahčymych maršrutach. Adzin ź ich — praz Ukrainu pa naftapravodzie Adesa — Brody, druhi — praz party na Bałtycy.

«Rynak jość, dobry rynak, blizkija rynki. Ale patrebna łahistyka. My taksama za apošnija miesiacy mnohaje prapracavali pa pastaŭkach nafty. Ja ŭžo skazaŭ, što kala 40%, moža być, 50% budziem pa-raniejšamu kuplać naftu ŭ Rasii (kali Rasija zachoča), kali kančatkova dyviersifikujem. A pa 30% možam kuplać z partoŭ Bałtyki i z Adesy.

Heta buduć try krynicy. My całkam pa pastaŭkach nafty možam dyviersifikavacca», — zajaviŭ kiraŭnik dziaržavy.

U płanie pastavak z bałtyjskaha napramku Łukašenka ŭpeŭnieny ŭ mahčymaści vyrašyć pytańnie z palapšeńniem łahistyki, u pieršuju čarhu pa pastaŭcy trubapravodnym transpartam.

«Heta ž nie prablema pabudavać. Tam, darečy, jość para trub, jakija b nas zadavolili, kali b my ich daviali da ładu i damovilisia z bałtyjskimi dziaržavami pa hetych trubach», — skazaŭ biełaruski kiraŭnik.

Jon taksama nahadaŭ, što byli vielmi surjoznyja zajavy i namiery z boku ZŠA.

«Ź dziaržsakratarom ja na hetuju temu razmaŭlaŭ —dapamahčy nam ź infrastrukturaj i pastaŭkami nafty. Pampiea sam prapanavaŭ pa kankurentnych cenach hetuju naftu. I na miunchienskaj kanfierencyi była zajava: jany vydzielili $ 1 młrd dla budaŭnictva abjektaŭ łahistyki, heta značyć dla pastaŭki nafty, — skazaŭ Alaksandr Łukašenka.

— U tym liku my možam raźličvać, što atrymajem ad ich zusim tannyja kredyty na budaŭnictva toj ža niaščasnaj truby z Bałtyki. Dzieści nam treba para pieramyčak, jakija ŭrad raźličvaje budavać až try hady. Nie budzie hetaha. Paŭtara-dva hoda, nie bolš! I $ 100-120 młn my sami znojdziem na hetyja pieramyčki».

«Tamu treba prosta varušycca», — padkreśliŭ biełaruski lidar.

Łukašenka: Asobnyja dziaržavy zrazumieli karyść vientyla na trubie. I heta nie tolki Rasija

Łukašenka: Biełaruś nie stavić pytańnie, što nie budzie kuplać rasijskuju naftu. Budziem

Клас
Панылы сорам
Ха-ха
Ого
Сумна
Абуральна