Unačy 14 sakavika na vulicy Tałstoha zakryjuć darohu dla ruchu transpartu pad puciepravodam praśpiekta Niezaležnaści: kamunalniki pačnuć budaŭnictva estakady. Pra heta Auto.tut.by paviedamiŭ zakazčyk rabot HP «Hardarbud».

Zapłanavanaja prajektam estakada ŭvachodzić u pieršaje haradskoje transpartnaje kalco, nad zaviaršalnaj, treciaj čarhoj jakoha ciapier pracujuć kamunalniki.

Budaŭnictva estakady źmianiaje ŭ hetym miescy schiemu ruchu transpartu. Z 14 sakavika, kab z vulicy Tałstoha patrapić na Maskoŭskuju i praśpiekt Niezaležnaści, kiroŭcam treba budzie, nie dajazdžajučy da puciepravoda, pavaročvać u prajezd naleva (ciapier jon z adnabakovym rucham). Paśla prajezdu ruch buduć rehulavać śviatłafory. Adtul aŭtamabili zmohuć prajazdžać u abodva baki Maskoŭskaj i na hałoŭny praśpiekt stalicy.

Pry ruchu z Maskoŭskaj na Tałstoha (kali jechać z boku stancyi mietro «Instytut kultury») ničoha nie mianiajecca. Ale kali vam treba prajechać z Maskoŭskaj da płoščy Miaśnikova, to pryjdziecca pakrucicca: naprykład, vyskačyć na Tałstoha, prajechać da Družnaj i nazad.

— Kab prapuskać bolš transpartu, darohu prajezdu kala Tałstoha my pašyryli. Ale kiroŭcam treba razumieć, što ŭ hadzinu pik ruch tut moža być uskładnieny, tamu varta zahadzia płanavać svaje pajezdki, — papiaredžvaje Alaksandr Jarošyk, dyrektar HP «Hardarbud». — Hramadski transpart budzie tam jeździć z ulikam źmienienaj schiemy ruchu.

Dla budaŭnictva estakady kamunalnikam treba vykanać vialiki abjom rabot: panizić prajeznuju častku, prakłaści novy ŭčastak darohi, pamianiać kanalizacyju, pieranieści inžyniernyja sietki. U vyniku atrymajecca raźviazka ŭ vyhladzie piatli, jakaja daść mahčymaść transpartu pavaročvać z Tałstoha naleva i naprava. Adrezak vulicy Tałstoha pašyrać da troch pałos u kožnym kirunku.

Praca pad puciepravodam na Niezaležnaści pavinna zaviaršycca ŭ žniŭni hetaha hoda — transpart pajedzie pa raniejšaj schiemie. A voś novaj estakadaj možna budzie skarystacca, tolki kali pieršaje haradskoje kalco złučać — u 2021 hodzie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?