Doktarka balnicy chutkaj mieddapamohi Natalla Łaryjonava ź Viciebska paviedamiła Tut.by, što 1 krasavika jaje vyklikali ŭ prakuraturu vobłaści — dla dačy tłumačeńniaŭ pa publikacyi, jakuju jana raźmiaściła ŭ sacyjalnaj sietcy pra situacyju z karanavirusam u Viciebsku. Doktar, nahadajem, zajaviła, što situacyja «pačała vychodzić z-pad kantrolu» i što ličby pa zachvorvańni, jakija Biełaruś padaje ŭ SAAZ, «absalutna mifičnyja».
Natalla Łaryjonava
— Ja atrymała pozvu, u jakoj havaryłasia, što 1 krasavika a 16 hadzinie mnie naležyć źjavicca da namieśnika načalnika prakuratury vobłaści dla apytańnia ŭ ramkach pravierki, što pravodzicca z nahody majho dopisu ŭ internecie, — paviedamiła TUT.BY Natalla Łaryjonava. — Mianie navat pryvieźli tudy i advieźli. Razmaŭlali vielmi vietliva, hodna. U mianie pytalisia: ci maja heta staronka ŭ sacyjalnaj sietcy, ci ja pisała hety dopis? Maje pakazańni zapisali na videa i piśmova.
U doktara taksama, pa jaje słovach, pacikavilisia, adkul jana brała infarmacyju dla svajoj publikacyi i na čym hruntujucca jaje vysnovy pra situacyju z karanavirusam u Viciebsku i krainie:
— Ja skazała, što źviestki ŭziała z razmovaŭ z kalehami-miedykami, jakija bačać, što adbyvajecca, i abmiarkoŭvajuć heta pamiž saboj. Taksama ja skončyła miedinstytut, dzie vyvučajuć epidemijałohiju. Usie miedyki realna aceńvajuć ciapier situacyju, ale maŭčać — nie viedaju čamu. U prakuratury ŭ mianie spytali, kolki čałaviek chvareje. Ja adkazała, što dakładnuju kolkaść nie viedaju. Pacikavilisia i tym, chto chvareŭ ź lekaraŭ. Nazvała ich pasady. Pad kaniec razmovy spytali, jakija miery, pa-mojmu, treba ŭvieści. Ja skazała: karancin. I patłumačyła čamu.
A voś, što paviedamili BiełTA ŭ abłasnoj prakuratury:
— Pry hetym ustanoŭlena, što Natalla Łaryjonava pa rodzie svajoj dziejnaści źjaŭlajecca lekaram łabaratornaj dyjahnostyki i nie maje dostupu da infarmacyi, što nakiroŭvajecca ŭ SAAZ. Bolš za toje, nie ŭjaŭlaje, chto i jak heta robić. Taksama jana nie vałodaje epidemijałahičnym stanoviščam jak u cełym pa Biełarusi, tak i pa paŭnočnym rehijonie.
