Urad Biełarusi ŭvodzić na terytoryi krainy takoje abmiežavalnaje mierapryjemstva, jak samaizalacyja. Saŭmin rastłumačyŭ, chto pavinien budzie adpravicca na samaizalacyju i što pahražaje parušalnikam, piša tut.by.
Na samaizalacyju pavinny być źmieščany hramadzianie Biełarusi, zamiežniki i asoby biez hramadzianstva ŭ nastupnych vypadkach:
- kali ŭ ich jość infiekcyja COVID-19;
- kali jany adnosiacca da kantaktaŭ pieršaha ŭzroŭniu z asobami, jakija majuć infiekcyju COVID-19, — na praciahu 14 kalandarnych dzion z daty apošniaha kantaktu; da kantaktaŭ druhoha ŭzroŭniu z asobami, jakija majuć infiekcyju COVID-19, pry najaŭnaści adnaho abo niekalkich reśpiratornych simptomaŭ — na pieryjad najaŭnaści nazvanych simptomaŭ. Vyśvietlić, da kantaktaŭ jakoha ŭzroŭniu adnosicca toj ci inšy čałaviek moža Ministerstva achovy zdaroŭja;
- kali jany prybyli ŭ Biełaruś z krain, u jakich rehistrujucca vypadki infiekcyi COVID-19, na praciahu 14 kalandarnych dzion z dnia prybyćcia.
Tym, chto adpravicca na samaizalacyju, uručać patrabavańnie ab vykanańni praviłaŭ. Ludziam na hety pieryjad vydaduć list niepracazdolnaści, buduć vypłačvać abaviazkovyja strachavyja ŭznosy.
Kali čałaviek parušyć patrabavańni ab samaizalacyi, to dapamoha pa časovaj niepracazdolnaści budzie pryznačanaja ŭ pamiery 50 pracentaŭ ad vyznačanaj pa zakanadaŭstvie. Terminy znachodžańnia hramadzian u samaizalacyi mohuć być praciahnutyja pa rašeńni daktaroŭ.
Asoby, jakija znachodziacca ŭ samaizalacyi, abaviazany:
- nie pakidać miesca pražyvańnia (znachodžańnia), u tym liku nie chadzić na pracu (vučobu), u abjekty handlu i hramadskaha charčavańnia, spartyŭnyja, vystavačnyja i kancertnyja zały, kinateatry, vakzały i inšyja miescy masavaha znachodžańnia ludziej. Dazvalajecca vyjści ŭ najbližejšuju praduktovuju kramu ci apteku, a taksama vynieści śmiećcie;
- pry vychadzie z žyłoha pamiaškańnia ŭ vypadkach krajniaj nieabchodnaści vykarystoŭvać masku, nie dapuskać kantaktaŭ ź inšymi asobami;
- paviedamić najmalniku pra pryčynu adsutnaści na pracy;
- vyklučać karystańnie pasłuhami, jakija praduhledžvajuć kantakty ź inšymi asobami, akramia vypadkaŭ, kali takija pasłuhi patrabujucca dla zabieśpiačeńnia biaśpieki žyćciadziejnaści;
- pry paharšeńni stanu zdaroŭja (pavyšeńnie tempieratury cieła da 37°C i vyšej, źjaŭleńnie kašlu, dychavicy) źviarnucca ŭ chutkuju miedycynskuju dapamohu pa telefonie 103 abo adpraviŭšy SMS-paviedamleńnie, paviedamiŭšy pry hetym pra znachodžańnie ŭ samaizalacyi.
U pastanovie skazana, što parušeńnie patrabavańniaŭ ab samaizalacyi ciahnie adkaznaść u adpaviednaści z zakanadaŭčymi aktami.
Ministerstvu achovy zdaroŭja dadziena try dni, kab pryniać miery pa realizacyi pastanovy. Dakumient ustupaje ŭ siłu paśla jaho apublikavańnia i dziejničaje da śpiecyjalnaha rašeńnia ŭrada.
Minzdaroŭja: U Biełarusi zafiksavali 1066 vypadkaŭ karanavirusa
