Aŭstralijskija navukoŭcy z univiersiteta Monaša i Karaleŭskaha špitala ŭ Mielburnie vyjavili preparat, jaki na 99% źmianšaje prysutnaść u kletkach virusa SARS-CoV-2, jaki vyklikaje chvarobu COVID-19. Svajo daśledavańnie jany apublikavali ŭ časopisie Antiviral Research, piša rbc.ru.
Havorka idzie pra ŭchvaleny Suśvietnaj arhanizacyjaj achovy zdaroŭja antyparazitny preparat iviermiektyn. Miedyki praviali łabaratornyja daśledavańni, dadaŭšy ŭ infikavanyja karanavirusam kletki praź dźvie hadziny paśla zaražeńnia iviermiektyn.
Vyniki pakazali, što praz 24 hadziny dola virusnych RNK u kletkavych kulturach źniziłasia na 93%. A praz 48 hadzin prysutnaść virusa ŭ kletkach pamienšyła na 99%.
«Adnarazovaja apracoŭka zdolnaja vyklikać pamianšeńnie virusa ŭ 5000 razoŭ za 48 hadzin u kultury kletak», — havorycca ŭ navukovym artykule. Daśledniki adznačajuć, što takim čynam iviermiektyn vyklikaje praktyčna poŭnuju stratu virusnaha materyjału.
Aŭstralijskija navukoŭcy spadziajucca, što ich daśledavańni dapamohuć nie tolki ŭ raspracoŭcy budučych lekaŭ. Na dumku aŭtaraŭ artykuła, užyvańnie iviermiektynu ŭžo siońnia zdolna źnizić virusnuju nahruzku, paźbiehnuć ciažkich uskładnieńniaŭ pry zachvorvańni COVID-19 i praduchilić pieradaču karanavirusa.
Praŭda, treba ŭličvać mahčymyja pabočnyja efiekty dla čałaviečaha arhanizmu, źviazanyja z prymianieńniem preparatu.
Bieskantrolny pryjom paracetamołu moža nanieści škodu bolšuju, čym karanavirus
Vakcynu ad karanavirusa raspracoŭvajuć niekalki dziasiatkaŭ łabaratoryj i miedycynskich centraŭ pa ŭsim śviecie. Pavodle acenak lekaraŭ, vychad vakcyny na rynak adbudziecca nie raniej čym praz hod.