Na 88-m sioleta 14 sakavika pajšoŭ z žyćcia architektar Ihar Jeśman, paviedamlajuć «Minsk-Naviny».
Fota Vadzima Zamiroŭskaha, Tut.by
Ihar Ivanavič Jeśman naradziŭsia 1 maja 1932 hoda. Jaho prafiesijnaja dziejnaść u asnoŭnym była źviazana ź instytutam «Minskprajekt», dzie jon pracavaŭ z 1960 pa 1995 hod spačatku hałoŭnym architektaram prajektaŭ, zatym kiraŭnikom majsterni. Adnačasova z 1992 pa 1995 hod byŭ dyrektaram ułasnaj tvorčaj majsterni.
Pa prajektach Ihara Jeśmana uźviedzieny dziasiatki budynkaŭ stalicy. Jon aŭtar haścinicy «Arbita», karpusoŭ linhvistyčnaha univiersiteta, pieduniviersiteta, aktavaj i spartyŭnaj zały instytuta narodnaj haspadarki (ciapier BDEU), a taksama kompleksu internataŭ hetaj VNU z błokami absłuhoŭvańnia, raźmieščanych pa Viełasipiednym zavułku. Pa prajektach I. Jeśmana pabudavany žyłyja damy na Partyzanskim praśpiekcie i Ramanaŭskaj Słabadzie, ekśpierymientalny dziciačy sad-jaśli ŭ mikrarajonie «Sierabranka-6» i inšyja dziciačyja daškolnyja ŭstanovy. U suaŭtarstvie z kalehami stvorany prajekt stancyi mietro «Puškinskaja».
Samaj prykmietnaj rabotaj staŭ 15-y korpus BNTU, zbudavany kala MKAD. Hety budynak časta paraŭnoŭvajuć z karablom abo avijałajnieram. Pa susiedstvie ź im raźmiaściłasia hrupa internataŭ niezvyčajnaj trochkutnaj formy.
— U hetaj rabocie, jak u lusterku, adbilisia ŭsie maje zasmučeńni i radaści, tvorčyja muki i azareńni. Vyklikana heta było vialikaj adkaznaściu pierad takim značnym abjektam i pieršapačatkovaj razhublenaściu pierad abjomam pracy i tymi ŭmovami, jakija mnie nastojliva sprabavali naviazać architekturnyja čynoŭniki. Na žal, realizavana tolki niaznačnaja častka hetaha prajekta, — pisaŭ va ŭłasnaj aŭtabijahrafii I. Jeśman.
