«Radyjo Svaboda» chacieła razabracca, što nasamreč adbyvajecca ŭ Dokšycach. Ale z rajonnaha centra z nasielnictvam 7 tysiač čałaviek pryvieźli bolš pytańniaŭ, čym adkazaŭ. «Svaboda» źjeździła ŭ «haračy» rajon na Viciebščynie, dzie dva špitali ciapier prymajuć chvorych na pnieŭmaniju, a ŭłady tym časam nastojliva admaŭlajuć prablemu.
«Prosta katastrofa». Z takoj ščylnaściu chvorych jak u Dokšycach, u Minsku byli b zaniatyja 11 balnic
Ułady ličać, što ŭ Dokšycach niama ničoha nadzvyčajnaha. Namieśnica ministra achovy zdaroŭja Alena Bohdan 10 krasavika tak adkazała na pytańnie pra situacyju ŭ rajonie: «Čamu heta nadzvyčajnaja sytuacyja? Heta prahnazavanaja i čakanaja nami situacyja», — skazała Bohdan.
Zusim inšaja dumka ŭ žycharoŭ Dokšyc.
«Vy ž ź Minska pryjechali, moža vas tam pačujuć? Nam tut patrebny karancin», — kažuć pradavački ŭ kramie, jakaja mieścicca pa darozie da špitala. Na ŭvachodzie tut antysieptyk. Supracoŭniki — u maskach. Na padłozie naklejenyja znaki, kab ludzi ŭ čarzie trymali pamiž saboj dystancyju.
Što takoha zdaryłasia ŭ hetym nievialikim horadzie na Viciebščynie, što ludzi prosiać žurnalistaŭ napisać pra karantyn. Da niadaŭniaha času tut tolki chadzili čutki pra pierapoŭnieny špital. Ludzi z dyjahnazam «pnieŭmanija» masava pastupali spačatku ŭ Dokšyckuju centralnuju rajonnuju balnicu, a potym i ŭ Biahomlskuju balnicu (Biahoml uvachodzić u skład Dokšyckaha rajona).
8 krasavika źviestki pra ŭsplosk pnieŭmanij u rehijonie paćvierdziła zahadčyca rajonnaj palikliniki Valancina Vieštart. U intervju rajonnaj haziecie «Rodnyja vytoki» jana paviedamiła, što pa stanie na 7 krasavika zafiksavana 85 pacyjentaŭ ź pnieŭmanijaj.
Čamu navat aficyjnyja źviestki pra 85 čałaviek — heta vielmi šmat? U Dokšycach žyvie 7 tysiač čałaviek. Ahułam va ŭsim rajonie — 22,4 tysiačy. Kali b takaja ž praporcyja chvorych na pnieŭmaniju była ŭ Miensku, heta skłała b 7600 čałaviek. Dla razumieńnia, u 1-j haradskoj kliničnaj balnicy ŭ Minsku majecca 650 kojka-miescaŭ. To bok, byli b całkam zapoŭnienyja 11 takich špitaloŭ.
«Ja 35 hadoŭ pracuju tut u špitali i ničoha padobnaha tut nie było, jak ciapier, — raspaviadaje miedsiastra, jakaja skončyła svaju źmienu i viartajecca dachaty. — Heta prosta katastrofa».
Pa jaje słovach, novych chvorych pryvoziać štodnia. Ale kolki dakładna ciapier lažyć čałaviek — nieviadoma.
«Nam nichto ničoha nie raskazvaje. I my viedajem tolki toje, što bačym u siabie ŭ kabiniecie. Ale ludziej proćma. Vam nie pieradać», — kaža miedsiastra.
«Sama nie vychodžu i dziaciej užo katory tydzień nie puskaju nikudy»
Ludziej na vulicach horada vobmal. Niekatoryja pryvatnyja kramy i kaviarni sami začynilisia i adpuścili supracoŭnikaŭ u adpačynki, kab pieračakać epidemiju. Chto maje mahčymaść, starajecca nie vychodzić z domu.
«Ja sama nie vychodžu i dziaciej užo katory tydzień nie puskaju nikudy», — kaža pa telefonie žančyna, čyj baćka pamior ad pnieŭmanii ŭ špitali paru dzion tamu. Pa papiarednich analizach joj skazali, što śmierć nie źviazanaja z karanavirusam. Ale ciapier daktary robiać dadatkovyja analizy. Vyniki buduć u paniadziełak.
Ad svajakoŭ na siońnia redakcyi viadoma prynamsi pra adzin śmiarotny vypadak ad pnieŭmanii tolki za apošnija sutki. Raniej «Naša Niva» pisała jašče pra try śmierci ad pnieŭmanii. Siarod ich nie było paćvierdžanych vypadkaŭ karanavirusa.
