Delfi
U Litvie zafiksavany pieršy vypadak, kali karanavirus dyjahnastavali ŭ rabotnika miedustanovy. Pra heta paviedamiła Šeškinskaja paliklinika. Hety vypadak taksama źjaŭlajecca pryvaznym, paćvierdziŭ vice-ministr achovy zdaroŭja Litvy Alhirdas Šešelhis, piša Delfi.
Ministr achovy zdaroŭja Aŭrelijus Viaryha adznačyŭ, što doktarka prylacieła z Kuby, niekalki dzion jana była na pracy. «Paśla viartańnia z Kuby, na praciahu čatyroch dzion jana była na pracy», — rastłumačyŭ A. Viaryha.
Na staroncy palikliniki ŭ fejsbuku skazana, što ciapier chvoraja prachodzić lačeńnie, jana izalavanaja. «U rabotnika Šeškinskaj palikliniki dyjahnastavali karanavirus. Jon prachodzić lačeńnie, izalavany. Usie, u kaho byli ź im kantakty, taksama vykonvajuć režym izalacyi», — paviedamlaje paliklinika.
Kiraŭnik administracyi Vilenskaj meryi Poviłas Padziarskis udakładniŭ, što karanavirus dyjahnastavany ŭ siamiejnaha doktara z palikliniki.
«6 sakavika jana viarnułasia z Kuby. Dva dni pracavała, potym u jaje byŭ vychodny, zatym jašče dva dni pracavała. Potym adčuła, što chvoraja i bolš na pracu nie chadziła», — skazaŭ jon. Padziarskis skazaŭ, što izalavany 5 čałaviek, jakija ź joj pracavali. U siamiejnaha doktara mahło być kala 80 kantaktaŭ.
«Jana z členami siamji była doma. Ciapier jana ŭ Santaryškskaj balnicy. Kali jana viarnułasia, Kuba nie była ŭ liku krain, jakija byli ŭ hrupie ryzyki. My chacieli b, kab na takija vypadki reahavali chutčej. My bačym peŭnyja prablemy z arhanizacyjaj pracy ŭ paliklinikach, utojvańnie infarmacyi ničym nie apraŭdana. Śpis pacyjentaŭ pieradadzieny, budziem dapamahać šukać hetych ludziej», — skazaŭ Padziarskis.
Vilenskija ŭłady płanujuć spynić pracu palikliniki. «Ja dumaju, što my prymiem apieratyŭnaje rašeńnie ŭ dačynienni da raboty palikliniki, za vyklučeńniem pradastaŭleńnia nieadkładnaj dapamohi, spynim rabotu i pieraviadziom pacyjentaŭ, jakim u najbližejšyja dni patrebnyja pasłuhi», — skazaŭ žurnalistam Padziarskis.