Na hety momant zaniata kala 12,8 tysiač balničnych łožkaŭ, zareziervavanych pad chvorych z COVID-19 i pnieŭmanijami. Hetuju ličbu ahučyli ŭ efiry telekanała «Biełaruś 1» 2 maja.
Na dziaržaŭnym kanale zajavili, što pad chvorych z COVID-19 i pnieŭmanijami ŭ krainie vydzielena 18,6 tysiač balničnych łožkaŭ. Zaniata na hety momant kala 12,8 tysiač. Svabodnymi zastajucca trochi mienš za 6 tysiač miescaŭ.
Apošnija niekalki tydniaŭ ludziej ź lohkimi formami COVID-19, a ŭ mnohich rehijonach — i ź niaciažkimi pnieŭmanijami nie špitalizujuć, a pakidajuć lačycca doma, u samaizalacyi. Takim čynam, možna mierkavać, što na siońnia my majem spravu z amal 13 tysiačami špitalizavanych pacyjentaŭ ź pnieŭmanijami.
Pavodle raniejšych źviestak ź inšych krain, pnieŭmanija raźvivajecca prykładna ŭ 13—20% chvorych na karanavirus.
U toj ža čas treba razumieć, što nie ŭsie pnieŭmanii — karanavirusnyja. Mnohija ludzi mohuć chvareć i na tradycyjnyja, raniej viadomyja vidy pnieŭmanij. Tym nie mienš, u suviazi z asablivaściu situacyi, pry raźmiaščeńni chvorych u mnohich krainach ciapier usie pnieŭmanii razhladajuć jak patencyjna karanavirusnyja.
Uvieś minuły miesiac ułady Biełarusi admaŭlalisia ahučvać statystyku pnieŭmanij, apraŭdvajučy taki padychod niežadańniem sparadžać paniku. Adnak adsutnaść detalovaj infarmacyi, naadvarot, pryviała da masavaha niedavieru da aficyjnaj statystyki i raspaŭsiudu čutak.
24 krasavika na bryfinhu ŭ Minsku namieśnica ministra achovy zdaroŭja Alena Bohdan paviedamlała, što ciapier u Biełarusi zadziejničana pałova z balničnych łožkaŭ, zareziervavanych dla lekavańnia pacyjentaŭ z karanavirusnaj infiekcyjaj.
Jana zajaviła tady, što ŭ reziervie pad lekavańnie pacyjentaŭ z karanavirusam zastajecca kala 9500 łožkaŭ, bolš za 600 ź ich abstalavanyja aparatami štučnaj vientylacyi lohkich.
Takim čynam, kali zychodziać z ahučanych ličbaŭ, za 8 apošnich dzion kolkaść špitalizavanych ź pnieŭmanijami ŭ krainie vyrasła prykładna na 3500 čałaviek.
«Naša Niva» nie moža pravieryć dadzienych ličbaŭ, jak i inšaj statystyki, jakuju padaje Minzdaroŭja, bo ličby pa rajonach nie ahučvajucca.
Usiaho ŭ Biełarusi, pa źviestkach Biełstata, prykładna 80 tysiač (pa inšaj mietodycy padliku — kala 105 tysiač) balničnych łožkaŭ i 2300 aparataŭ štučnaj vientylacyi lohkich. Pa hetych pakazčykach Biełaruś adnosicca da hrupy samych zabiaśpiečanych u śviecie krain.
U baraćbie z karanavirusam zadziejničana 18% ad ahulnaj kolkaści daktaroŭ i 18% ad kolkaści siaredniaha miedpiersanału, zajaŭlała Alena Bohdan. Kavidnikaŭ ciapier prymajuć bolšaść kliničnych balnic u Minsku i rehijonach, pad infiekcyjnyja špitali pieraprafilavanyja mnohija ankałahičnyja, tubierkuloznyja i skurna-vienierałahičnyja balnicy ŭ abłaściach i Minsku. Jak pulmanołahi ciapier pracujuć mnohija kardyjołahi, urołahi, śpiecyjalisty inšych profilaŭ.
Pa raniej ahučanaj statystycy Minzdaroŭja pa stanie na ranicu 2 maja ŭ Biełarusi zafiksavana 15 828 vypadkaŭ karanavirusa.
Minzdaroŭja paviedamlała, što ŭžo vyzdaravieli 3117 pacyjentaŭ. Takim čynam, havorka išła pra 12711 aktyŭnych vypadkaŭ COVID-19. Pa stanie na 24 krasavika špitalizavana była prykładna pałova pacyjentaŭ z COVID. Druhaja pałova lekavałasia doma.
Z takoj ekstraardynarnaj situacyjaj čałaviectva nie sutykałasia ŭžo šmat dziesiacihodździaŭ. Jak dalej budzie raźvivacca pandemija, zaležyć ad taho, jakija karancinnyja miery buduć prymać krainy i jak ich vykonvać. Na siońnia mnohija krainy, siarod jakich Kitaj, Paŭdniovaja Kareja, Novaja Ziełandyja, Łatvija, Isłandyja, Słavienija, Litva, Čechija źviali kolkaść zaražeńniaŭ da minimumu. U niekatorych inšych karanavirus praciahvaje bušavać.
Čytajcie taksama: Minčanka raskazała, jak jaje siamja lečycca ad karanavirusa i jak daktary navat biez testaŭ vyznačajuć «kavidnych» pacyjentaŭ
