Ci admieniać u Minsku parad na 9 Maja. Čamu my nie budziem zakuplać rasijskija testy. I čamu ministr zamiežnych spraŭ nie nosić maski. Kiraŭnik MZS Uładzimir Makiej raskazaŭ Tut.by pra rašeńni, jakija prymajucca aficyjnym Minskam u situacyi pandemii.
Pra adsutnaść karancinu i reakcyju rasijskich ŚMI, što krytykujuć Biełaruś
— Ja dumaju, što čas pakaža, chto maje racyju, a chto nie maje racyju. Dla mianie heta absalutna nieprymalna ŭ hetaj situacyi, choć ja nie dumaju, što heta pazicyja ŭsich rasijskich kanałaŭ abo ŭsiaho rasijskaha isteblišmientu. Ale lepš było b pahladzieć, što robicca ŭ siabie ŭ krainie. Tam, u Rasii, čaściakom taksama niezrazumieła, što adbyvajecca: to ŭvodzicca tatalny karancin, to asłablajecca, rehijony pa-svojmu traktujuć dziejańnie režymu karancinu, pradpryjemstvy to na karancinie, to nie začynialisia, jak «Rostsielmaš», to adkryvajucca, jak KamAZ.
I potym, treba pahladzieć na realnyja ličby: u Nižnim Tahile, pa aficyjnych danych, nul vypadkaŭ zaražeńnia COVID-19 (Aficyjna pieršy zaražany ŭ Nižnim Tahile zarehistravany dniom 10 krasavika, — Zaŭv. Tut.by), a da nas ź Nižniaha Tahiła na budaŭnictva AES pryjazdžajuć 15 zaražanych karanavirusam. Tamu lepš by kožnamu hladzieć na toje, što adbyvajecca ŭ siabie pad nosam, a nie sprabavać dadać peŭnaj atrutnaj vadkaści dla raspalvańnia ŭ susiedniaje vohnišča.
Pra paraŭnańnie situacyi ŭ Biełarusi ź Jeŭropaj
— Situacyja ŭ nas našmat adroźnivajecca ŭ lepšy bok u paraŭnańni z šeraham jeŭrapiejskich krain, navat kali brać u pracentnych suadnosinach. I my idziom praktyčna pa toj samaj trajektoryi, jak i susiednija krainy, i pa kolkaści inficyravanych u nas nie takija vialikija ličby.
Pra karancin
— Z majho punktu hledžańnia, my dziejničali davoli razumna i słušna ŭ hetaj situacyi: uvodzili žorstkija karancinnyja i kantralujučyja miery na miežach i ŭ aeraporcie, u vypadkach vyjaŭleńnia tych, chto zachvareŭ, usich izalavali i nie dapuskali kantaktaŭ sa źniešnim śvietam. Tamu łohika rostu kryvoj [zachvorvańnia] adpaviadaje navukovym hrafikam, jakija raspaŭsiudžvała ŭ svaich brašurach SAAZ. Ja nie dumaju, što my tut niejak adroźnivajemsia ad situacyi ŭ inšych krainach. Situacyja ŭ Biełarusi znachodzicca pad kantrolem, i ja nie dumaju, što kali b byŭ uviedzieny tatalny karancin, to tut usio było b pavažna i vysakarodna. […]
— Možna vielmi doŭha spračacca na hetuju temu, jość prychilniki roznych punktaŭ hledžańnia. Ale ja, nazirajučy, jak raźvivajecca situacyja ŭ nas u krainie, nie dumaju, što ŭviadzieńnie tatalnaha karancinu zmahło b źbierahčy nas ad rostu hetaj kryvoj, jaki ŭ lubym razie byŭ by. Napeŭna, mahu pahadzicca z tym, što na pieršapačatkovym etapie treba było bolš transparentnaści, apieratyŭnaści ŭ daviadzieńni infarmacyi [ad uładaŭ], kab u vyniku niedamovak nie ŭźnikała padazreńniaŭ, i tady było b mienš pytańniaŭ.
