Ukrainski deputat Anton Palakoŭ. Fota ź jaho staronki ŭ fejsbuku.
Vydatny prykład taho, jak u demakratyčnaj krainie sa słabymi dziaržaŭnymi instytutami ŭsiaho adzin noname deputat moža paralizavać dziejnaść parłamienta i nablizić krainu da defołtu.
Nie sakret, što Ukraina vielmi mocna zaležyć ad mižnarodnych finansavych instytutaŭ. Heta, viadoma, nie vielmi dobra, ale ŭ hetym jość prynamsi adzin vialiki plus. Takaja zaležnaść Ukrainy ad mižnarodnych arhanizacyj źjaŭlajecca mocnaj i nadziejnaj harantyjaj pradaŭžeńnia reform, chto b ni byŭ va ŭładzie. Mižnarodnyja finansavyja struktury kažuć adkryta: «utrom stulja — viečierom dieńhi», siońnia reformy, a zaŭtra kredyty.
Dla taho kab Ukraina zmahła atrymać čarhovy kredyt, MVF niadaŭna zaklikaŭ krainu pryniać zakon adnosna ŭdaskanaleńnia struktury rehulavańnia ŭ bankaŭskim siektary. Zakon hety nazvali «antykałamojskim», bo jon nie dazvalaŭ by ŭkrainskamu aliharchu Iharu Kałamojskamu viarnuć svoj «Pryvatbank», jaki byŭ nacyjanalizavany ŭkrainskaj dziaržavaj pry Parašenku. U pieršym čytańni Viarchoŭnaja Rada siak-tak, ale prahałasavała za hety zakon. A dalej pačałosia samaje cikavaje…
Siem deputataŭ, mińjonaŭ Kałamojskaha, padali da «antykałamojskaha» zakonaprajekta bolš za 16 000 (!) papravak. Takuju kolkaść papravak Rada budzie razhladać jak minimum miesiacy, što paralizuje dziejnaść ukrainskaha parłamienta i moža pryvieści, va ŭmovach karanavirusa, prosta da defołtu dziaržavy, bo Ukraina moža nie atrymać hrošy ad MVF.
Rekardsmienam staŭ były deputat ad «Słuhi narodu», a ciapier pazafrakcyjny Anton Palakoŭ. Jon unios ažno 6033 praŭki. U Palakova i inšych deputataŭ było 7 dzion, kab dadać svaje praŭki. Heta značyć, Palakoŭ štampavaŭ praŭki ź siaredniaj chutkaściu 1 praŭka za 100 siekund. Kruhłasutačna, bieź pierapynkaŭ na son, 7 dzion zapar. Anamalnaja aktyŭnaść dla deputata, jaki ad vieraśnia ŭnios usiaho 50 pravak.
Ciapier hety noname deputat, jak kłasičny teraryst, vystaŭlaje svaje patrabavańni dla adklikańnia papravak.
Kałamojski, naturalna, kaža, što jon tut ni pry čym.
