Sajuz jeŭrapiejskich futbolnych asacyjacyj (UEFA) moža pravieści vyrašalnyja stadyi jeŭrakubkaŭ u farmacie «Finału čatyroch». Pra heta paviedamlaje TASS sa spasyłkaj na ispanskaje vydańnie AS.

«Finał čatyroch» praduhledžvaje praviadzieńnie pa adnym paŭfinalnym matčy zamiest sieryj ź dźviuch hulniaŭ i finału na praciahu čatyroch dzion u adnym horadzie.

Miarkujecca, što «Finał čatyroch» Lihi čempijonaŭ projdzie ŭ tureckim Stambule, Lihi Jeŭropy — u polskim Hdańsku (na dadzieny momant u hetych haradach zapłanavana praviadzieńnie finałaŭ sioletnich rozyhryšaŭ jeŭrakubkaŭ). Hetaja miera moža być uviedziena dla skaračeńnia kolkaści hulniaŭ, što daść mahčymaść vykarystoŭvać vyzvalenyja dni dla praviadzieńnia hulniaŭ nacyjanalnych pieršynstvaŭ, prypynienych z-za raspaŭsiudžvańnia karanavirusa.

Nahadajem, što Liha čempijonaŭ była pierapynienaja na stadyi 1/8 finału, užo vyznačany čatyry ŭdzielniki 1/4 finału (francuzski PSŽ, italjanskaja «Atałanta», ispanski «Atletyka», niamiecki «Lajpcyh»). Matčy, što pavinny prajści na nastupnym tydni, admienienyja.

U Lizie Jeŭropy prajšli šeść z vaśmi pieršych matčaŭ 1/8 finału. Abodva turniry taksama byli prypynienyja z-za karanavirusa.

Uviadzieńnie farmatu «Finału čatyroch» budzie abmiarkoŭvacca ŭ aŭtorak na videakanfierencyi, u jakoj voźmuć udzieł pradstaŭniki 55 jeŭrapiejskich asacyjacyj, jakija ŭvachodziać u skład UEFA. Mierapryjemstva budzie pryśviečana abmierkavańniu situacyi z karanavirusam.

Клас
Панылы сорам
Ха-ха
Ого
Сумна
Абуральна