Pradstaŭnik SAAZ u Biełarusi Batyr Bierdykłyčaŭ u kamientary TUT.BY zajaviŭ, što Ministerstva achovy zdaroŭja pavinna palepšyć infarmavańnie hramadzian ab situacyi z karanavirusam ŭ krainie: «Nasielnictva pavinna mieć poŭnuju infarmacyju pra ryzyki i pra toje, jak situacyja raźvivajecca, i jakija miery prymajucca. Niedachop infarmacyi moža spravakavać strach».
Siońnia adbyłasia razmova kiraŭnika Savieta Respubliki Natalli Kačanavaj i pradstaŭnika Ministerstva achovy zdaroŭja z rehijanalnym dyrektaram Jeŭrapiejskaha biuro SAAZ Hansam Kluhie. Abmiarkoŭvałasia pytańnie zaprašeńnia misii ekśpiertaŭ SAAZ, jakija pryjeduć u Biełaruś, kab acanić situacyju sa ŭspyškaj karanavirusa ŭ krainie i dać rekamiendacyi.
— Dla pracy hrupy buduć stvorany ŭsie ŭmovy: dostup da infarmacyi, padtrymka z boku Ministerstva achovy zdaroŭja i ŭrada, kab śpiecyjalisty mahli abjektyŭna acanić situacyju, a taksama miery, jakija prymajucca, i dać nieabchodnyja rekamiendacyi, — rastłumačyŭ pradstaŭnik SAAZ u Biełarusi Batyr Bierdykłyčaŭ.
22 sakavika dyrektar Jeŭrapiejskaha rehijanalnaha biuro SAAZ Chans Kluhie nakiravaŭ kiraŭniku biełaruskaha Ministerstva achovy zdaroŭja list, u jakim adznačałasia, što Suśvietnaja arhanizacyja achovy zdaroŭja padtrymlivaje dziejańni Ministerstva achovy zdaroŭja pa rańnim vyjaŭleńni virusa COVID-19, adsočvańni kantaktaŭ i ich izalacyi, a taksama pa prafiesijnym akazańni dapamohi pacyjentam.
U chodzie siońniašniaj razmovy Chans Kluhie, pa słovach pradstaŭnika SAAZ u Biełarusi, padkreśliŭ, što situacyja raźvivajecca vielmi chutka, adpaviedna, miery, jakija prymajucca krainaj, pavinny taksama chutka karektavacca i adpaviadać epidemijałahičnaj situacyi.
— Kazać ab maštabnych karancinnych mierach na dadzienym etapie zaŭčasna — da praviadzieńnia acenki misijaj ekśpiertaŭ SAAZ, — adznačyŭ Batyr Bierdykłyčaŭ.
Dzień prybyćcia misii SAAZ u Biełaruś u krainavym ofisie nazvać nie zmahli, kažuć, što robiać usio mahčymaje, kab śpiecyjalisty pryjechali jak maha chutčej, ale situacyju ŭskładniaje abmiežavańnie palotaŭ pa ŭsim śviecie.
Pa słovach Batyra Bierdykłyčava, vielmi važna svoječasova infarmavać nasielnictva ab raspaŭsiudžvańni virusa.
— Infarmavańnie pavinna być rehularnym i dosyć adkrytym, kab nasielnictva mieła poŭnuju infarmacyju pra ryzyki, pra toje, jak situacyja raźvivajecca, i jakija miery prymajucca. Niedachop infarmacyi moža spravakavać strach, tamu važny elemient baraćby z epidemijaj — uciahvańnie nasielnictva, — padkreślivaje surazmoŭca. — Ministerstva achovy zdaroŭja vykonvaje miery, jakija znachodziacca ŭ jaho kampietencyi, ale takaja nadzvyčajnaja situacyja, taksama patrabuje mižviedamasnaha padychodu — treba aktyvizavać uzajemadziejańnie pamiž usimi ministerstvami i viedamstvami i pa miedycynskaj častcy, i pa ekanamičnaj častcy, i pa sacyjalnaj padtrymcy.
— Ministerstva achovy zdaroŭja bolš nie daje infarmacyju ab kolkaści zaražanych karanavirusam. Vy ličycie heta adekvatnym situacyi? — udakładnili žurnalisty ŭ pradstaŭnika SAAZ u Biełarusi.
— My abmiarkoŭvajem ź Ministerstvam achovy zdaroŭja hetaje pytańnie. I viadoma, ličym, što kali b padača infarmacyi była bolš rehularnaj i poŭnaj, było b značna lepš. Naša rekamiendacyja dosyć vyraznaja i mocnaja — palepšyć hety kampanient, adnaznačna.
U Biełarusi na siońnia praviedziena bolš za 32 tysiač testaŭ na karanavirusnuju infiekcyju.
Za apošnija sutki vypisana piać pacyjentaŭ, u jakich raniej test na COVID-19 daŭ stanoŭčy vynik. Pad miedycynskim nahladam i na lačeńni znachodziacca 157 čałaviek. Pa padlikach biełaruskich ŚMI, u Biełarusi ciapier ad 163 da 217 vypadkaŭ zaražeńnia karanavirusam. Ahulnaja kolkaść vypadkaŭ karanavirusa Ministerstva achovy zdaroŭja z 31 sakavika nie paviedamlaje, 30 sakavika havaryłasia pra 152 vypadki. Viadoma, što pamierli dva pacyjenty z karanavirusam.
