Ilustracyjnaje fota. Pachavańnie adnoj z achviaraŭ karanavirusu ŭ Stoŭpcach, 23 krasavika 2020 hodu.

Ilustracyjnaje fota. Pachavańnie adnoj z achviaraŭ karanavirusu ŭ Stoŭpcach, 23 krasavika 2020 hodu.

«Adčyniać [trunu] nielha było, bo jon navat nie apranuty. Jon u pakiecie», — žonka Leanida Milkoŭskaha ź Lidy płača ŭ telefon. Chvaroba ŭ muža pačynałasia jak prastuda. Praz try tydni jon pamior. Pa dakumentach, pryčyna śmierci — COVID-19, piša Radyjo Svaboda.

Leanidu Milkoŭskamu było 36. U jaho zastalisia žonka i troje dziaciej ad 3 da 10 hadoŭ. Pracavaŭ ekanamistam u nievialikaj firmie. U Lidzie chodziać čutki, što pamior taksist, ale z hetaj sfery Leanid daŭno syšoŭ.

Dzie jon moh padčapić karanavirus, rodnyja dakładna nia viedajuć. Žonka padazraje, što heta mahło zdarycca ŭžo ŭ špitali. Tolki treci test na karanavirus pakazaŭ stanoŭčy vynik.

«Niama narmalnaj izalacyi ludziej. Usie pieramiašanyja. Chvoryja lažać sa zdarovymi. Nichto ničoha nia viedaje. Testy robiać kiepska, nia robiać svoječasova… Tam usio miašana-pieramiašana», — kaža Volha Milkoŭskaja.

Jana pa pierapiscy z mužam dakładna adnaŭlaje padziei apošnich troch tydniaŭ. Upieršyniu Leanidu stała kiepska 19 krasavika, u niadzielu. Temperatura padniałasia trochi za 37 hradusaŭ, krychu kašlaŭ. 20 krasavika ŭ paliklinicy jamu praz prastudu adkryli balničny i nakiravali dachaty.

23 krasavika Leanidu treba było iści ŭ palikliniku na pryjom. Temperatura padniałasia da 38 hradusaŭ. Terapeŭt pryjšła dadomu, pryznačyła macniejšy antybijotyk i skazała pryjści na nastupny dzień u palikliniku praciahnuć balničny ŭ zahadčyka.

24 krasavika zdymak vyjaviŭ pneŭmaniju. U toj ža dzień Leanida pakłali ŭ lidzki špital, u infekcyjnaje adździaleńnie. Uziali test na karanavirus.

Na vychodnych tolki raz na dzień stavili kropielnicy pa 5 chvilin.

27 krasavika, pa słovach žonki, da jaho pieršy raz pryjšoŭ lekar. Uviečary jaho «pakłali pad kisłarod» — nie pad aparat ŠVŁ, a lahčejšy varyjant.

28 krasavika zajšoŭ dziažurny lekar, supakoiŭ, što «tak byvaje» i «ŭsio budzie dobra».

29 krasavika pryjšoŭ pieršy admoŭny test na karanavirus. Stan pahoršyŭsia, staŭ padać kisłarod u kryvi. Mužčynu pieraviali ŭ lidzkuju radzilniu, jakaja ciapier častkova pieraprafilavanaja pad pryjom kovidnych pacyjentaŭ.

«U 10:20 jon mnie napisaŭ, što jaho pieravodziać u raddom. Da 11:50 jon siadzieŭ, čakaŭ chutkuju, pakul jaho pieraviazuć. Kiepska jamu było, kisłarod padaŭ… Jechaŭ na zadnim siadzieńni chutkaj dapamohi», — płača Volha.

Leanid amal tydzień lažaŭ u reanimacyi. Ilustracyjnaje fota

Leanid amal tydzień lažaŭ u reanimacyi. Ilustracyjnaje fota

U 13:23 29 krasavika Leanida pieraviali ŭ reanimacyju, pa chvilinach adnaŭlaje karcinu chvaroby žonka.

Amal tydzień mužčyna lažaŭ u reanimacyi, jaho ŭviali ŭ štučnuju komu. Suviazi sa svajakami ŭžo nie było.

3 traŭnia pryjšoŭ stanoŭčy vynik testu na karanavirus.

