Hrupa apazicyjnych palitykaŭ zaklikała biełarusaŭ praciahvać «Narodny karancin» až da spadu epidemii. Jany taksama zaklikali ludziej nie vykonvać «złačynnych zahadaŭ i rasparadžeńniaŭ». 

Zvarot padpisali Pavieł Sieviaryniec, Uładzimir Niaklajeŭ, Mikoła Statkievič, Andrej Sańnikaŭ i Jury Chaščavacki.

«Na žal usio, čaho my z vami aścierahalisia, adbyvajecca ŭ paskoranym tempie», — pišuć jany ŭ zvarocie.

Kiraŭniki apazicyi miarkujuć, što ŭ maštabach epidemii ŭ Biełarusi vinavataja palityka ŭładaŭ.

«Vykazvajem ščyryja spačuvańni siemjam i blizkim zahinułych. Heta naš usich bol».

«Złačynstvy, jakija pryviali da nieapraŭdana vialikaj kolkaści śmierciaŭ u Biełarusi, abaviazkova buduć rasśledavanyja», — abiacajuć palityki.

«Miljony biełarusaŭ užo ŭśviadomili, nakolki niebiaśpiečna vykonvać rasparadžeńni nieadekvatnych uładaŭ, i prosta ihnarujuć čarhovyja prystupy ich fieadalnych pavodzin, — miarkujuć palityki. — Niadaŭna našu z vami pravatu paćvierdziła misija Suśvietnaj arhanizacyi achovy zdaroŭja, jakaja vykazała tryvohu ŭ suviazi ź situacyjaj u Biełarusi», — pišacca ŭ zvarocie.

«Soramna, što Biełaruś siońnia fihuruje ŭ zahałoŭkach suśvietnych ŚMI jak prykład idyjockich pavodzin padčas pandemii», — havorać palityki.

«Funkcyi ŭrada dla vyratavańnia ludziej siońnia ŭziali na siabie lekary, miedycynski piersanał, vałanciory, usie tyja, chto ŭ pieršasnym sensie padtrymlivaje žyćcio ŭ našaj Biełarusi. Nizki im pakłon i ščyraja padziaka», — pišuć palityki.

«Narodny karancin pavinien praciahvacca da taho času, pakul my nie damo rady vybuchu karanavirusa. Pavodle prahnozaŭ, častkovaje asłableńnie epidemii ŭ Biełarusi mahčymaje ŭ červieni, kali my budziem dalej prymać adekvatnyja zachady. My zaklikajem hramadzian Biełarusi praciahnuć Narodny karancin da kanca maja, — pišuć palityki. — Davajcie prytrymlivacca rekamiendacyj misii SAAZ, paradaŭ pradstaŭnictva AAN u Biełarusi. Bieražycie siabie, svaich rodnych i blizkich, svaich siabroŭ.

Žyvie Biełaruś!»

Клас
0
Панылы сорам
0
Ха-ха
0
Ого
0
Сумна
0
Абуральна
0