Były palitviazień, kiraŭnik infarmacyjnaj ustanovy «Płatforma» Andrej Bandarenka zajaviŭ, što źbirajecca zasnavać hramadski ruch «u abaronu siamiejnych, relihijnych, maralnych i kulturnych kaštoŭnaściaŭ, jakim pahražaje ŁHBT-prapahanda».
Andrej Bandarenka. Fota belsat.eu.
Što stała nahodaj dla takoha rašeńnia? Bandarenka kaža, što pradstaŭniki ŁHBT-supolnaści dabilisia taho, kab jahonyja dopisy ŭ fejsbuku błakavalisia.
«Ciapier kožnaje błakavańnie budzie supravadžacca mnoj publikacyjaj navukovych daśledavańniaŭ, videafilmaŭ, jakija paćviardžajuć škodu prapahandavanaha ŁHBT ładu žyćcia», — napisaŭ Bandarenka.
Pieršaj spravaj jon vykłaŭ film rasijskaha prapahandysta Arkadzia Mamantava «Sadom».
«Nie mahu vam [pradstaŭnikam ŁHBT-supolnaści] nie padziakavać za toje, što ja, budučy absalutna abyjakavym da vašaj tusoŭki čałaviekam, zmoh uśviadomić, što z vami treba zmahacca ŭsimi srodkami, tut i ciapier. Bo potym budzie pozna», — adznačyŭ pravaabaronca.
«Naša Niva» zadała Andreju Bandarenku niekalki pytańniaŭ.
«NN»: Vy ličycie, što stali «mišeńniu» dla atak z boku ŁHBT-supolnaści. A jak daŭno heta adbyvajecca?
AB: Usio pačałosia dla mianie zusim niečakana. Paśla źbićcia Mikałaja Kupryča aktyvisty pačali kampaniju «Tak, ja taksama pi…r». Jašče nie razumiejučy ŭsioj «adkaznaści», ja vykazaŭ mierkavańnie, što hetaje cyničnaje vykarystańnie banalnaha chulihanstva dla prapahandy ŁHBT — niedapuščalna. Da taho času ja źviartaŭ uvahu na rost kolkaści pazityŭnych artykułaŭ ab ŁHBT u ŚMI, ale nie nadavaŭ hetamu značeńnia i nie vykazvaŭsia publična. A paśla publikacyi na fejsbuku majho staŭleńnia da akcyi na mianie nachłynuła kuča aburanych kamientataraŭ, jakija vinavacili mianie ŭ hamafobii. Pieršapačatkova ja nie zrazumieŭ, u čym sutnaść i čamu mienavita «hamafob»? Ja nie zaklikaŭ, nie patrabavaŭ, nie nastojvaŭ, prosta vykazaŭ svajo staŭleńnie jak hramadzianin. Adnak usie sproby parazumiecca sutykalisia sa ścianoj nieparazumieńnia: albo ty z nami, albo suprać nas. Nu ok, kali pytańnie staić tak, značyć zrobim vybar. Jon akazaŭsia takim, jakim i pavinien być u narmalnaha razvažnaha čałavieka, jaki stavić chryścijanskija, kulturnyja, histaryčnyja i maralnyja pryncypy hramadstva vyšej za imhniennyja zadavalnieńni pierakručanaj «mody».
Čytajcie: Chulihan, jaki źbiŭ minčuka z ŁHBT-kampanii, raskazaŭ, čamu tak atrymałasia
«NN»: Ad kaho mienavita sychodziać hetyja ataki?
AB: Pieršymi aburylisia žurnalisty i pradstaŭniki ŁHBT. Śledam padciahnulisia pravaabaroncy. Maŭlaŭ, jak ža tak, jość ža sistema AAN, ź jaje instytutami i miechanizmami, narmatyŭnyja dakumienty: Statut AAN, Dekłaracyja, Kanviencyi… Hetaja ŭsia sistema źjaŭlajecca vynikam sučasnaj kancepcyi pravoŭ čałavieka.
Ale nichto ŭhołas nie havoryć, što ŭ svoj čas pravaabarončym arhanizacyjam «prapanavali» padpisać pahadnieńnie ab tym, što jany prymajuć tak zvanuju «ŭniviersalnaść pravoŭ čałavieka». Inšymi słovami, ty abiacaješ vykonvać usie pravy, abo narakaj na siabie — padtrymki nie čakaj.
Ale dazvolcie, jak mnie — pravasłaŭnamu čałavieku — pryznać naturalnaść ŁHBT, u tym liku pahadzicca ź ich pravam brać šlub, raspaŭsiudžvać svaje pohlady pad markaj «narmalnaści i naturalnaści»?!
Pa sutnaści, heta adračeńnie ad svajoj viery, kultury, sistemy kaštoŭnaściaŭ. Ja admoviŭsia. Nakolki mnie viadoma ŭ vuzkich kołach našych pravaabaroncaŭ-doŭhažycharoŭ moj demarš vyklikaŭ niezadavolenaść i ŭstojlivaje imknieńnie vyklučyć mianie z puła arhanizacyj, jakija pradstaŭlajuć radzimu na mižnarodnych frantach.
