Vasil Lipilin
Usie rytualnyja słužby i zali ŭ Barysavie admovilisia pravieści raźvitańnie, kali daviedalisia, što ŭ pamierłaha byŭ karanavirus. Adpiavać 50-hadovaha felčara chutkaj dapamohi Vasila Lipilina pahadziŭsia tolki adzin śviatar, piša «Radyjo Svaboda».
«Navošta zanižać hetuju statystyku, čaho chočuć dabicca?»
«Mnie 20 hadoŭ, ja adziny syn Vasila Hieorhijeviča, — kaža ŭ razmovie z «Radyjo Svaboda» Daniił Lipilin.
17 krasavika padčas presavaj kanfierencyi ministar achovy zdaroŭja Ŭładzimier Karanik skazaŭ, što śmierć «na chutkaj dapamozie» moža być nie źviazanaja z karanavirusam.
Daniił Lipilin ličyć, što ministr maje na ŭvazie śmierć jahonaha baćki.
«Uvieś horad viedaje, čałaviek vielmi viadomy ŭ horadzie, usie viedali pryčynu śmierci. I mnie siońnia skidvajuć hety artykuł, ja čytaju, mnie sapraŭdy baluča čytać. Što robić našaja kraina? Ja adziny syn, chto zastaŭsia ŭ Vasila Hieorhijeviča, u mianie daviedka na rukach, što KV-19, adkrytym tekstam. Ja nia vytrymaŭ i źmiaściŭ u kamentarach fatazdymak. Navošta zanižać hetuju statystyku, čaho chočuć dabicca? Ja ščyra nie razumieju», — kaža Daniił Lipilin i apaviadaje historyju chvaroby i śmierci svajho baćki.
«Jon zachvareŭ niedzie 26 sakavika. Jamu stała kiepska — temperatura, usie symptomy, jakija na siońnia ŭsie ludzi ŭžo viedajuć», — Daniił kaža, što ŭ pieršyja dni baćka sprabavaŭ lačycca sam i paprasiŭ kaleh pamianiacca źmienami.
«Ale stan jaho nie mianiaŭsia, jon pajšoŭ u palikliniku, jamu adkryli balničny, ale adpravili dachaty, prapisali antybijotyki, — praciahvaje chłopiec. — Jon usio rabiŭ, jak skazali, ale lepš nie stanaviłasia, temperatura 39,5 biaź źmienaŭ. Paliklinika našaja №2 skazała: «Zastavajciesia doma, lačyciesia». Špital jamu nichto nie prapanoŭvaŭ».
4 krasavika, kaža Daniił, baćka ŭžo nia moh razmaŭlać, stan jahony byŭ vielmi kiepski. Jamu vyklikali chutkuju dapamohu i zabrali ŭ špital.
«Tam pakłali ŭ reanimacyju ŭ ciažkim stanie z vysokaj temperaturaj. Jamu rabiłasia ŭsio horš, tamu pakłali pad aparat štučnaj ventylacyi lohkich, — kaža Daniił. — Sam doktar z reanimacyi ŭžo daŭ zrazumieć, što šancy małyja».
«Jon nia dumaŭ, što pamre»
Pieršy test na karanavirus, jaki Vasilu Lipilinu zrabili 5 krasavika, z synavych słovaŭ, byŭ admoŭny. Druhi test ad 7 krasavika ŭžo byŭ stanoŭčy. Kali baćka byŭ na aparacie štučnaj ventylacyi lohkich, apaviadaje chłopiec, byŭ momant, kali jamu troški palepšała.
«U nas adrazu inšyja dumki źjavilisia, stali spadziavacca na lepšaje. Ale baćkava serca nia vyciahnuła. 8 krasavika patelefanavali i skazali: «Vašaha baćki bolš niama», — kaža Daniił.
Daniił apaviadaje, što baćka nikoli nia skardziŭsia na chvaroby i nikudy nie źviartaŭsia pa lačeńnie. Na «chutkaj» jon pracavaŭ u bryhadzie psychijatryčnaj dapamohi.
