Uładzimir Kurejčyk, baćka biełaruskaha režysiora Andreja Kurejčyka, zachvareŭ na karanavirus. 8 krasavika jaho špitalizavali jak kantakt pieršaha ŭzroŭniu. Siońnia stała viadoma pra stanoŭčy vynik testa, paviedamlaje «Radyjo Svaboda».
«Jaho pieraviali ŭ čaćviortuju balnicu. Kali hety test pryjšoŭ, jaho vielmi chutka sabrali i z adnaho špitala pieravieźli ŭ inšy. Jaho susieda pieraviali ŭ inšuju pałatu. Stan u baćki taki ž — nie palepšaŭ i nie pahoršaŭ. Tempieratura. Na žal, u jaho, jak i ŭ bolšaści ludziej za 60, nie vielmi mocnaje zdaroŭje, jość chraničnyja zachvorvańni», — kaža Andrej Kurejčyk.
Apošnim časam Andrej Kurejčyk nie bačyŭsia z baćkam, bo izalavaŭsia ź siamjoj za horadam.
«Tym rodnym, jakija z baćkam žyvuć, bratu i jaho žoncy, skazali, što im treba pierajści na režym samaizalacyi. Ciapier jany kantakty pieršaha ŭzroŭniu».
Uładzimiru Kurejčyku 66 hod. U sakaviku jon adpačyvaŭ u sanatoryi Ministerstva ŭnutranych spraŭ na Naračy. Adnaho z naviedvalnikaŭ, ź jakim kantaktavaŭ Kurejčyk-starejšy, špitalizavali z dvuchbakovaj pnieŭmanijaj, a paśla vyjavili karanavirus.
«Hetaj situacyi mahło b nie być, — dadaje Kurejčyk. — Kali b byŭ narmalny karancin u krainie, sanatoryi pavinny byli być zakrytyja. Bo tam u asnoŭnym pažyłyja ludzi, tudy jeździać za 50—60.
Tam adzin chvory, zrazumieła, zaražaje ŭsich astatnich, bo jany razam robiać pracedury, siadziać za adnymi stałami ŭ stałovaj, chodziać u adzin basiejn. Kali tam zabrali čałavieka z dvuchbakovaj pnieŭmanijaj, ja baćku skazaŭ, što nie prosta tak budzie».
U sanatoryi MUS «Svabodzie» paćvierdzili, što ŭ ich byŭ hość z karanavirusam. Sanatoryj časova prypyniŭ pryjom naviedvalnikaŭ.
«Tak, pakul nikoha nie prymajem i, chutčej za ŭsio, časova zakryjemsia», — skazała supracoŭnica sanatoryja.
Pavodle jaje, infikavany — piensijanier ź Viciebska.
«Jon u nas dva tydni adpačyvaŭ: jak vychodziŭ na bałkon, usio na harmoniku hraŭ», — dadali ŭ sanatoryi.
