Koratka zhadajem, z čym skončyŭsia papiaredni čempijanat
Fota Ramana Čmiala.
Bresckaje «Dynama» pierarvała 13-hadovuju hiehiemoniju BATE, «Dniapro» adpraviłasia ŭ stykavyja matčy, dzie sastupiła «Ruchu» i nieŭzabavie likvidavałasia. Alaksiej Baha źbiraŭsia pakinuć pasadu hałoŭnaha treniera BATE, Juryj Viernidub tolki-tolki pačaŭ treniravać «Šachcior», a minskaje «Dynama» nie viedała, što jamu rabić ź Siarhiejem Hurenkam. Źjavilisia słuchi pra mahčymy tranśfier Illi Škuryna z «Enierhietyka-BDU» ŭ CSKA.
Što majem siońnia?
Zamiest naroščvańnia daminavańnia bresckaha «Dynama» ŭ biełaruskim futbole paśla čempijonstva, u Breście zanialisia pierabudovaj, kančatkovaja meta jakoj pakul zastajecca niezrazumiełaj.
Spačatku kłub pakinuŭ hałoŭny trenier Marceł Lička, jaho miesca zaniaŭ Siarhiej Kavalčuk, jaki ŭžo dvojčy dahetul kiravaŭ «Dynama» ŭ niaprostyja časy, u časy ž chlebnyja byŭ spartyŭnym dyrektaram. Za Ličkaj kamandu pakinuli jaje lidary: Pavieł Niachajčyk viarnuŭsia ŭ BATE, Alaksandr Hutar pierajšoŭ u «Šachcior», a Alaksiej Chablenka viarnuŭsia na radzimu ŭ «Dniapro-1». Straty zakranuli i ofis kłuba: ź jaho syšli pres-sakratarka Volha Chižynkova i hienieralny mieniedžar Maksim Krasnabajeŭ.
Šmat pytańniaŭ vyklikaje suviaź «Dynama» z «Rucham», što budzie sioleta hulać u vyšejšaj lizie. U simpatyjach da «Ruchu» i adkryta pryznajecca bos «bieła-sinich» Alaksandr Zajcaŭ, a abaniemientami na matčy «Dynama» zajmajecca kampanija ź dziŭnaj nazvaj «Ruch Sport Mieniedžmient». Ale hetyja i inšyja dokazy nie pracujuć na Fiederacyju futboła, jakaja ćviorda kaža, što ŭ kłubaŭ roznyja ŭłaśniki.
Ale niahledziačy na nie samuju pryjemnuju tendencyju, čempijony davoli ŭpeŭniena pieramahli «Šachcior» u matčy za Supierkubak. Śpisvać z rachunkaŭ ich kateharyčna nielha.
Što datyčycca «Šachciora», to tam taksama ŭsio mianiajecca. Pierad novym trenieram stajała važnaja zadača — znajści zamienu Bakaju, Kavalovu, Rybaku i inšym. Viernidub taksama pamianiaŭ malunak hulni i taktyčnuju schiemu: ciapier «Šachcior» hulaje z rombam u centry pola, a styleŭtvarajučym hulcom staŭ navičok kamandy Juryj Kiendyš. Jak zaŭsiody, salihorcy siarod favarytaŭ čempijanatu, ale ŭ hetym kłubie nie pryniata šukać dabra ad dabra, tamu zdarycca moža ŭsio što zaŭhodna.
Z topaŭ najbolš spakojna mižsiezonka, zdajecca, prajšła ŭ BATE. Na miesca Alaksieja Bahi, jaki syšoŭ u vilenski «Žalhirys», kamandu ŭznačaliŭ Kirył Alšeŭski, jaki dahetul treniravaŭ dubl. Akramia Niachajčyka, u skład kamandy viarnuŭsia jašče i Alaksandr Vaładźko, a surjoznych strat udałosia abminuć. Kłub paralelna zajmaŭsia imidžavymi rečami: 17 sakavika BATE pradstaviŭ svoj novy łahatyp, raspracavany rasijskaj studyjaj Quberten.
Rebrendynh zakranuŭ jašče adzin kłub vyšejšaj lihi. «Smalavičy», što viarnulisia ŭ vyšku, vyrašyli źmianić i firmovy styl. Miarkujecca, novaje łoha dapamoža kamandzie zatrymacca padaŭžej u najvyšejšym dyvizijonie i budzie asacyjavacca tolki ź pieramohami.
