Inesa Drabyšeŭskaja ŭznačalvała Ministerstva achovy zdaroŭja ŭ 1994-1997 hadach. Jana była pieršym kiraŭnikom viedamstva za časami Alaksandra Łukašenki.
U kamientary dla «Našaj Nivy» jana padzialiłasia svaim mierkavańniem nakont situacyi z karanavirusam u Biełarusi.
Inesa Drabyšeŭskaja. Fota facebook.com
«Ja dumaju, što nam treba supakoicca i spakojna žyć, a taksama mienš šastać pa roznych kampanijach. Voś i ŭsio, — pačynaje spadarynia Drabyšeŭskaja. — Pakul situacyja nie takaja, kab abviaščać karancin. Baču, što Minzdaroŭja trymaje ruku na pulsie. Ja vieru, dakładniej, baču dziejańni ministra Uładzimira Karanika, usie jany absalutna słušnyja. Ja pavažaju jaho, jon usio robić aktyŭna i, hałoŭnaje, spakojna, bieź dziorhańnia tudy-siudy.
Kaniečnie, čym bolš ludziej pravierać, tym lepiej budzie. Heta dziejańni na papiaredžańnie. I heta vyjaŭleńnie navat prostaha siezonnaha virusnaha zachvorvańnia, nie abaviazkova karanavirusa. Vy ž bačycie, jakoje ciapier nadvorje staić, jakija pierapady tempieratury.
Absalutna niama nahody dla paniki, ale treba być vielmi aściarožnymi i ŭvažlivymi, bo situacyja ŭ śviecie sapraŭdy vielmi surjoznaja. Mabyć, panika źjaŭlajecca i praź Italiju, i praz tyja miemy, jakija chodziać u internecie. Niechta prosta nie škaduje čałaviečuju psichiku i zdaroŭje. Italjancy adrazu niesurjozna pastavilisia da prablemy. Vy ž pomnicie, kali navat u Italii jašče ničoha nie pačynałasia, to Ministerstva achovy zdaroŭja ŭ nas surjozna zajmałasia temaj.
U nas usio było pravilna. Adbyłasia pieraprafiliroŭka łožkavaha fondu pa ŭsich ustanovach krainy. Ciapier usie jany hatovyja. Daj boh, kab tolki nie było ŭspyški. Nichto nie moža patłumačyć, ci jana moža adbycca. Vy ž bačycie, što hety karanavirus raspaŭsiudziŭsia pa ŭsim śviecie vielmi niezvyčajna i aktyŭna. Samaje hałoŭnaje — być hatovymi. Ja ŭsio ž dumaju, što karancin budzie ŭviedzieny.
Ja ciapier myju ruki jak maha čaściej, kali idu ŭ kramu, to adziavaju marlevuju masku. Kožny pavinien pra siabie pakłapacicca. Praściej ža adzieć masku, čym kahości sustreć i padchapić virus. Kali prychodzicie dadomu, to prapałaščycie nos i pamyjcie ruki z myłam, dobra pamyjcie».
***
Inesa Drabyšeŭskaja naradziłasia ŭ 1947 hodzie ŭ vioscy Dudzičy Čačerskaha rajona. Skončyła Viciebski miedycynski instytut. Pracavała hiniekołaham u Homieli. Ad 1986 da 1994 uznačalvała Homielski abłasny ankałahičny dyspanser. Ad 1990 była deputatam Viarchoŭnaha savieta, dzie ŭvachodziła ŭ kamisiju pa achovie zdaroŭja. Ad 1994 da 1997 uznačalvała Ministerstva achovy zdaroŭja. Paśla była členam Savieta Respubliki.
