Fota Dźmitryja Bruško
U dvuch navučencaŭ 1-ha i 5-ha kursa Suvoraŭskaj vučelni akazalisia stanoŭčymi testy na COVID-19. Jak chłopcy zarazilisia virusam i jakija miery biaśpieki dla astatnich navučencaŭ pryniali, raspaviali Tut.by ŭ Ministerstvie abarony.
U redakcyju źviarnułasia siastra adnaho z navučencaŭ Suvoraŭskaha vučylišča i paviedamiła, što ŭ rocie ŭ brata znojdzieny karanavirus, tamu chłopcaŭ prosiać zastavacca ŭ samaizalacyi.
U Ministerstvie abarony infarmacyju paćvierdzili. Dvoje vychavancaŭ Minskaha Suvoraŭskaha vajennaha vučylišča ciapier znachodziacca na lačeńni ŭ Minskaj infiekcyjnaj balnicy. Ich stan zdavalniajučy.
— Kanikuły ŭ Suvoraŭskim vučyliščy pa takim ža hrafiku, jak u zvyčajnych škołach. U vučyliščy ŭsim mierajuć tempieraturu štodnia, a paśla viartańnia z domu chłopcy taksama prachodziać miedahlad. Pa pryjeździe z kanikuł u chłopcaŭ niaznačna padniałasia tempieratura, — patłumačyła aficyjny pradstaŭnik Ministerstva abarony Natalla Haŭrusik. — Ich nakiravali ŭ špital i tam byli ŭziatyja testy na COVID-19. Proby akazalisia stanoŭčymi.
Jak paviedamili ŭ Minabarony, u vučyliščy apieratyŭna praviali epidrasśledavańnie. Usie kantakty 1-ha ŭzroŭniu ŭžo izalavanyja. Baćkam takich vychavancaŭ prapanavali izalavać dziaciej doma.
— Praduhledžany varyjant izalacyi ŭ sanitarnaj častcy vučylišča. U asnoŭnym navučencaŭ zabrali baćki, ale, kali ŭ kahości nie atrymlivajecca, taki varyjant mahčymy, — padkreślivaje Natalla Haŭrusik. — Va ŭsich kantaktaŭ 1-ha ŭzroŭniu taksama ŭziataja proba dla analizu.
Akramia hetaha, pa žadańni adpravicca dadomu na samaizalacyju mohuć tyja navučency 1-ha i 5-ha kursaŭ, jakija nie źjaŭlajucca kantaktami 1-ha ŭzroŭniu. Nakolki viadoma Ministerstvu abarony, takoj mahčymaściu baćki taksama pakul nie karystalisia.
Ci buduć hetyja «suvoraŭcy» ŭdzielničać u paradzie?
— Nie. Ni siarod tych, chto zachvareŭ, ni siarod kantaktaŭ 1-ha ŭzroŭniu ŭdzielnikaŭ parada na 9 Maja niama. Chłopcy z 1-ha i 5-ha kursaŭ u vajennym paradzie udzieł nie prymajuć, — adznačyli ŭ Minabarony.
