U novaj sieryi «Łabiryntaŭ» «Saturnijanskija chroniki Jazepa Drazdoviča» my vybieramsia ŭ vandroŭku na inšuju płanietu razam z mastakom i jahonym siabram, paetam Michasiom Mašaram.

Siońnia Jazep Drazdovič — adzin z samych papularnych mastakoŭ Biełarusi, a admysłoŭcy paraŭnoŭvajuć jahonyja padarožžy na inšyja płaniety z navukovymi ekśpierymientami psichołaha Karła Junha.

«Toje, što sam Drazdovič nazyvaŭ kasmavizijami, ci samnambuličnymi snami, u navucy nazyvajecca lucydnymi snami. Lucydny son — heta taki svojeasablivy stan psichiki, heta snabačny stan, ale ŭ strohim sensie jon nie jość son. Jon charaktaryzujecca abudžeńniem śviadomaści čałavieka ŭ śnie. Na svoj ułasny zapyt Drazdovič moh pieramiaščacca ŭ prastory, jon moh traplać u tyja častki inšych śvietaŭ i płaniet, u jakich jon chacieŭ pabyvać», — tłumačyć Halina Horava, mastačka, kandydat mastactvaznaŭstva.

Mastak razam ź siabram Michasiom Mašaram vypraŭlajecca ŭ niebiaśpiečnyja pryhody na dapamohu karalevie Saturna. 

Padarožžy na dalokija płaniety Drazdovič apisvaŭ u svaich tvorach mastactva i litaratury. Adnak navat siabry śmiajalisia z mastaka, a jahonyja apaviadańni pra padarožžy na inšyja płaniety ličyli varjackimi vydumkami. Sam ža Drazdovič śćviardžaŭ, što ŭ jahonych apoviedach i karcinach niama nijakaj vydumki — tolki toje, što jon sam bačyŭ na ŭłasnyja vočy.

«Jon ličyŭ, što vałodaje daram jasnabačańnia i dziakujučy hetamu daru moža ŭbačyć vielmi šmat taho, čaho nie bačyć inšy čałaviek, prosty čałaviek. I tamu jon sapraŭdy vielmi adroźnivaŭsia ad svaich adnadumcaŭ, svaich kalehaŭ. Jon zajmaŭsia tvorčaściu, jakaja pierš za ŭsio pakazvała nam jahony idealny śviet, jaki jon stvaraŭ na svaich pałotnach, a nie toj śviet, jaki jon bačyŭ vakoł siabie», — kaža mastactvaznaŭca Volha Archipava.

Pahladzieć na niepaŭtorny kaśmičny śviet Jazepa Drazdoviča zaprašajuć vas hieroi dy aŭtary čarhovaha filma z cykłu «Łabirynty».

Hladzieć inšyja sieryi «Łabiryntaŭ»

Клас
1
Панылы сорам
0
Ха-ха
0
Ого
0
Сумна
0
Абуральна
0