Šykoŭnaja nieruchomaść u Łondanie, aryštavanaja ŭ minułym hodzie jak «nieabhruntavanaje bahaćcie», akazałasia ŭłasnaściu dački i ŭnuka kazachskaha lidara Nursułtana Nazarbajeva. Ich abaviazali dakazać zakonnaje pachodžańnie bolš za 100 młn dalaraŭ, na jakija kuplenyja dva asabniaki i apartamienty ŭ fiešenebielnych rajonach brytanskaj stalicy, piša BBC.
Asabniak z dobraj achovaj, padziemnym basiejnam i kinateatram na adnoj z samych darahich vulic krainy Bišops-avieniu, dom u prestyžnym rajonie Chajhiejt i vialikaja kvatera ŭ Čełsi byli aryštavanyja pa zapycie brytanskich pravaachoŭnych orhanaŭ viasnoj minułaha hoda. Tady ŭłady paviedamlali, što nieruchomaść źviazana z palityčna zaŭvažnaj fihuraj, ale nie nazyvali ni adrasoŭ, ni imionaŭ.
Bi-bi-si daviedałasia, što heta za damy i chto ŭ ich žyvie, z adkrytych krynic u vyniku sumiesnaha rasśledavańnia z arhanizacyjami Finance Uncovered i «Tranśpierensi Internešnł». U aŭtorak sudździa Vysokaha suda Łondana dazvoliła apublikavać hetuju infarmacyju, nie pryniaŭšy piarečańniaŭ ułaśnikaŭ.
Imi akazalisia Daryha Nazarbajeva, śpikierka sienata Kazachstana i dačka Nursułtana Nazarbajeva, i jaje starejšy syn Nurali Alijeŭ z žonkaj Aidaj. Jany asprečvajuć ŭ sudzie aryšt svajoj nieruchomaści, nabytaj niekalki hadoŭ tamu bolš čym za 100 młn dalaraŭ. Jaje biahučy rynkavy košt moža być našmat vyšejšy.
Aryšt byŭ adnym ź pieršych aktaŭ novaj kampanii, nakiravanaj na baraćbu z admyvańniem sumniŭnych kapitałaŭ praz kuplu damoŭ u Brytanii. Instrumient hetaj baraćby — ordar, jaki dazvalaje kanfiskavać majomaść, kali ŭładalnik nie dakaža, što jana nažyta sumlenna.