Amal usiu zimu vostra stajała pytańnie ab novym haspadary minskaha «Dynama». Minharvykankam nie moh kiravać jašče i «Minskam», bo heta supiarečyła rehłamientu ABFF. Ale ŭ vyniku pytańnie rašyłasia, ale imia novaha ŭładalnika «bieła-sinich» usio jašče trymajecca ŭ sakrecie.
Siarhiej Hurenka zastaŭsia trenieram «Dynama» i za mižsiezonku zdoleŭ sabrać davoli bajazdolny skład, u jaki ŭvajšli, siarod inšych, hulcy zbornaj Ryjas, Bachar, Klimovič i Šykaŭka. U čverćfinale Kubka Biełarusi, praŭda, kamanda Hurenki nie zdoleła prajści BATE, a sam trenier zastaŭsia nastolki niezadavoleny sudziejstvam, što biŭ nahami dźviery na «Barysaŭ-Arenie». Sankcyj ad ABFF pakul nie było.
Siarhiej Hurenka bje nahoj pa dźviarach sudziejskaha pakoja.
Ničoha dziŭnaha nie było ŭ tranśfiery Illi Škuryna ŭ maskoŭski CSKA, pakul jon byŭ na ŭzroŭni słuchaŭ. Jak tolki baki pierajšli da dziejańniaŭ, pačałosia samaje cikavaje.
Akazałasia, što Škuryn pierajechaŭ u Maskvu futbalistam nie «Enierhietyka», a bresckaha «Dynama».
Fota: PFK CSKA.
U vyniku ahientam hulca i bieraściejcami było ŭsio vykručana tak, nibyta Škuryn naležaŭ «Dynama-Brest» jašče ź minułaha leta, a paśla źjaŭleńnia zacikaŭlenaści z boku CSKA było vyrašana nie čynić pieraškod. «Enierhietyk» naohuł uvieś hety čas maŭčaŭ abo rabiŭ vyhlad kštałtu «vy ž sami ŭsio razumiejecie».
Ciapier, u rešcie rešt, pierachodzim da matča pieršaha tura. Jakija, nahadvajem, nie pieranosiacca i projduć z udziełam hledačoŭ.
«Enierhietyk-BDU» — BATE
- 19.03, 17:00. Minsk, RCAR-BDU.
- Kaeficyjenty: «Enierhietyk» (pieramoha) — 7.80; ničyja — 4.85; BATE (pieramoha) — 1.34.
Pra BATE ŭsio napisana, tamu krychu jašče ŭvahi da «studentaŭ». Škuryn byŭ nie adzinaj istotnaj strataj kamandy ŭzimku. U Brest adpraviŭsia Usievaład Sadoŭski, na rachunku jakoha 9 hałoŭ u minułym čempijanacie, a rasijski paŭabaronca Danił Połubajarynaŭ pierajšoŭ u «Rotar».
Niahledziačy na sychod lidaraŭ, my ŭsie vydatna viedajem, jak z moładziu pracuje Anatol Jurevič. Vielmi chaciełasia b spadziavacca na toje, što sioleta my taksama pabačym vidoviščnuju i bahatuju na miačy hulniu «Enierhietyka», ale pakul miarkujem, što kamanda budzie zmahacca za vyžyvańnie.
Prahnoz «NN»: bujnaja pieramoha BATE.
«Šachcior» — «Tarpieda-BiełAZ»
- 19.03, 19:00. Salihorsk, stadyjon «Budaŭnik».
- Kaeficyjenty: «Šachcior» (pieramoha) — 1.48; ničyja — 4.00; «Tarpieda» (pieramoha) — 6.40.
Treciaja za apošnija dva tydni sustreča salihorcaŭ z žodzincami. Apošnija dźvie skončylisia suchimi pieramohami «Šachciora», niahledziačy na toje što, pa słovach hulcoŭ «Tarpieda-BiełAZ», trenierski štab poŭnaściu razabraŭ hulniu supiernikaŭ.
Ci spraŭdzicca prykazka «Trecim razam — lepšym časam» na hety raz? Miarkujem, što nie.
Prahnoz «NN»: pieramoha «Šachciora».