Pra hatoŭnaść miedykaŭ da pandemii
— Viadoma, kali ŭ sacsietkach čytaješ niejkija asobnyja zajavy [miedykaŭ], składvajecca niehatyŭnaja karcina. Ale, ź inšaha boku, ministr achovy zdaroŭja vałodaje infarmacyjaj, u tym liku, pra najaŭnaść kaściumaŭ i masak, tamu ja dumaju, što treba daviarać tym zajavam, jakija robiacca pa linii Ministerstva achovy zdaroŭja. Nakolki mnie viadoma, prablem z nabyćciom hetych masak niama. Choć bačyŭ, što ŭ aptekach ź imi pytańni. Ale ŭ tavarach dla doma ja asabista bačyŭ šmatrazovyja, bavaŭnianyja, jany pradajucca za 1,65 rubla.
Pra parad
— Davajcie nie budziem zabiahać tak daloka. Ja pierakanany, što ŭłady, kiraŭnictva krainy vydatna ŭśviedamlajuć, ci treba albo nie treba pravodzić hetyja mierapryjemstvy. Rašeńni buduć prymacca, jak ja razumieju, bližej da daty ŭ zaležnaści ad raźvićcia situacyi.
Pra viartańnie biełarusaŭ z-za miažy
— My akazali sadziejničańnie ŭ viartańni na radzimu 6527 hramadzianam. Za minułyja sutki ŭ Biełaruś viarnułasia bolš za 100 čałaviek. Zaraz, pavodle našych acenak, bolš za tysiaču hramadzian znachodziacca ŭ 80 krainach. Heta ŭsio niearhanizavanyja turysty: chtości pajechaŭ na lačeńnie, chtości na vučobu, niechta, akazvajecca ŭ nas takich šmat, jeździć u Indyju na zimoŭku. Ciapier u nas zastalisia čatyry haračyja punkty: kala 200 hramadzian u Indyi, 50 ź ich u paŭnočnych štatach, kala 150 — na Hoa, 170 — u Tajłandzie, 120 — u Vjetnamie i kala 50 — u Šry-Łancy. My pracujem nad pytańniem viartańnia hetych hramadzian. Jość užo ŭzhodnieny ałharytm dziejańniaŭ, dumaju, na praciahu najbližejšych pary tydniaŭ my zmožam zaviaršyć hety praces. Ale pavinien adrazu skazać, što hramadzianie trapili tudy samastojna, tamu vydatki pa ich viartańni im, moža, i nie adrazu, ale pryjdziecca pakryć. Viadoma, dziaržava pavinna kłapacicca pra hramadzian i my pastarajemsia zrabić usio, kab viarnuć našych ludziej dadomu. Paviercie, heta vielmi składana, asabliva ŭ krainach, dzie ŭviedzieny karancin. U Indyi, kab ludziej vyvieźci, treba sabrać paŭtony dakumientaŭ, prajści ŭsie kardony i hetak dalej.
Pra ŭzajemadziejańnie z Kitajem
— My ŭ svoj čas adpravili tudy dva barty ź miedycynskimi tavarami, Kitaj adrazu ž, jak tolki ŭ nas pačała raźvivacca situacyja z pandemijaj, nakiravaŭ da nas bort z testami i miedabstalavańniem. Na nastupnym tydni čakajucca jašče humanitarnyja hruzy ź miedabstalavańniem z Kitaja. Heta ŭsio humanitarnaja dapamoha, my za jaje nie płacili.
Tut jašče vielmi važna, što kitajskija pravincyi i pradpryjemstvy sami vychodziać na vobłaści-pabracimy i pradpryjemstvy-partniory ŭ Biełarusi i prapanujuć svaju dapamohu. Spačatku heta ŭsio było stychijna, ale zaraz my akumulujem usio ŭ pasolstvie, składajem śpis taho, što nam chočuć pieradać z Kitaja, i adpraŭlajem jaho ŭ Respublikanski centr arhanizacyi miedycynskaha reahavańnia. Jany i źjaŭlajucca atrymalnikami hetych hruzaŭ.
