Minski dyzajnier Ihnat Płotnikaŭ pracuje ŭ IT-kampanii i čas ad času dla dušy robić roznyja prajekty, źviazanyja z palapšeńniem vizualnaha asiarodździa Minska i Biełarusi. Siońnia dyzajnier pradstaŭlaje svoj varyjant anšłahaŭ (adrasnych tabličak) dla Minska. Pra dyzajn-rašeńnie napisaŭ internet-časopis pra Minsk citydog.by.
Dyzajnier zaŭvažyŭ, što ŭ Minsku na damach visiać roznyja tablički, vielmi roznyja: «Ja nie mahu zrazumieć, čamu numar doma i nazva vulicy napisana zusim roznym šryftam. Čamu ŭ nazvy jość zasiečki, a ŭ numara niama? I čamu doŭhaja nazva nabrana takim vuzkim šryftam, jak byccam jaho prosta miechanična ścisnuli?» — dzivicca Ihnat.
Jon raspavioŭ, čym natchniaŭsia pry stvareńni novych adrasnych pakazalnikaŭ:
— Starymi śvietłymi i ciomnymi savieckimi tabličkami, jakija jašče možna znajści na niekatorych budynkach i na starych fotazdymkach. Napeŭna, mnohija pamiatajuć biełyja tablički ź sinim šryftam, a niekatoryja mahli zaŭvažyć i jašče bolš staryja i redkija — ciomnyja prykłady, jak na płoščy Pieramohi.
Fota starych minskich tabličak. Krynicy: Onliner.by, alamy stock photo, nieviadomyja krynicy
— Dla svaich tabličak ja abraŭ formu prostaha pramavuholnika, dla vyraznaści dadaŭ «vuški», kab macavać da ściany, — pradstaŭlaje svoj prajekt Ihnat. — Tablička płoskaja i mietaličnaja i vykonvajecca ŭ 4 asnoŭnych pamierach, dziakujučy čamu karotkija i doŭhija nazvy vulic hladziacca adnolkava harmanična.
U vierchniaj častcy tablički napisany numary damoŭ źleva i sprava, kab dapamahčy čałavieku zaryjentavacca i vybrać kirunak.
Dla tabličak abrany šryft padvyšanaj čytelnaści FF DIN (Alternate), stvorany ŭ pieršaj pałovie XX stahodździa i šmat razoŭ dapracavany i dapoŭnieny. Darečy, raznavidnaść mienavita hetaha šryfta vykarystoŭvajecca na našych aŭtamabilnych numarnych znakach.
Na tabličkach u centry horada i miescach, cikavych dla zamiežnikaŭ, dadadzienaja tranślitaracyja.
Na damach u pačatku vulicy možna raźmiaścić infarmacyju pra čałavieka abo padziei, u honar jakoha ci jakoj nazvanaja vulica.
Asobnuju ŭvahu treba nadać raźmiaščeńniu tablički i numara na budynku. Tablička pavinna być raźmieščana na bačnym miescy z boku vulicy i harmanična ŭpisvacca ŭ architekturu budynka: naprykład, pasiaredzinie pamiž krajem budynka i akonnym prajomam. Jana pavinna być prymacavanaja tak, kab čałavieku nie treba było vysoka zakidać hałavu.
Adrasnaja tablička schavanaja za kałonaj na budynku na Niezaležnaści, 84a
Jak ciapier, jak za miažoj — i jak mahło b być u Minsku
— Ja z radaściu padaru prajekt Minharvykankamu, kali jon im cikavy, — zapeŭnivaje Ihnat.