«Dynama-Brest» — «Smalavičy»
- 20.03, 18:00. DASK «Brescki».
- Kaeficyjenty: «Dynama» (pieramoha) — 1.22; ničyja — 5.80; «Smalavičy» (pieramoha) — 11.25.
Paśla pieramohi ŭ Supierkubku čempijonaŭ Biełarusi čakaŭ kubkavy čverćfinał z «Isłačču», los jakoha vyrašyŭsia tolki ŭ sieryi paślamatčavych pienalci. Brest prajšoŭ dalej, ale jaŭna nie takoj składanaj hulni čakali zaŭziatary «Dynama».
Na papiery haspadary — vidavočnyja favaryty hulni sa «Smalavičami». Ale z takimi kamandami zaŭsiody składana hulać: za mižsiezonku surjozna źmianiŭsia skład, u navičkoŭ budzie vialikaje žadańnie pakazać siabie, tym bolš u hulni z čempijonam. Ale niezhulanaść moža być na ruku jakraz bieraściejcam.
Prahnoz «NN»: pieramoha «Dynama».
«Dynama-Minsk» — «Ruch»
- 20.03, 20:00. Minsk, stadyjon «Dynama».
- Kaeficyjenty: «Dynama» (pieramoha) — 1.45; ničyja — 4.10; «Ruch» (pieramoha) — 6.75.
Debiutanty vyšejšaj lihi startujuć adrazu paśla svaich ziemlakoŭ. I adrazu — vielmi surjozny ispyt u vyhladzie matča suprać minskaha «Dynama».
«Ruch», u paraŭnańni z «Biełšynaj» i «Smalavičami», najbolš jakasna pravioŭ mižsiezonku. Kamanda dvojčy źjeździła na zbory ŭ Turcyju, a taksama surjozna ŭzmacniłasia, u pieršuju čarhu za košt hulcoŭ «Dynama-Brest». U «Ruch» pierajšli Čydzi Asučukvu, Uładzisłaŭ Vasiljeŭ i Vital Hajdučyk, taksama budzie cikava pasačyć za sieniehalskim forvardam Abdułaje Dyjało, jaki hulaŭ raniej u Partuhalii.
Čydzi Asučukvu. Fota: FK «Ruch».
Ekśpierty ličać haspadaroŭ biezumoŭnymi favarytami matča, ale prosta vidavočna nie budzie.
Prahnoz «NN»: totał bolšy za 2.5, abiedźvie kamandy zabjuć.
«Viciebsk» — «Haradzieja»
- 21.03, 14:00. CSK FK «Viciebsk».
- Kaeficyjenty: «Viciebsk» (pieramoha) — 2.21; ničyja — 3.14; «Haradzieja» (pieramoha) — 3.22.
Paśla čaćviortaha miesca «Viciebska» ŭ 2018-m nadyšoŭ pravalny letašni čempijanat. Kamanda akazałasia tolki ŭ 1 bale ad zony stykavych matčaŭ. Ale vyrašyli nie siačy ź plača: Siarhiej Jasinski maje vialiki kredyt davieru ŭ kłubie.
Sam ža trenier stavić pierad padnačalenymi davoli adekvatnyja zadačy — być u siaredzinie tablicy. Vyšej naŭrad ci atrymajecca, tym bolš kamandu pakinuli Kirył Piačenin, Mikałaj Zołataŭ i Michaił Kazłoŭ, jakija pajšli na pavyšeńnie.
U «Haradziei» ž paśla najlepšaha siezona ŭ historyi mohuć nastupić čornyja časy. U studzieni byli zatrymanyja ŭsie kiraŭniki cukrovych kambinataŭ, u tym liku Michaił Kryštapovič i Mikałaj Prudnik, ź jakimi piersanalna byli źviazanyja dasiahnieńni «Haradziei» i «Słucka» adpaviedna.
Ciapier vynikaje, što kambinaty va ŭmovach finansavych prablem admaŭlajucca ad spansiravańnia futbolnych kłubaŭ. Ich kiraŭnictva sprabuje šukać padtrymku ŭ Minsporcie, ABFF i kancernie «Biełdziaržcharčpram», ale jość imaviernaść taho, što samabytnyja kamandy mohuć źniknuć.
Prahnoz «NN»: «Viciebsk» nie prajhraje.