Pavodle zaklučeńnia ab śmierci, asnoŭnaja pryčyna śmierci — karanavirusnaja infekcyja COVID-19

Pavodle zaklučeńnia ab śmierci, asnoŭnaja pryčyna śmierci — karanavirusnaja infekcyja COVID-19

Nakolki viedajuć svajaki, pieralivańnie kryvi mužu da apošniaha nie rabili. Zamovili plazmu z antyciełami tolki za dzień da śmierci, kali pajšła admoŭnaja dynamika, upaŭ cisk u lohkich. Jak lekary kazali svajakam, pieralivańnie rabili ŭ noč pierad śmierciu.

«Skazali, što ŭ apošni dzień nibyta sprabavali. My im kazali štodnia. A jany ŭsio: «Rana — čakajcie, rana — čakajcie, rana — čakajcie»», — płača Volha.

Nočču 7 traŭnia Leanid pamior.

«Dziaciej bahomiŭ. Kolki my razam žyviom, nikoli mnie słova kiepskaha nie skazaŭ. Zaŭsiody popleč. Takich mužoŭ pašukać. Nia piŭ, nie kuryŭ. Navat nia pamiataju, kab kali na jaho złavałasia», — raskazvaje Volha.

«Jon siabie adčuvaŭ dobra», — apisvaje ahulny stan muža padčas chvaroby da reanimacyi žonka.

Mužčyna byŭ zdarovy, da lekaraŭ nie źviartaŭsia, tolki zuby lačyŭ, mieŭ pustuju medyčnuju kartku.

«Mnie zdajecca, heta ŭpuściła «infekcyja» [infekcyjnaje adździaleńnie špitala] adrazu, nichto nie prychodziŭ. Čamu, kali jaho ŭ špital pryvieźli, nijakich lekaraŭ nie paklikali? Medsiostry prychodzili, kropielnicu pastavili. Pytalisia, što ŭkałoli. — «Dla zdaroŭja»», — raskazvaje Volha.

Svajaki byli hatovyja kupić i pryvieźci patrebnyja leki, adnak u špitali im nie kazali, što treba.

Temperatura ŭ Leanida za ŭvieś hety čas, nakolki viedaje žonka, padymałasia nie vyšej za 38,8. Da reanimacyi jon vieryŭ, što nieŭzabavie ačuniaje. Kali pieraviali ŭ radzilniu, stała lahčej.

«Nu što ŭ nas «infekcyja» [infekcyjnaje adździaleńnie špitala]? Budynak stary, pałaty małyja, vokny strašnyja. Tam ni dychać, ničoha niemahčyma. A ŭ raddomie, kaža, jamu i dychać lahčej było. Tam pavietra inšaje, vokny adčynić možna było. Ja i padumać nie mahła, što tak budzie», — słovy surazmoŭnicy ŭvieś čas pieraryvaje płač.

Kolkaść kovidnych pacyjentaŭ, sa słovaŭ muža, Volha akreślivaje jak «šmat» i «usio zakładziena».

Kvateru i padjezd, dzie žyvie siamja, apracavała sanstancyja. U žonki i dziaciej uziali testy. Praŭda, adrazu na małodšaha test nie ŭziali, nibyta nie zapisali jaho ŭ śpisy. Pa vyniku ni ŭ koha infekcyi nie znajšli.

«Dali papierki padpisać, što my siadzim doma. Mnie i dočkam da 7 čysła, synu — da 8 čysła. Dla čaho heta? Navošta?», — nie razumieje Volha.

8 traŭnia Leanida pachavali. Pierad hetym vazili ŭ Horadniu na ŭskryćcio.

Niahledziačy na niebiaśpiečny dyjahnaz, na pachavańnie pryjechała šmat ludziej. Nie pabajalisia ni dalokija svajaki, ni siabry. U rytualnym biuro skazali pra zachady biaśpieki. Milicyja nie supravadžała pachavańnie i nie kantralavała, ci vykonvajucca zachady biaśpieki. Volha kaža, što kožny sam adkazna pastaviŭsia da hetaha.

«Adčyniać nielha było, bo jon navat nie apranuty. Jon u pakiecie», — uspaminaje z płačam Volha.

Padčas panichidy ludzi malilisia ŭ kaściole, a truna stajała na vulicy.

Ciapier štodnia žonka jeździć na mohiłki. Źbirajecca ź siłami, kab zavieźci tudy dziaciej. Najciažej starejšamu, 10-hadovamu synu. Jak daviedaŭsia pra śmierć taty, kryčaŭ na ŭvieś dom, klikaŭ jaho.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?