Sumarnaja škoda dla suśvietnaj ekanomiki z-za pašyreńnia novaha karanavirusa składzie bolš za $5 trłn na praciahu dvuch hadoŭ. Takija ekśpiertnyja acenki pryviało ŭ sieradu ahienctva Bloomberg.
U publikacyi adznačajecca, što «śviet ustupaje ŭ samuju hłybokuju recesiju ŭ mirny čas z 1930-ch hadoŭ praz toje, što z-za virusa ŭłady zmusili pryvatny biznes spynić pracu, a ludziej — siadzieć doma». «Choć spad, pavodle prahnozaŭ, budzie niepraciahłym, ekanomikam [krain] spatrebicca čas, kab nahnać usio, što jany ŭpuścili», — padkreślivajecca ŭ materyjale, cytavanym tass.ru.
U publikacyi padajecca mierkavańnie hałoŭnaha ekanamista bankaŭskaj kampanii Citigroup Ketryn Man. Jana miarkuje, što škoda dla suśvietnaj ekanomiki pieravysić $5 trłn.
Ekśpierty banka JPMorgan Chase aceńvajuć nazvany pakazčyk u $5,5 trłn. Jany adznačajuć, što ŭ raźvitych krainach budzie ekanamičny spad, paraŭnalny z tymi, jakija mieli miesca ŭ 2008-2009 hadach i 1974-1975 hadach.
Śpiecyjalisty amierykanskaha banka Morgan Stanley ličać, što ŭ raźvitych krainach pakazčyki VUP viernucca da dakryzisnaha ŭzroŭniu tolki ŭ trecim kvartale 2021 hoda.