«Jon svajoj siastry napisaŭ: «Ja dumaju, što ŭ mianie «heta», bo padobnyja symptomy», — kaža syn. — Apošniaja razmova była zvyčajnaja, ničoha zvyšasablivaha. Jon nia dumaŭ, što pamre. I my nia dumali, pakul užo zusim kiepska nia stała».
Raźvitacca nie dazvolili, na mohiłkach byli čatyry čałavieki
Cieła Vasila Lipilina adpravili ŭ Miensk dla ŭskryćcia.
«Ja ź Miensku cieła zabiraŭ, razmaŭlaŭ z patolahaanatamam, jaki vydaŭ daviedku. Tam dakładna paznačana: karanavirus i dvuchbakovaja pneŭmanija. Na ŭsiu krainu skazali, što felčar z Barysava pamior ad karanavirusu», — apaviadaje Daniił.
Chavali Vasila Lipilina ŭ zakrytaj trunie, cieła było ŭ ščylnym polietylenavym pakiecie, kaža syn.
«Chacieli zrabić raźvitańnie, bo baćka nie apošni ŭ horadzie čałaviek, jaho šmat chto viedaŭ, usie chacieli raźvitacca pa-čałaviečy. Ale nichto nie dazvoliŭ. Prosta z morhu praz Barysaŭ prajechali kartežam na mohiłki. Na mohiłkach byli 4 čałavieki. Nu što heta takoje?! — syna hetaja sytuacyja aburaje. — Čałaviek 27 hadoŭ adpracavaŭ na chutkaj dapamozie, a jaho chavajuć čatyry čałavieki. Što robicca, nie razumieju, mnie prosta soramna».
Daniił apaviadaje, što dla raźvitańnia z baćkam siamja chacieła arandavać rytualnuju zalu.
«Ale ŭsie rytualnyja zali horadu prosta admovilisia, kali daviedalisia, što hety čałaviek byŭ z karanavirusam, — kaža chłopiec. — Anivodzin klub, anivodzin štab aficeraŭ i inšyja arhanizacyi — usie admovili. My chacieli zrabić raźvitańnie kala stancyi chutkaj dapamohi, ale i tam zabaranili».
«Raźbiehlisia», kaža Daniił, navat śviatary. «Adpiavaŭ baćku adziny, chto pahadziŭsia, — ajciec Andrej. Dziakuj vialiki jamu za heta».
«Ja nie źbirajusia maŭčać. Ja nie bajusia»
Jon tłumačyć, što jany z baćkam žyli asobna i padčas jahonaj chvaroby asabista nie sustrakalisia. Testu na karanavirus u Daniiła nia brali.
«U žančyny, ź jakoj jon žyŭ, uziali test, nakolki ja viedaju, jon admoŭny. U jahonaj bryhadzie ŭ «chutkaj», viedaju, taksama brali, nibyta tam jość stanoŭčyja vyniki. Ale ja dakładna nia viedaju. Jany pakul na balničnych», — raskazvaje Daniił.
«Ja siońnia rankam pračnuŭsia i pračytaŭ, što ministar achovy zdaroŭja Karanik, jaki ŭ pieršyja dni pryznaŭ, što medyčny rabotnik zachvareŭ, pamior, ciapier kaža advarotnaje. Ja nie źbirajusia maŭčać. Ja nie bajusia, — kaža Daniił. — Ja hatovy hetuju spravu davieści da kanca. Kali ŭsio ž taki karanavirus, jak napisana ŭ daviedcy, to navošta heta chavać?»
«Radyjo Svaboda» źviarnułasia ŭ pres-słužbu Ministerstva achovy zdaroŭja z prośbaj patłumačyć słovy ministra Ŭładzimiera Karanika. Na momant publikacyi adkazu nie atrymali.
Pavodle infarmacyi, ahučanaj na pres-kanfierencyi Ministerstva 17 krasavika, u Biełarusi nia mienš za 419 medykaŭ infikavanyja karanavirusam. 90 ź ich — supracoŭniki «chutkaj dapamohi».
