Leanid Anfimaŭ

Leanid Anfimaŭ

Najaŭnaść masak i inšych indyvidualnych srodkaŭ achovy ŭ aptečnaj i handlovaj sietcy, balnicach i paliklinikach pavinna być zabiaśpiečana da 13 krasavika. Z tych, chto nie vykanaje daručeńnie, budzie strohaje spahnańnie. Pra heta siońnia zajaviŭ staršynia Kamiteta dziaržaŭnaha kantrolu Leanid Anfimaŭ na pasiadžeńni kalehii kantrolnaha viedamstva, pieradaje karespandent BiełTA.

Na mierapryjemstvie z udziełam kiraŭnikoŭ handlovych arhanizacyj, retejleraŭ, aptečnych sietak, dziaržaŭnych orhanaŭ, adkaznych za vypusk miedycynskich srodkaŭ achovy, razhledžana biahučaja situacyja pa zabieśpiačeńni nasielnictva tavarami pavyšanaha popytu, abstanoŭka na spažyvieckim rynku ŭ cełym.

Napiaredadni KDK pravioŭ manitorynh najaŭnaści masak i reśpirataraŭ, antysieptykaŭ i asobnych lekavych srodkaŭ (paracetamołu) u aptečnaj sietcy rehijonaŭ i Minska. Sa 130 aptek maski i reśpiratary byli tolki ŭ 33 (25 pracentaŭ), antysieptyki na śpirtavoj asnovie — u 35 (27 pracentaŭ), paracetamoł — u 15 (11 pracentaŭ). «Škvał zvankoŭ idzie na haračyja linii ŭ MARH i Kamitet dziaržkantrolu. Za dźvie hadziny ŭčora da nas pastupiła 44 zvanki. Bolšaść datyčylisia vysokich cen na achoŭnyja srodki, paracetamoł, a taksama limony, imbir i časnok abo ich adsutnaści», — adznačyŭ Leanid Anfimaŭ.

Jon adrasavaŭ paprok u adras kancerna «Biellehpram», pradpryjemstvam jakoha nie ŭdałosia zabiaśpiečyć patrebnaść nasielnictva ŭ miedycynskich maskach, mabilizavaŭšy šviejnyja pradpryjemstvy, taksama adznačyŭ niepavarotlivaść kiraŭnictva abłvykankamaŭ i Minharvykankama, «tamu što nie zadziejničany mahutnaści pradpryjemstvaŭ bytavoha absłuhoŭvańnia, dzie zachavalisia šviejnyja vytvorčaści». Akramia taho, nie zmahli maksimalna pryciahnuć da vyrašeńnia prablemy pryvatnyja šviejnyja pradpryjemstvy.

«Hetyja miedycynskija vyraby nie patrabujuć niejkich kaśmičnych technałohij i supiersučasnaha abstalavańnia, asablivaj kvalifikacyi rabotnikaŭ. Zatoje pradpryjemstvy lohkaj pramysłovaści skardziacca na prablemu sa zbytam pradukcyi i kankurencyju na rynku. Ale miedycynskija maski siońnia — heta harantavany zbyt i rentabielnaść niadrennaja, da 31 pracenta. Čamu tady našy šviejniki tak pasiŭna adnieślisia da hetaha zakazu?» — zadaŭ rytaryčnaje pytańnie Leanid Anfimaŭ. Na jaho dumku, heta prajaŭleńnie małoj mabilnaści, niepavarotlivaści vytvorčaściaŭ.

Zatoje vialikuju razvarotlivaść prajavili niesumlennyja działki, jakija vyrašyli nažycca na situacyi. «U ŚMI takija vypadki daŭno achryścili trapnaj frazaj — ekanamičnaje maradziorstva», — skazaŭ Leanid Anfimaŭ. U čas manitorynhu KDK ustanoŭleny fakty realizacyi pa zavyšanych cenach tavaraŭ pavyšanaha popytu, zakuplenych praz pasrednikaŭ. Naprykład, adna sa staličnych aptek pradavała pa canie Br24,96 ajčynny dezynficyrujučy srodak dla apracoŭki ruk — jon byŭ nabyty praz łancuh z troch niadobrasumlennych pasrednikaŭ, što pavialičyli canu bolš jak u try razy. U Babrujsku kantralory znajšli ŭ prodažy antysieptyčny hiel dla ruk koštam Br22,97 za fłakon 850 h — heta amal u čatyry razy daražej, čym jaho kupiŭ minski pasrednik u miascovaha zavoda-vytvorcy.

«Siońnia na naradzie kiraŭnikom dziaržavy była pastaŭlena zadača: da paniadziełka ŭsie aptečnyja sietki, balnicy i palikliniki pavinny być zabiaśpiečany srodkami indyvidualnaj abarony, dezsrodkami», — nahadaŭ prysutnym kiraŭnik KDK.

Taksama Leanid Anfimaŭ adznačyŭ, što prodaž miedycynskich masak i inšych srodkaŭ indyvidualnaj abarony pavinien być arhanizavany ŭ mahazinach Biełkaapsajuza, sietcy aŭtazapravačnych stancyj i inšych abjektach handlu i pasłuh.

«My pavinny zrabić usio mahčymaje, kab pramysłovaść vypuskała nieabchodny tavar u patrebnaj kolkaści, a handal jaho realizoŭvaŭ ź minimalnaj nacenkaj», — skazaŭ na zakančeńnie Leanid Anfimaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0