My, viadoma ž, udziačnyja našym kitajskim partnioram za žadańnie aktyŭna ŭzajemadziejničać i dapamahčy Biełarusi ŭ hetych umovach.
Pra rasijskija testy
— Tak, Rasija pieradała nam taki hruz [10 tysiač test-sistem — Red.]. My pieradali hetyja testy ŭ rehijony, na pamiežnyja pierachody, kab praviarać tranzitnych pasažyraŭ z Rasii, dalnabojščykaŭ z Rasii i na AES. My, viadoma, udziačnyja, ale 10 tysiač testaŭ — heta na 2,5 dnia pracy — u nas kožny dzień pa krainie raschodujecca kala 4 tysiač testaŭ. […]
— Hetyja 10 tysiač byli biaspłatnymi. U nas vialisia pieramovy ź dźviuma rasijskimi kampanijami pa nabyćci jašče 30 tysiač testaŭ, ale hetyja pieramovy zastaparylisia. Adnak nam ciapier hetyja testy i nie patrebnyja: my sami vyrablajem testy, a jašče kala 50 tysiač testaŭ my atrymali ź inšych krain. Tym bolš hałoŭny ŭrač infiekcyjnaj balnicy ŭ Kamunarcy Dzianis Pracenka skazaŭ, što rasijskija testy nienadziejnyja, jany dajuć imaviernaść vyjaŭleńnia karanavirusa kala 60%. Tak što nam ciapier hetyja testy nie patrebnyja.
Pra rasijskuju «dapamohu»
— Nam by samim chaciełasia zrazumieć, pra jakuju dapamohu idzie havorka [Učora Dźmitryj Piaskoŭ zajaviŭ, što Rasija dapamahaje Biełarusi ŭ baraćbie z karanavirusam — Red.]. Moža, dapamoha ŭ tym, što niečakana zakryli miežy, pastaviŭšy nas u takoje stanovišča? Ja da hetaha času ŭspaminaju z dryžykami, kali na pieršapačatkovym etapie my atrymlivali infarmacyju pra toje, što našych hramadzian, u jakich byli bilety na samaloty pa linii rasijskich turapierataraŭ, prosta vykidali z samalota. Navat siemji padzialali: kali muž biełarus, a žonka — rasijanka, na rejs sadžali tolki žonku. Byli vypadki, kali sprabavali padzialić 5-hadovaha biełarusa z baćkam-rasiejcam. Ale heta było, viadoma, na pieršapačatkovym etapie. Paśla našych nastojlivych zvarotaŭ da rasijskich kalehaŭ situacyja bolš-mienš naładziłasia.
Ci ž voś hetyja 15 zaražanych čałaviek pryjechali ź Nižniaha Tahiła — heta taksama dapamoha Rasii? Boham prašu, my ŭsich vylečym, usim dapamožam, spravimsia z usim. Ale chaciełasia b, kab, kali robiacca zajavy, jany mieli pad saboj padstavy.
Pra abaronu ad karanavirusa
— Viadoma, kantakty značna abmiežavanyja. My rehularna pravodzim narady pa peŭnych pytańniach u Administracyi prezidenta, a ŭ Ministerstvie ja imknusia vyklikać svaich padnačalenych radziej i havaryć ź imi pa telefonie. Ja zabaraniŭ źjaŭlacca ŭ Ministerstvie tym, chto čchaje ci adčuvaje siabie chvorym, kab jon nie zaraziŭ inšych. Pry najmienšym prajaŭleńni prastudy, čałavieka adpraŭlajem da ŭrača. U značnaj miery my starajemsia zaścierahčysia ad mahčymaha zaražeńnia. Ale ščyra chaču skazać, mnie niejak soramna nadziavać masku, kali idzieš u kramu.
