Zdareńnie adbyłosia ŭ Maładziečnie ŭ kramie na vulicy Bahdana Chmialnickaha. U milicyju źviarnułasia ŭładalnica pryvatnaj kramy: jana raspaviała, što nieviadomyja raźbili akno i vynieśli z kabinieta dyrektara siejf, piša kraj.by.

— Akramia siejfa, z kramy źnikła vyručka ŭ 1480 rubloŭ. U kasie zachoŭvałasia niaznačnaja suma, asnoŭnaja była ŭ skryni pad kasavym aparatam, — paviedamiła aficyjny pradstaŭnik Maładziečanskaha RAUS Julija Kruk.

Siejf, abstalavany kodavym zamkom, byŭ u kabiniecie dyrektara ŭ šafie. Ale nasupierak praviłam jon nie byŭ ničym zamacavany, a ŭ kramie nie było ni sihnalizacyi, ni kamiery videanazirańnia.

Na praciahu sutak supracoŭniki kryminalnaha vyšuku Maładziečanskaha RAUS raskryli złačynstva i zatrymali padazravanych. Imi akazalisia raniej sudzimyja za kradziež žychary Maładziečna: adzin 40-hadovy, a druhomu 29 hadoŭ.

Padazravanyja raspaviali, što adkryli ralet, nie zamkniony na zamok, i kuchonnaj siakierkaj raźbili škło. Siejf, pa słovach fihurantaŭ, jany vynieśli ŭ polietylenavym pakiecie. Pakidajučy mahazin, apuścili za saboj ralet, kab nie vyklikać padazreńniaŭ.

Paśla hetaha maładziečancy pajechali ŭ Viazynku da znajomaha, u jakoha pazyčyli instrumient dla ŭskryćcia siejfa. Adnak, kali raśpiłavali jaho, to hrošaj nie znajšli, tolki dakumienty. Papiery jany spalili, a siejf zakapali ŭ lesapałasie.

Vyručku padzialili pamiž saboj.

Ciapier padazravanyja znachodziacca ŭ izalatary časovaha ŭtrymańnia.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?