Nastupnym krokam stali sistematyčnyja błakavańnia maich vykazvańniaŭ ab ŁHBT. Ale heta, chutčej za ŭsio, užo dziejnaść niepasredna ŭdzielnikaŭ hetaj supolnaści.
«NN»: Čamu dla vas važnaja hetaja tema?
AB: Jak ja kazaŭ vyšej, hetaja tema mianie nijak nie tyčyłasia i ja asabliva nie turbavaŭsia dumkami pra toje, nakolki škodny raspaŭsiud infarmacyi ab ŁHBT pad vyhladam naturalnaha i prymalnaha ładu žyćcia. Kali na mianie stali nasiadać prapaviedniki «novaha ładu žyćcia», ja zasieŭ za vyvučeńnie historyi ŭźniknieńnia ŁHBT i nastupstvaŭ, ź jakimi sutykajucca krainy, što ŭraŭnoŭvali hetych ludziej u pravach. Pieršaje, što ja adčuŭ — šok.
Faktyčna, prapahanda ŁHBT viadzie da vyniščeńnia chryścijanstva, źniščeńnia siamiejnych kaštoŭnaściaŭ, ustalavańniu amaralnych pryncypaŭ žyćcia i poŭnaha hvałtavańnia moładzi.
Naprykład, pa dadzienych kampanii YouGov (brytanskaje ahienctva ŭ 2015 apytała 1600 čałaviek, ź ich mienš za 200 maładzionaŭ, vyniki daśledavańnia zhadvajucca ŭ ruskamoŭnaj Vikipiedyi — Red.), va ŭzroście 60 i bolš hadoŭ «absalutnymi hieterasieksuałami» siabie ličać 88% apytanych, va ŭzroście 40-59 hadoŭ — užo 78%, va ŭzroście 25 - 39 hadoŭ — 58%, što ŭžo vielmi padazrona. Ale samy vialiki šok — heta ŭzrostavaja katehoryja 18-24 hady. U joj siabie jak całkam hieteraseksualnymi pazicyjanujuć tolki 46% apytanych! Taksama ŭ hetaj uzrostavaj katehoryi 6% ličać siabie «asabliva homaseksualnymi», a 43% adnosić siabie da pramiežkavych typaŭ.
Mnie ŭžo ciapier pišuć šmatlikija baćki, raskazvajučy, jak ich dzieci ŭ škole «hulajucca» ŭ leśbijanak i hiejaŭ.
Maja dačka taksama nie stała vyklučeńniem z praviłaŭ prapahandy i raskazała, što niekatoryja jaje siabroŭki vyrašyli stać leśbijankami. I heta ŭ 11 hadoŭ! Tolki ŭdumajciesia ŭ što pieratvorycca naša hramadstva praz 5-10 hadoŭ, kali ŭžo siońnia nie spynić raspaŭsiud hetych skryŭleńniaŭ!
Siońnia ŭ niezaležnych ŚMI nidzie nie sustrenieš alternatyŭnaha mierkavańnia pra toje, što na samoj spravie ŭjaŭlaje saboj ŁHBT i jakuju škodu jany nanosiać našym dzieciam. Usiudy vyklučna pazityŭny i naturalny ład, abviaščeńnie talerantnaści i pakory. I heta tolki bačnaja viaršynia ajśbierha.
Dastatkova pahladzieć u što pieratvarajecca Jeŭropa, jakaja pryniała novuju modu, dzie ŭžo niama taty i mamy, niama narmalnych siemjaŭ, dzie ŭ «cerkvach» słužać sadamity. U Biełarusi akno Oviertana tolki adčyniłasia i ŭ našych siłach jaho začynić nazaŭždy.
«NN»: Vy sapraŭdy płanujecie stvaryć hramadskuju arhanizacyju? Jak jaje nazaviecie? Chto jaje padtrymaje?
AB: Pakul havorka idzie tolki pra stvareńnie hramadskaha ruchu, jaki, całkam mahčyma, pieraraście ŭ hramadskuju arhanizacyju. Heta nie baraćba z vybaram čałavieka. Kožny volny vybirać svoj ład žyćcia. Nichto ni da kaho ŭ łožak nie lezie, svoj statut nie naviazvaje. Jość ŁHBT, i navat dziaržava nie pieraśleduje ni hiejaŭ, ni leśbijanak. Mnie sprabujuć pryvieści prykłady niekatorych vypadkaŭ, ale, spadarstva, u paraŭnańni z prablemami invalidaŭ, niespraviadlivymi prysudami pa artykule 328, siamiejnym hvałtam, takija vypadki — statystyčnaja pamyłka. Ale ŁHBT siońnia zajmajecca nie dapamohaj svaim 2-3%, a robić pijar-kampaniju.
***
Andrej Bandarenka — palitviazień u minułym. Jon vyłučaŭsia ŭ deputaty jak niezaležny kandydat, a paśla byŭ prysudžany pa ekanamičnym artykule da 7 hadoŭ źniavoleńnia. Damohsia taho, što jaho pryznali nievinavatym, a kali vyjšaŭ na volu, staŭ zajmacca dapamohaj asudžanym i aryštavanym. Paśla hetaha na Bandarenku zaviali jašče adnu kryminalnuju spravu, za chulihanstva. Pa joj jon nie byŭ pryznany palitviaźniem. Na volu paŭtorna vyjšaŭ u 2017 hodzie.
