Fota ria.ru
U Dziarždumie abviaścili pierapynak dla praviadzieńnia kansultacyj z prezidentam Rasii Uładzimiram Pucinym paśla taho, jak deputat Valancina Cieraškova prapanavała źmianić Kanstytucyju tak, kab dać kiraŭniku krainy mahčymaść uziać udzieł u vybarach 2024 hoda, piša RBK.
Vystupajučy na pasiadžeńni Dziarždumy, Cieraškova (člen frakcyi «Adzinaja Rasija») zajaviła, što ŭ toj situacyi, u jakoj zaraz apynułasia Rasija, isnujuć «ryzyki niepradkazalnaści» i «treba praduhledzieć nadziejnuju strachoŭku».
«I takoj strachoŭkaj, ja ŭpeŭnienaja na 100%, moža być mocnaja prezidenckaja ŭłada i maralny aŭtarytet lidara, jaki zajmaje hetuju pasadu. Tamu ŭsie varyjanty mahčymych źmianieńniaŭ, jakija zaraz abmiarkoŭvajucca ŭ hramadstvie, heta razmovy pra Uładzimira Uładzimiraviča Pucina. I niama čaho tut chitravać i mudravać, ludziej chvaluje i navat tryvožyć, što budzie paśla 2024 hoda», — skazała Cieraškova.
Deputat adznačyła, što Pucin — heta toj čałaviek, na jakoha ludzi pryvykli raźličvać i spadziavacca, i vykazała ŭpeŭnienaść u tym, što heta razumiejuć usie deputaty Dziarždumy.
«Pytańnie na samoj spravie nie pra jaho, a pra nas, hramadzian Rasii i ich budučyniu. A kali tak, to navošta krucić i mudravać, navošta haradzić niejkija štučnyja kanstrukcyi? Treba ŭsio sumlenna, publična, adkryta praduhledzieć. Ci ŭvohule prybrać abmiežavańnie pa kolkaści prezidenckich terminaŭ u Kanstytucyi, abo, kali hetaha zapatrabuje situacyja i kali hetaha zachočuć ludzi, zakłaści ŭ zakonie mahčymaść dla dziejučaha prezidenta znoŭ abiracca na hetuju pasadu», — zajaviła Cieraškova.
Słovy deputata byli sustretyja vopleskami. Skončyŭšy plaskać, staršynia Dziarždumy Viačasłaŭ Vałodzin abviaściŭ pierapynak u pasiadžeńni dla kansultacyj. U tym liku i z samim Uładzimiram Pucinym.
Paźniej stała viadoma, što Pucin vyjechaŭ u Dziarždumu, dzie płanuje vystupić a 15-j.
