MZS Biełarusi adkazała na «vypad» Kramla pra toje, što miežy zakryli, bo Minsk nie prymaŭ dastatkovych mier dla baraćby z karanavirusam. Adkaz pres-sakratara MZS Anatola Hłaza źmieščany na aficyjnaj staroncy viedamstva ŭ fejsbuku.
«Vy zajavili, što čakajecie poŭnaj aficyjnaj infarmacyi rasijskaha boku adnosna pryniataha rašeńnia pra zakryćcio rasijskaj miažy dla hramadzian Biełarusi. Paśla hetaha pres-słužba ŭrada Rasii raspaŭsiudziła adpaviednaje paviedamleńnie, apublikavanaje rasparadžeńnie ŭrada Rasii. Ci zastalisia jašče pytańni?» — zapytałasia ria.ru.
«Pytańniaŭ, moža być, i mienš, ale asadak, jak havaryŭ viadomy hieroj, zastajecca. Sumna, što rašeńni našych rasijskich siabroŭ u bolšaj miery zasnavanyja na niejkich abstraktnych praporcyjach, čym na realnych źviestkach albo intaresach ludziej. Tym bolš hramadzian krainy, jakaja źjaŭlajecca, jak było skazana ŭčora ŭ Kramli, «našym najbližejšym partnioram i sajuźnikam», — havorycca ŭ adkazie.
«Miarkuju, i ŭ SAAZ ščyra ździviacca śćviardžeńniam rasijskaha boku ab parušeńni Biełaruśsiu ich rekamiendacyj. SAAZ zaklikaje da zhurtavanaści i paśladoŭna zajaŭlaje pra nieefiektyŭnaść abmiežavańniaŭ na pieramiaščeńnie ludziej padčas nadzvyčajnych situacyj u halinie hramadskaj achovy zdaroŭja.
Z samaha pačatku raspaŭsiudžvańnia epidemii my z SAAZ pracujem kruhłasutačna. I niama nivodnaj rekamiendacyi, jakuju b nie vykonvaŭ biełaruski bok. Prynamsi, hetuju pazicyju vykazvaje sama arhanizacyja. Dastatkova pračytać choć by siońniašniuju zajavu krainavaha ofisa SAAZ u Biełarusi», — adznačajecca ŭ paviedamleńni MZS.
Miž inšym, na siońnia ŭstanoŭleny dva vypadki zavozu na terytoryju Biełarusi karanavirusa z Maskvy. Astatnija taksama pryviezieny zvonku. Biełarusy ž pakul nikomu jaho nie ekspartavali. Navat nie chočacca fantazijavać na temu taho, jakija ž pavinny być našy dziejańni, vynikajučy z łohiki rasijskaha boku.
Situacyja nie prostaja, i z epidemijaj možna efiektyŭna zmahacca tolki sumiesnymi namahańniami. Heta ahulny vyklik, nahoda zhurtavacca, sapraŭdnaja pravierka adnosin. 75 hadoŭ tamu my razam abaraniali našu ahulnuju miažu ad źniešniaj pošaści. Na žal, siońnia rasijanaŭ i biełarusaŭ štučna raźmiaščajuć pa roznyja baki», — reziumuje MZS.