«Isłač» — «Nioman»
- 21.03, 16:00. Stadyjon FK «Minsk».
- Kaeficyjenty: «Isłač» (pieramoha) — 1.98; ničyja — 3.30; «Nioman» (pieramoha) — 3.65.
Kłub ź Minskaha rajona mužna zmahaŭsia ŭ kubku suprać bresckaha «Dynama», ale sastupiŭ i ciapier rychtujecca da startu čempijanatu. ABFF spačatku nie dała «vaŭkam» licenziju, ale ŭsie prablemy vyrašylisia i vyšejšaja liha startuje ŭ poŭnym składzie.
«Isłačy», viadoma, budzie składana palepšyć letašni piaty radok, ale čamu b i nie, tym bolš skład u kamandy ŭzmacniŭsia za košt Paŭła Rybaka, Mikałaja Januša i Ihara Kuźmianka.
Mikałaj Januš u składzie «Isłačy». Fota Anatola Redzina.
«Nioman» ža paciarpieŭ niekalki adčuvalnych strat. U pieršuju čarhu heta tyčycca Hulžyhita Ałykułava: kyrhyzski Miesi pierajšoŭ u kazachstanski «Kajrat», a Aleh Jeŭdakimaŭ viarnuŭsia ŭ «Minsk». Haradziencaŭ čakaje niaprosty siezon.
Prahnoz «NN»: totał mienšy za 2.5.
«Słuck» — «Słavija»
- 22.03, 14:00. Słuck, stadyjon «Haradski»
- Kaeficyjenty: «Słuck» (pieramoha) — 2.62; ničyja — 3.14; «Słavija» (pieramoha) — 2.62.
Niahledziačy na ŭsie prablemy «cukrovych», słuččaki ŭ mižsiezońnie padpisali ažno šeść zamiežnych hulcoŭ. Dla paraŭnańnia, biełaruskich navičkoŭ było tolki dvoje. Adzin ź ich, Juryj Kazłoŭ, u vychodnyja trapiŭ u špital ź simptomami karanavirusa. Na ščaście, dyjahnaz nie byŭ paćvierdžany, ale praz heta byŭ admienieny sparynh kamandy suprać pietrykaŭskaha «Šachciora».
«Słavija» praviała spakojnuju mižsiezonku. Dziakujučy razvału «Dniapro» mazyrčuki aŭtamatyčna trapili ŭ paŭfinał Kubka Biełarusi, dzie sustrenucca z BATE.
Prahnoz «NN»: totał mienšy za 2.5.
«Biełšyna» — «Minsk»
- 22.03, 16:00. Babrujsk, stadyjon imia Prakapienki
- Kaeficyjenty: «Biełšyna» (pieramoha) — 3.22; ničyja — 3.22; «Minsk» (pieramoha) — 2.18.
Z «Biełšyny» zimoj syšoŭ hałoŭny bambardzir minułaha siezona Alaksandr Jušyn. Rasijanin, jaki letaś zabiŭ 26 miačoŭ, pierajšoŭ u «Naftachimik» z druhoha rasijskaha dyvizijona. Zamiest jaho babrujčanie padpisali lehiendarnaha Leanida Koviela, ale čakać ad vieterana takich halavych pośpiechaŭ, vidavočna, nie varta.
«Minsk» zastaŭsia biez maładych zorak: Ivan Bachar i Jaŭhien Šaŭčenka pierajšli ŭ minskaje i bresckaje «Dynama» adpaviedna. Ale kłub, jaki bazujecca na mocnych futbolnych škołach, musić znajści zamienu sa svaich reziervaŭ.
Abiedźvie kamandy buduć chutčej zmahacca za vyžyvańnie, čym stanuć siensacyjaj. Pierśpiektyvy prajaśniacca z pačatkam siezona.
Prahnoz «NN»: ničyja.
U suviazi z raspaŭsiudam karanavirusa my nie raim vam naviedvać ludnyja mierapryjemstvy, u tym liku i futbolnyja matčy. Kali ŭsio ž vyrašycie pajści na stadyjon, prytrymlivajciesia mieraŭ zaściarohi.
Dzialiciesia prahnozami ŭ kamientarach. Kali ličycie siabie ekśpiertam u biełaruskim futbole, zrabicie staŭku ŭ Bukmiekierskaj kantory Marafon!
