Pakul školnyja kanikuły praciahnutyja jašče na tydzień u suviazi z karanavirusam, sistema adukacyi rychtujecca da ŭviadzieńnia dystancyjnaha navučańnia.
Ad imia kamiteta pa adukacyi Minharvykankama i Minskaha haradskoha instytuta raźvićcia adukacyi pa škołach byŭ razasłany list.
«U suviazi z mahčymaj adsutnaściu dastatkovaj kolkaści navučencaŭ, adukacyjny praces nieabchodna apieratyŭna arhanizavać z dapamohaj infarmacyjna-kamunikatyŭnych technałohij, u pryvatnaści, z vykarystańniem sistemy dystancyjnaha navučańnia Moodle (do.minsk.edu.by)», — havorycca ŭ im.
Piedahoham prapanujecca zarehistravacca ŭ sistemie, pravieści instruktaž dla kaleh i hetak dalej.
«Źviartajem vašu ŭvahu na toje, što heta budzie adzinaja dazvolenaja placoŭka dla arhanizacyi elemientaŭ dystancyjnaha navučańnia ŭ horadzie Minsk», — padkreślivajecca asobna.
Ale prablema ŭ tym, što zhadany sajt — do.minsk.edu.by, prosta źloh ad niečakanaj nahruzki.
Užo ciaham dvuch sutak na im nazirajucca pieryjadyčnyja zboi, pravisańni, niemahčymaść zarehistravacca.
Z ulikam taho, što ŭ Minsku vučycca kala 200 tysiač školnikaŭ, a prablemy pačalisia, kali na sajt pačała zachodzić tolki niejkaja častka nastaŭnikaŭ, stanovicca niezrazumiełym, jak čynoŭniki chočuć arhanizavać spravu.
Pres-sakratarka Ministerstva adukacyi Ludmiła Vysockaja ŭ razmovie z karespandentam «Našaj Nivy» adznačyła, što heta nie inicyjatyva ministerstva, a kankretna Minharvykankama, jaki ministerstvu nie padparadkoŭvajecca, tamu jana nie moža skazać, jak školnikam pracavać z hlučnaj płatformaj.
My adrasavali hetaje pytańnie naŭprost dyrektarcy Minskaha haradskoha instytuta raźvićcia adukacyi Taćcianie Maroz.
Taćciana Maroz, skrynšot YouTube
Taćciana Maroz: U nas jość adzinaja płatforma — Moodle, na jakoj my pracujem u dadatkovaj adukacyi darosłych. Nastaŭnikam było prapanavana raspracavać ułasnyja kursy i raźmiaścić ich na hetaj płatformie. Bolš nijakich tłumačeńniaŭ ja dać nie mahu. Adnosna pravisańniaŭ — na hetuju płatformu zahruziłasia vielmi šmat ludziej, jakija nie pavinny byli zahruzicca. Tamu što jana maje peŭny resurs.
«Naša Niva»: Jaki resurs? Bolšy, čym kolkaść školnikaŭ i nastaŭnikaŭ u Minsku?
Taćciana Maroz: Vy zadajecie pytańni, jakija vas, pa sutnaści, nie pavinny chvalavać.
