Fielicyja Šymak bolš za tryccać hadoŭ adpracavała ŭ sistemie achovy zdaroŭja Staŭbcoŭskaha rajona, była łabarantkaj. Ciapier joj 61 hod. 11 krasavika žančyna miełasia syści na piensiju, ale jakraz ciapier zachvareła.
U jaje znajšli pravabakovuju pnieŭmaniju siaredniaj ciažkaści. Lačyli ŭ Staŭbcoŭskaj rajonnaj balnicy. U pačatku tydnia joj zrabili test na karanavirus, ale vynikaŭ jašče niama. 9 krasavika Fielicyju Vitoldaŭnu vyrašyli pieravieści ŭ Minskuju centralnuju rajonnuju balnicu, kudy źmiaščajuć ciapier ludziej ź pnieŭmanijami.
«Faktyčna jaje vystavili na vulicu, a mašyny na Minsk nie było. Jana mnie telefanavała, kaža, što ŭžo 40 chvilin staić na vulicy. U pryjomny pakoj nie puskajuć, bo bajacca, što ŭ jaje karanavirus. Kali ja stała zvanić u balnicu, to tady ŭžo puścili. Ale ahułam čałaviek ź pnieŭmanijaj prastajaŭ na vulicy amal hadzinu!» — paskardziłasia «Našaj Nivie» niaviestka žančyny.
U pryjomnym pakoi Staŭbcoŭskaj balnicy paćvierdzili, što takoje sapraŭdy było, ale jany śćviardžajuć, što nichto Fielicyju Vitoldaŭnu na vulicu nie vyhaniaŭ. «Jana sama vyjšła, mo nie zrazumieła, što mašyna paźniej budzie. Kali ŭbačyli, što jana staić na vulicy, to stali chutčej klikać nazad. U jaje pretenzij da nas niama, dobra raźvitalisia, kali jana na Minsk pajechała, pažadali vyzdaraŭleńnia», — skazaŭ čałaviek u pryjomnym pakoi, jaki admoviŭsia pradstavicca.
