Na prarasijskich internet-resursach źjaviŭsia zvarot ad imia «hramadzian RB i RF, jakija pražyvajuć u Respublicy Biełaruś» na adras prezidenta i premjer-ministra Rasii.
U im prezidenta Biełarusi abvinavačvajuć u samaŭchileńni «ad svaich kanstytucyjnych abaviazkaŭ». Aŭtary zvarotu zaklikajuć kiraŭnictva Rasii «pryniać ekstranyja miery dla zabieśpiačeńnia biaśpieki Sajuznaj dziaržavy, jaje źniešnich miežaŭ, abarony zdaroŭja nasielnictva i nieraspaŭsiudžvańnia novaj karanavirusnaj infiekcyi na ŭsioj terytoryi Sajuznaj dziaržavy».
«Respublika Biełaruś (RB) — člen Sajuznaj dziaržavy, zastajecca adzinaj krainaj u Jeŭropie, dzie ŭłady niedaaceńvajuć dadzienuju pahrozu, — pišuć aŭtary zvarotu. — Biełaruskaje kiraŭnictva ihnaruje rekamiendacyi Suśvietnaj arhanizacyi achovy zdaroŭja, nie pradprymaje adekvatnych mier pa pierakryćci dziaržaŭnych miežaŭ z metaj niedapuščeńnia praniknieńnia karanavirusnaj infiekcyi z trecich dziaržaŭ, padviarhajučy ryzycy žyćcio i zdaroŭje miljonaŭ suajčyńnikaŭ na terytoryi RB i RF».
U zvarocie śćviardžajecca, što prezident Biełarusi «demanstruje ŭsie prykmiety niedziejazdolnaści».
«U suviazi z ekstraardynarnaj situacyjaj, jakaja skłałasia ŭ Respublicy Biełaruś, pahrozaj žyćciu i zdaroŭju našych suajčyńnikaŭ, u adpaviednaści z Kanstytucyjaj RF, Dahavoram ab stvareńni Sajuznaj dziaržavy, a taksama inšymi mižnarodnymi abaviazacielstvami, uličvajučy, što Respublika Biełaruś u krytyčny momant svajoj historyi zastałasia biez adekvatnaha i adkaznaha kiraŭnictva, prosim rasijskija ŭłady pryniać ekstranyja miery dla zabieśpiačeńnia biaśpieki Sajuznaj dziaržavy, jaje źniešnich miežaŭ, abarony zdaroŭja nasielnictva i nieraspaŭsiudžvańnia novaj karanavirusnaj infiekcyi na ŭsioj terytoryi Sajuznaj dziaržavy», — havorycca ŭ zvarocie.
Minułyja dni sietka prarasijskich internet-resursaŭ, aryjentavanych na Biełaruś, raspaŭsiudžvała fejkavuju infarmacyju pra toje, što ŭ Biełarusi «skančajucca valutnyja resursy» i što «tysiačy studentaŭ z zaražanych VNU ŭtrymlivajucca ŭ balnicach i internatach, jakija byli pieratvoranyja ŭ izalatary».
Učora Jeŭrasajuz apublikavaŭ infarmacyju pra toje, što rasijskaja prapahanda pačała raspaŭsiudžvać raznapłanavyja fejki, źviazanyja z karanavirusam i skiravanyja na destabilizacyju situacyi ŭ roznych krainach.