Taksama «Svabodzie» viadoma prynamsi pra dvaich čałaviek, u kaho paćvierdžany karanavirus. Zahadčyca rajonnaj palikliniki kazała, što vypadki karanavirusa ŭ Dokšyckim rajonie možna «pieraličyć pa palcach».
My datelefanavalisia da žančyny z paćvierdžanym karanavirusam, jakaja ciapier znachodzicca ŭ špitali. Jana raspaviała, što špital całkam pieraabstalavali pad pryjom chvorych na pnieŭmanii. Chirurhičnaje, hiniekałahičnaje adździaleńnie — paŭsiul ciapier kładuć ludziej z zapaleńniem lohkich.
Žančyna lažyć u pałacie jašče z adnoj pacyjentkaj, u kaho paćvierdžany karanavirus. Jana tolki viedaje, što jość i inšyja sa stanoŭčym testam na COVID-19. Ale kolki ich — joj nieviadoma.
«Spačatku tut navat žartavali, što heta karanavirus dabraŭsia da Dokšyc»
I naša surazmoŭca, i jaje susiedka pa pałacie apošnim časam nie vyjazdžali za miažu. Jany navat za miežami rajona nie byli. I dzie mahli padchapić karanavirus, jany nie viedajuć.
«Ludzi pačali chvareć z druhoj pałovy sakavika, — raspaviadaje nam inšaja žančyna, čyje baćki ciapier lažać ź pnieŭmanijaj u špitali. — Chadzili, kašlali. Spačatku tut navat žartavali, što heta karanavirus dabraŭsia da Dokšycaŭ. A ciapier voś chavajemsia pa chatach».
Kolki žycharoŭ Dokšyckaha rajona zachvareli na COVID-19? Kolki dakładna ludziej pamierli ad pnieŭmanii? U kolkich siarod ich byŭ karanavirus? Voś jakija aficyjnyja adkazy ŭdałosia siońnia atrymać:
«Ja pra ličby havaryć nie budu. Jość chvoryja ŭ Dokšyckim rajonie, jak i ŭ mnohich inšych rajonach», — skazała namieśnica ministra achovy zdaroŭja Alena Bohdan paśla presavaj kanferencyi 10 krasavika.
«Staršyni ciapier niama. Namieśnik pa sacyjalnych pytańniach u nas u adpačynku. Supracoŭnika adździeła ideałohii niama na miescy. Pa telefonie na dadzieny momant vy ni z kim nie pahavorycie», — adkazali ŭ pryjomnaj rajvykankama.
«Ja nie dam vam takoj infarmacyi. Siarhiej Fiodaravič, hałoŭny doktar, moh by, ale jon u reanimacyi. I pracuje i kansultuje», — adkazali ŭ pryjomnaj Dokšyckaj centralnaj rajonnaj balnicy.
«Kali b ułady adrazu kazali, jak jość, nie było b takoj surjoznaj prablemy»
Nie čakajučy paradaŭ ad uładaŭ, ludzi sami dajuć rady epidemii. My sustreli niekalki čałaviek, jakija ŭ apošni čas zvolnilisia sa špitala.
«Bo prosta nie chaču prynieści hetuju zarazu dachaty i zarazić unukaŭ», — nieachvotna raskazaŭ adzin ź ich.
Mužčynu nie było składana zvolnicca, bo jon piensijanier. Ale, kab nie epidemija, jon by i dalej pracavaŭ.
«Kolki hadoŭ ja ŭ špitali, dyk kaściumy abarončyja tolki padčas vučeńniaŭ bačyŭ. Heta treniravali ŭciečku amijaku, ci jašče što. A ciapier tut usio surjozna», — kaža jon.
Jon i inšyja admaŭlajucca fatahrafavacca i zdymacca na videa. Navat na piensii, kali nie pahražaje zvalnieńnie, ludzi raspaviadajuć svaje historyi, prosiačy nie ŭkazvać ichnych imionaŭ.
Pakul nieviadoma, chto staŭ nulavym pacyjentam i zavioz karanavirus u Dokšycy. Nakont hetaha jość tolki čutki. Ale ludzi bolš zadajucca pytańniem, čamu miascovyja ŭłady svaim maŭčańniem daviali situacyju ŭ cełym rajonie da epidemii. Bo kali b ad samaha pačatku jany paviedamili, što pa horadzie raspaŭsiudžvajecca virus, chvorych było b našmat mieniej.
«Ludzi pačali nadziavać maski tolki paśla čutak, što špital pierapoŭnieny chvorymi na pnieŭmaniju, — kaža miascovy pradprymalnik, jaki ciapier redka vychodzić z domu. — A kab ułady adrazu kazali, jak jość, nie było b takoj surjoznaj prablemy».
